JOB 15 - Biblia Guarani Tumpa Iñee

Elifaz omboeta Job pe

¹ Elifaz Temán pegua jei ye:

² Yarakuaa vae mbaetɨ omoë ñee osirivembae, mbaetɨ oyembotuicha yemongeta oasa ɨvɨtu ramiño vae re.

³ Mbaetɨ omoë iñee ikɨ̈reɨ imiari güiño, mbaetɨ oyeepɨ yemongeta jupimbae pe.

⁴ Ërei nde mbaetɨ ma reipoɨu Tumpa güi, ¡reyerure poi ma Tumpa pe!

⁵ Echa remombeu jupimbae reiko vae, jare reiporu yarakuaambae vae reta iñee.

⁶ Neñee aeño ko nejäa, mbaetɨ ko che, nde aeño ko nemiari ndeyé.

⁷ ¿Nde räri pa reiko Adán güi? ¿Ani nde räri pa reyeapo ɨvɨtɨ reta ndei oiko mbove?

⁸ ¿Reikuaa pa Tumpa oyemongeta oyapo vaerä vae, ani reyererovia pa ndeño jae yarakuaa katu yae vae?

⁹ ¿Oime pa mbae nde reikuaa mbaetɨ ore roikuaa vae, mbae nunga arakuaa pa renoi, ore mbaetɨ rogüɨnoi vae?

¹⁰ Iñäkatï vae reta jare okuakuaa yae ma vae reta ko ñogüɨnoi ore ndive, yarakuaa yae neñemuñagüe reta güi vae.

¹¹ ¿Mbaetɨ pa jaekavi ndeve Tumpa etei ndembopɨakatu vae, jare ñee yeaeä rupi jei ndeve vae?

¹² ¿Maera pa reyererajauka ndepɨa jemimbota pe? ¿Maera pa ndearasɨ yae reve remae?

¹³ ¿Maera pa ndearasɨ Tumpa kotɨ, jare rere oipotagüe ñee?

¹⁴ ¿Ikɨambae pa kuimbae Tumpa jóvai, ipuere pa kuimbae oyembojupi?

¹⁵ Mase, Tumpa mbaetɨ güɨrovia katu mbatee iaraɨgua reta re ave, ara reta ave mbaetɨ ikɨambae jesa róvai.

¹⁶ ¡Vɨtei pa kuimbae ikɨa jare jupimbae Tumpa jóvai vae, yɨmbɨaɨ etei jupimbae re, iɨuve yae vae ɨ oyúe rami!

¹⁷ Eyeapɨsaka cheré, che taechauka ndeve, chemiarita ndeve aechagüe re,

¹⁸ yarakuaa katu vae reta imiari oreve vae, jae reta oyemboe iñemuñagüe reta güi vae.

¹⁹ Chupe reta oñemee kuae ɨvɨ, jae reta ndive mbaetɨ oyea ketɨgua reta.

²⁰ Kuimbae iyoa vae jare ipɨarai vae, oiporara yae, jare mbaetɨ ɨma oiko.

²¹ Oendu jɨapu rami, okɨɨye yae chugüi vae, jaekavi yaecha ma oï yave, imonda vae reta opüa jese.

²² Ojoyepe rapeä susere güi, ¡oñemiä etei oï kɨsepuku güi!

²³ Oeka tëi oipota rupi mbɨyape jei reve: “¿Ketɨ ra oime oï?” Oikuaa ko susere okätɨro jese vae.

²⁴ Tembiporara guasu ombopɨatɨtɨ, metei mburuvicha guasu oporepeña ñeraroa pe kia re rami.

²⁵ Echa oñemopüa Tumpa kotɨ, oyembopɨa pochɨ Imbaepuere yae ete vae kotɨ.

²⁶ Oporepeña Tumpa re iñäka omopüa reve, iyeopiaka yandambusu vae ndive.

²⁷ Echa oiko kavi ramo oyembopɨa pochɨ.

²⁸ Tëta guasu reta oiko pɨpe vae, opata oyemboai, o reta opɨtata ipombae, opɨtata tëtagüeräño.

²⁹ Mbaetɨta oiko kavi ani ɨma oikokatu oiko, mbaetɨta vi omoai kerupi imbaembae reta.

³⁰ Mbaetɨta ojoyepe mano güi, tata omotini ɨvɨra jäka rami, iñemuña reta okañɨteita, Tumpa ipɨ̈túe rupi opata okañɨtei.

³¹ Agüɨye perovia katu oporombotavɨ vae reta, echa peyembotavɨukaiñota ko.

³² Ndei iara oväe mbove jäka opa ipiru, jare ngaraa ye ma jokɨ.

³³ Metei uva ndei yagüɨye vae osururu ramita ko, ɨvɨra olivo jee vae ipotɨ osururu vae ramita ko.

³⁴ Iyoa vae reta mbaetɨta iñemuña, jo ombokavi korepoti oipɨɨ vɨari vae rupi vae, opata ókai chugüi.

³⁵ Ipurúa rami ikavimbae pe, jare omoë jupimbae, omee ia mborombotavɨ pegua.