JOB 14 - Biblia Guarani Tumpa Iñee

Job imiari mbaetɨ tekove puku vae re

¹ Kuña imembɨ, mbaetɨ ɨma oiko, jare oiporara yae.

² Mbaepotɨ ramiño; oyekuaa, javoi ipiru, oasa, jare okañɨ metei küaraɨa rami.

³ Jökorai ko che, ërei jeseve remae ngatu cheré, jare chereru chejäa.

⁴ ¿Kia pa ipuere oekɨ mbae ikɨa vae güi, mbae ikɨambae? Mbaetɨ.

⁵ Añetete iara reta oyepapa ko oï, yasɨ reta oikota vae nde reikuaa, remee oikove oiko vaerä vae güi, ngaraa oasa.

⁶ Esɨrɨ chugüi, jare toiko pɨagüive. ¡Emaeño toyemboyerovia ara ñavo iparavɨkɨ jepɨ chupe vae rami!

⁷ Metei ɨvɨra oyeasɨagüe, ipuereño jokɨ ye, jeñɨi yeta iyɨpɨgüe jare oiko yeta.

⁸ Yepe tëi japo reta indechi, jare iyɨpɨgüe otiniecha,

⁹ ërei oɨu yave, jokɨ yeta ko, jare jäka jetata temitɨ ipɨau rami.

¹⁰ Ërei kuimbae omano yave, okañɨ, jare ¿ketɨ ra ojo?

¹¹ Ɨ ipuere opa tɨpa ɨguasu pe, ɨ̈aka reta pe jagüe jare opa tɨpa.

¹² Jökorai kuimbae omano, jare mbaetɨ opüa ye, oime ramboeve oiko ara, ngaraa oikove ye, ngaraa opüa ye oke oï vae güi.

¹³ Aipotaecha chemoñemi omanogüe reta ñogüɨnoia pe, jae cheöva vaerä ndearasɨ oasa regua, rembojee ara nemaendúa vaerä cheré vae regua.

¹⁴ Kuimbae omano yave, ¿oikove yeta ra? Opaete ara aikove aiko ramboeve, aärota, aiporara poi vaerä.

¹⁵ Chereenɨita, jare che aenduta, cheraɨuta remae cheré, echa nde ko jae cheapoa.

¹⁶ Jayave, nde reikuaata opaete cheguata re, ngaraa nemaendúa cheyoa reta re.

¹⁷ Reñapɨtita reñono urupuku pe cheyoa reta, jare rembovɨvɨta reñono opaete ikavimbae ayapogüe.

¹⁸ Mase, ɨvɨtɨ osururu vae okañɨ, jare ɨ̈vavira osɨrɨ jenda güi.

¹⁹ Ɨaparúa reta oikɨtɨ ita reta, ama okɨ yave, güɨraja ɨvɨkúi reta, jökorai nde remboai, kuimbae oyerovia tëi jese vae.

²⁰ Remoamɨri jekuae avei pegua, okañɨtei jekuae avei pegua, jova ambuae, jökorai remondo.

²¹ Taɨ reta imboetea yae yave, jae mbaetɨ oikuaa, ani osusere reta yave, jae mbaetɨ oikuaa.

²² Jaeño oyandu oiporara oï vae, jare ipɨatɨtɨ iyé.