JOB 10 - Biblia Guarani Tumpa Iñee

Job omboeta oiporara vae re

¹ ¡Chembogüérai ma körai aiko vae! Cheräseta chepuere rupi, chemiarita jasɨ katu aiporara aï vae re.

² Jaeta Tumpa pe: Agüɨye chemboeko; eikuaauka cheve maera ko reyemboyovaicho che ndive vae.

³ Nde etei ko cheapo, ¿jaekavi pa ndeve reyuvanga katu jare chemotareɨ vaerä, jare reë vaerä iyoa vae reta iyemongeta jekovia pe?

⁴ ¿Kuimbae reta omae ramiño yera nde remae vi?

⁵ ¿Kuimbae reta mbovɨ ara oiko ramiño yera nde reiko vi; ani kuimbae iaño ramiño vi yera neaño?

⁶ ¿Maera pa reeka etei jupimbae ayapo vae, jare reeka cheyoa?

⁷ Yepe tëi nde reikuaa, che mbaetɨ ko ayapo jupimbae, jare mbaetɨ kia ipuere chereepɨ vaerä ndegüi.

⁸ Ndembaepuere pe ko cheapo, javoi añave reipota chemokañɨtei.

⁹ Nemaendúa, cheapo ko tuyuapo güi, ¿chemondo yeta pa añave ɨvɨkuirä?

¹⁰ Chepɨyereä pa neche oyepɨyere rami jare chemotäta kesu rami.

¹¹ Chemboemimonde chesoo pe jare chepire pe, jare chekägüe remboya oyoe cherayɨ pe.

¹² Remee cheve tekove jare cheparareko, jare ndeporoangareko rupi aikove aiko.

¹³ Ërei oime yepe ndepɨa pe rereko kuae yemongeta, jókuae yemongeta mbaetɨ kia oikuaa:

¹⁴ Jae ko, cheyoa yave, nde remae reï cheyoa re, jare mbaetɨ neɨ̈ro cheve kërai yepe.

¹⁵ Chereko yave, taiporara, ërei mbaetɨ chereko yave, ngaraa amopüa cheäka, echa jeta mbae chemomarai, jare aiporara yae aï.

¹⁶ Añemopüa ye yave, nde yaguapope rami reyuta cheve, jare reyapo yeta chekotɨ mɨakañɨ.

¹⁷ Rembopɨau avei cheré teko reta, remoïru ye chekotɨ ndearasɨ; ¡sundaro reta oyopoepɨ avei rami!

¹⁸ ¿Maera pa remaeño aa vaerä chesɨ güi? Ikavi amano voi tëi, jayave ngaraa etei kia chereecha.

¹⁹ Mbaetɨta ko aikove aiko viña, chesɨ jɨe güi voi aja yave tɨvɨa pe.

²⁰ ¿Mbovɨñoä yera cheara reta aikove aiko vaerä? ¡Emaeño mo cheré, tachepɨakatu michi raɨ pegua yepe!

²¹ Ndei aja mbove, ayu yembae vaerä; ɨvɨ pɨtumimbía pe.

²² Mbaetɨ mbae ikavi joko pe, pɨtumimbi oñova tembipe pe.