JOB 11 - Biblia Guarani Tumpa Iñee

Zofar omboeko ikavimbae pe Job

¹ Zofar Naamat pegua jei Job pe:

² Jeta yae nemiari vae, ¿mbaetɨta pa jekovia ndeve? ¿Kuimbae jeta yae imiari vae jeko pegua, oyembojupita pa?

³ Neñee ngatu yae vae ¿oremokïriita pa? Reyuvanga katu kia re, ërei ¿ngaraa pa kia nemomaraiuka?

⁴ Nde rere: “Cheporogüɨrovia isɨmbi ko, che mbaetɨ ko chekɨa Tumpa jóvai.”

⁵ Ërei, ¡Tumpa etei mona imiari, jare omboyevɨ ndeve!

⁶ Jare omombeu ndeve yaikuaa rapembae vae, arakuaa katu regua, echa jókuae arakuaa katu oyapɨraa ye ko mbaeyekou reta jepɨ yae vae. Jayave reikuaata Tumpa mbaetɨ ko oiporarauka ndeve mbaeyoa reyapo rami etei.

⁷ ¿Reikuaata pa nde mbaembae yavai yae Tumpa regua vae? ¿Reikuaata pa, Imbaepuere yae ete vae kërai etei ko vae?

⁸ Ɨvate yae ko ara güi, ngaraa mbae ndepuere reyapo; kɨ̈pe yae ko omanogüe reta ñogüɨnoia güi, ngaraa ndepuere reikuaa.

⁹ Ipɨguasugüe, ipɨguasu yae ko ɨvɨ güi, jare oasa ipɨguasu, ɨguasu ipɨguasugüe güi.

¹⁰ Tumpa oasa kuae rupi yave, oporopɨɨ jare oporoenɨi morojäa pe yave, ¿kia pa ipuereta oyopia?

¹¹ Echa jae oikuaa kuimbae oporombotavɨ vae reta; jökorai oecha vi mbaeyoa, ¿rerovia pa mbaetɨta mbae jei?

¹² Mburika ñana rupigua imembɨ jeko kavi yave, kuimbae ipɨa pɨ̈chɨi vae yarakuaata.

¹³ Nde reñono kavi yave ndepɨa; jare ndepo remopüa reyerure chupe yave.

¹⁴ Mbae nunga mbaeyoa renoi vae, rembosɨrɨ yave ndeyeugüi; jare mbaetɨ remaeño ndero pe oï jupimbae yave.

¹⁵ Jayave nderova remopüata ikɨambae; nepɨ̈ratata, jare ngaraa etei mbae güi rekɨɨye.

¹⁶ Jare neakañɨta reiporaragüe güi, neakañɨta chugüi ɨ oasagüe güi rami.

¹⁷ Ndeara ikavi yeta, kuaraɨ jembipeasɨ yae ara mbɨte pe rami, yepe tëi pɨtumimbi, ërei jembipe katuta ndeve köe-pota yave rami.

¹⁸ Reyererovia katuta, echa oime neräro mbae ikavi vae, remaeta ndeɨ́vɨri, jare reke pɨagüiveta.

¹⁹ Reyapakua yave, ngaraa kia nemongɨɨye, jeta yogüeruta oeka ndeve ndeporomborɨ vae.

²⁰ Ërei jeko pɨ̈chɨi vae reta, okañɨteita; mbaetɨta ketɨ oväe reta oñepɨ̈ro vaerä, jae reta jaeño ma oäro vae, jae ko mano.