JOB 13 - Biblia Guarani Tumpa Iñee

Job oepɨ jeko kavi

¹ Mase, opaete kuaekuae reta aecha, aendu jare aikuaa.

² Pe reta peikuaa rami ko che aikuaa vi; che mbaetɨ ko michi arakuaa pe pegüi.

³ Ërei aipotaecha chemiari Imbaepuere yae ete vae ndive, Tumpa ndive che chekɨ̈reɨ ayoaka.

⁴ Echa pe reta ko apu rupi peñomi añete vae, opaete pe reta ko jae oporopoano vae oporombogüerambae reta rami.

⁵ ¡Mbae mona peñemokïrii ete! Echa jókuae rupi pearakuaa oyekuaata.

⁶ Peendu añave cheyemongeta reta; peyeapɨsaka kavi mbae jaeta vae re.

⁷ ¿Pemiarita pa Tumpa jee re mbae jupimbae? ¿Pemiarita pa jee re peporombotavɨ reve?

⁸ ¿Peñemoëta pa jekovia pe? ¿Peporojäata pa jae jekovia pe?

⁹ Ërei Tumpa omae peré yave, ¿këraita ra aipo pepɨa jae jóvai? ¿Pepuereta ra pembotavɨ metei kuimbae rami?

¹⁰ Jae oñeengatata ko peve, peyeugüiño peporojäa yave.

¹¹ Imbaepuere yae vae, ¿ngaraa yera peiämondo? Iporomongɨɨye outa peré.

¹² Peñee reta, tanimbu ramiño ko, peyeepɨ jese vae, mbaeä etei ko.

¹³ ¡Pekïrii, che chemiarita, jare jaɨkue rupi tou cheve oipotagüe mbae!

¹⁴ Tañemoëgua etei, tañono cherekove chepo pe etei.

¹⁵ Mase, yepe tëi jae cheyuka, ërei jeseño ko ayekota; aepɨ tai ko cherekove jae jóvai.

¹⁶ Jae ko chereroasayepe vae, echa jae jóvai, ngaraa oyemboɨ iyoa vae.

¹⁷ Peyeapɨsaka kavi cheyemongeta re, chemiarita peve vae re.

¹⁸ Mase, añave ayeepɨ yave, aikuaa ko jupi vae jaeta.

¹⁹ ¿Oime yave kia mbae re chemboeko vaerä? Tachekïrii jare tamano.

²⁰ Jayave Job jei Tumpa pe: Mókoi mbae agüɨye embou cheve; jayave ngaraa añemi ndegüi:

²¹ Agüɨye mo eiporarauka cheve, jare agüɨye mo chemongɨɨye yae.

²² Chereenɨi nde, jare che roenduta; ani che roenɨita, jare nde emboyevɨ cheñee cheve.

²³ ¿Mbovɨ pa anoi mbae pɨ̈chɨi jare mbaeyoa? Eikuaauka cheve ayavɨgüe jare cheyoa.

²⁴ ¿Maera pa reñemi chegüi? ¿Maera pa cheapo nderovaichorä?

²⁵ ¿Remokañɨteita pa metei ñana-roo oagüe, ani reyapo pa ikavimbae kapii otinigüe pe?

²⁶ ¿Maera pa remoäpɨta tupapire pe chekotɨ ikavimbae, jare reiporarauka cheve opaete mbaeyoa ayapo chetaɨrusu yave vae re?

²⁷ Reñono chepɨ ɨvɨrakua pe, jare remae opaete ayapogüe re, remae opaete cheguata re ave.

²⁸ Jökorai chepɨ̈rata opa ojo oiko, metei temimonde, kupii jou güɨreko rami.