JOB 1 - Biblia Guarani Tumpa Iñee

Job isusere reta

¹ Ɨvɨ Uz pe oiko metei kuimbae Job jee vae; kuae kuimbae ko jupi, isɨmbi, Tumpa güiño oipoɨu jare oyeandu ikavimbae güi.

² Oa chupe chiu taɨ reta jare mboapɨ tayɨ reta.

³ Güɨnoi siete mil vecha, tres mil camello, quiniento yoayu güeye, jare quiniento mburika, jare jeta yeyé jembiokuai reta; jare jókuae kuimbae oikokatu yae ye opaete kuaraɨ oëa kotɨgua reta güi.

⁴ Jare taɨ reta oyomboatɨ avei jëta ñavo pe oyapo arete, ara oiparavo oyoupe vae ñavo pe; jare omondo reta oenɨiuka mboapɨ reve jeindɨ reta, okaru jare jou vaerä vino jae reta ndive.

⁵ Jare opa güire omboasa reta iarete yave, Job omondo oenɨiuka taɨ reta, jare ndeimboveasɨ opüa omee mbota mɨmba oyeyukagüe opaetei oyeapɨ vae, taɨ reta ñavo re; jökorai oyapo chupe reta yetɨo iyoa güi, echa Job jei: “Güɨramoi cheraɨ reta oyapo mbaeyoa ani oyangao reta ipɨa pe Tumpa.” Jökorai avei oyapo Job.

⁶ Metei ara yogüeru araɨgua reta yandeYa jóvai, jae reta ipɨte pe ou vi Satanás.

⁷ Jare yandeYa jei Satanás pe: —¿Ketɨ güi pa reyu? Jare Satanás jei yandeYa pe: —Ɨvɨ rupi ayere aguata aikoa kotɨ güi.

⁸ Jare yandeYa jei Satanás pe: —¿Reikuaa pa cherembiokuai Job, kërai mbaetɨ yé ïru kuimbae kuae ɨvɨ pe jae rami vae, jupi jare jeko sɨmbi vae, oipoɨu chegüi vae jare oyeandu ikavimbae güi vae?

⁹ Satanás jei yandeYa pe: —¡Aramoiñoä ko Job oipoɨu ndegüi!

¹⁰ Nde etei ko reñova jae, jo jare opaete mbaembae güɨnoi vae, jare iparavɨkɨ re ndeporerekua; jáeramo, imbaembae reta jeta oñemuña ɨvɨ iárambo.

¹¹ Ërei yaecha añave epoko opaete mbaembae reta güɨnoi vae re, jare reechata mbaetɨta ra ndeangao nderova pe etei vae.

¹² YandeYa jei Satanás pe: —Mase, ko oï ndepo pe opaete mbaembae reta güɨnoi vae; ërei chupe etei agüɨye mbae eyapo. Jare Satanás oë ojo yandeYa jóvai güi.

¹³ Jare metei ara Job taɨ reta jare tayɨ reta okaru jare jou reta vino ñogüɨnoi tɨkeɨ tenondegua jo pe yave,

¹⁴ ou metei kuimbae ñee jerúa Job oïa pe, jare jei chupe: —Roara roï güeye reta pe, jare joko güi köi mburika reta okaru yogüɨreko.

¹⁵ Oreparanoe oyekuaa Sabáɨgua reta jare opa oyuka tembiokuai reta kɨsepuku pe; cheño etei atekuarai ayu vaerä chemiari ndeve.

¹⁶ Kuae imiari vɨteri oï ramboeve ou ïru oväe, jare jei: —Ama-vera oa ara güi, jare opaetei oapɨ vecha reta jare iyangarekoa reta, jare opaetei omokañɨtei; cheño etei aasayepe ayu vaerä chemiari ndeve.

¹⁷ Kuae imiari vɨteri oï ramboeve, ou ïru oväe jare jei: —Caldeaɨgua reta oyeapo mboapɨ yemboyao oporepeña oreré, jare opa oipɨɨ güɨraja camello reta, opa oyuka tembiokuai reta kɨsepuku pe; jare cheño etei atekuarai ayu vaerä chemiari ndeve.

¹⁸ Jare kuae imiari oï ramboeve ou oväe ïru, jare jei: —Nderaɨ reta jare nderayɨ reta okaru jare jou vino ñogüɨnoi, tɨkeɨ tenondegua jëta pe;

¹⁹ jare ou ɨvɨtuai täta yae vae ñuu kotɨ güi, jare omokana irundɨ reve okɨta reta jare oitɨ taɨrusu vae reta re, jare opa omano reta; jare cheño etei aasayepe ayu vaerä chemiari ndeve.

²⁰ Jayave Job opüa jare omondoro jemimonde jare opaetei oñeapiasɨ ipɨatɨtɨ güi, jare oyetavatɨka itindɨasɨ ɨvɨ re jare omboete Tumpa,

²¹ jei: —Chepogüɨrai ko aa chesɨ güi jare chepogüɨrai tamano. YandeYa ko omee, jare yandeYa ko oekɨ. ¡Toyemboete yandeYa!

²² Opaete kuae mbaembae pe Job mbaetɨ iyoa, jare mbaetɨ ave omboeko Tumpa mbae pe ave.