JOB 12 - Biblia Guarani Tumpa Iñee

Job omoërakua Tumpa imbaepuere jare iyarakuaa

¹ Jayave Job jei ivɨa-ïru reta pe:

² Añetete, pe reta ko jae iyarakuaa katu vae, jare pemano yave, pe reta ndive ko iyapɨta arakuaa katu.

³ Che oime vi ko anoi arakuaa pe reta rami; che mbaetɨ ko michi arakuaa pe pegüi. ¿Kia pa mbaetɨta kuae oikuaa vi?

⁴ Che ko kuimbae jekombae jare jupi vae, tenonde rupi Tumpa oendu yepi ko cheyerure, ërei jeseve añave chevɨa-ïru reta cheyóyai yóyai.

⁵ Oiko kavi vae güɨröɨro paravete vae, mbaetɨ oiparareko, ogüɨapita ma oï vae.

⁶ Imonda vae reta oiko kavi avei, Tumpa omboarasɨuka vae reta mbaetɨ maratu yogüɨreko, ërei Tumpa ko omee chupe reta, opaete mbaembae güɨnoi reta vae.

⁷ Eparandu añave mɨmba reta pe, jae reta tandemboe, güɨra reta pe, jae reta toechauka kavi ndeve.

⁸ Ani, emomiari ɨvɨ, jae tandemboe, jevae ɨ rupigua reta pe, jae reta vi tomombeu kavi ndeve.

⁹ ¿Kia nunga ra kuae reta güi, mbaetɨ oikuaa yandeYa ko oyapo vae?

¹⁰ Jae ipo pe ko oï opaete mbaembae jekove, jare opaete kuimbae reta jekove.

¹¹ Apɨsa, oendu ñee reta, jare yuru, ojäa tembíu.

¹² Ndechi reta güɨnoi arakuaa; ɨma oiko vae iyarakuaa.

¹³ Tumpa ko yarakuaa vae jare imbaepuere vae, jae oyemongeta oyapo vaerä vae, oyapo.

¹⁴ Jae omboai vae, mbaetɨ kia ipuere omopüa ye, oyokenda kuimbae yave, mbaetɨ kia ipuere güɨnoe.

¹⁵ Jae omombɨta ama yave, opa mbae ipiru, omongɨ yave, oyeapo ɨporu.

¹⁶ Jae ko imbaepuere vae jare yarakuaa vae, ipo pe ko oï mbae oyavɨ vae, jare mbae oyavɨuka ïru pe vae.

¹⁷ Tumpa opɨ̈ro arakuaa, oporomboarakuaa vae reta güi, jare mburuvicha oporojäa vae reta güi, opɨ̈ro arakuaa.

¹⁸ Jae oyora mburuvicha guasu reta iporoäpɨti, jare oñapɨti tɨmasa pe.

¹⁹ Jae opɨ̈ro mburuvicha guasu reta güi iporookuai, jare opɨ̈ro sacerdote reta güi iparavɨkɨ.

²⁰ Mbaetɨ omaeño omoë iñee, jupi rupi imiari vae reta, jare opɨ̈ro ndechi reta güi arakuaa katu.

²¹ Jae opɨ̈ro mburuvicha guasu reta iyemboetea, jare imbaepuere vae güi opɨ̈ro mbaepuere.

²² Jae oikuaauka yaikuaa rapembae vae, güɨnoe tembipe pe yavai yae vae.

²³ Jae ombotuicha tëtaguasu reta, jare jae yeño opa omboai, jae opa omoai moai, jare jae yeño opa omboatɨ.

²⁴ Jae opɨ̈ro arakuaa tëtaguasu juvicha reta güi, jare omaeño jopa, ñuu rupi tapembaea rupi rami.

²⁵ Opovɨvɨ yogüɨraja, pɨtumimbía rupi rami, jare oyavɨuka chupe reta, osavaɨpogüe pe rami.