JEREMÍAS 9 - Biblia Guarani Tumpa Iñee

¹ ¡Mbae mona cheäka ɨkua rami, jare cheresa ɨesaɨ rami, aäpiro vaerä ara rupi jare pɨ̈tu rupi cherëtaɨgua reta omano vae!

² ¡Kia mona omee cheve ñuu pe teyupa aputuu vaerä, aja vaerä mombɨrɨ aï cherëtaɨgua reta güi! Echa opaete jae reta jupimbae ko, ipɨapochɨ vae reta ko.

³ Oïndaivi iyapu reta vaerä, uvɨ oñemoïndaivi oñejäa vaerä vae rami. Kuae ɨvɨ pe jeiete apu, mbaetɨ añetete vae; jeiete yae ikavimbae vae oyapo reta; yandeYa jei: “Mbaetɨ oipota oikuaa reta cheregua.”

⁴ Ivɨa-ïru ndive ave mbaetɨ oyogüɨrovia katu; oñoëtara vae ndive ave mbaetɨ oyogüɨrovia katu, echa oñoëtara vae reta oyombotavɨ, jare oyoangao reta ivɨa-ïru ndive.

⁵ Metei ñavo ombotavɨ ivɨa-ïru, mbaetɨ etei kia ave jei añetete vae. Oyepokuaa reta iyapu; ikavimbae yae reta ko, yavai yae oyepoepɨ reta vaerä.

⁶ YandeYa jei: “¡Apu renda pe yogüɨreko, jupimbae jeiete! Chembae vae reta mbaetɨ oipota oikuaa cheregua.

⁷ Jáeramo che, peYa Imbaepuere yae ete vae, jae: Mbaetɨ ye mbae ayapo vaerä tëta chembae vae ndive, jaeño tata pe añonota ambokavi vaerä.

⁸ Uvɨ jakuarovi rami ko iñee reta; apuño imiari reta; imiari kavi reta iñeïru ndive mbɨakatu re, ërei ipɨa pe oporopïaro reta.

⁹ Kuae jeko pegua ¿amaeñota ra jese reta? Metei tëtaguasu kuae nunga oyapo yave, ¿mbaetɨ ra jupi aiporarauka vaerä chupe jeko? Che ndeYa jae kuae.

¹⁰ Peäpiro peräse reve ɨvɨtɨ reta, peäpiro ñuu kapii jenda reta, echa opaetei oyemboai opɨta, mbaetɨ ye kia oasa jokoropi; guaka iñee ave mbaetɨ oyeendu, güɨra jare mɨmba pochɨ vae reta ave opa yogüɨraja.

¹¹ Jerusalén tëtagüerä ayapota, opɨtata aguarayaɨmba reta jëtarä; jare tëta guasu reta Judá pegua opɨtata ipombae, mbaetɨta kia ave oiko pɨpe.”

¹² ¿Oime pa kia yarakuaa yae kuae oikuaa vaerä? ¿YandeYa omee pa kia oikuaa vaerä kuae mbaembae reta jare omombeu vaerä ïru vae reta pe? ¿Mbae jeko pegua pa tëtaguasu opa oyemboai, ñuu otini vae rupi mbaetɨ kia oasa vae rami opɨta regua?

¹³ YandeYa jei: “Opaete kuaekuae oasa, echa oeya reta cheporookuai reta amee chupe reta vae; mbaetɨ oendu jare mbaetɨ oyapo reta.

¹⁴ Oyapo reta ipɨa jemimbotaño jare omboete reta tumpa-raanga Baal reta, tu reta omboe jese rami.

¹⁵ Jáeramo, che peYa Imbaepuere yae ete vae, Israel iTumpa, jae: Ameeta jou reta mbae iro yae vae jare ameeta oɨu reta ɨ oyemombayachigüe re.

¹⁶ Opata amoai reta, kerupi ïru tëtaguasu reta oikuaambaea rupi, tu reta ave mbaetɨ oikuaa vae rupi; jare amondota ayukauka vaerä kɨsepuku pe opaetei okañɨtei regua.”

Yaeo reta Jerusalén pe

¹⁷ YandeYa Imbaepuere yae ete vae jei: “¡Peekauka kuña yaeo regua reta, jare toyogüeru!”

¹⁸ Jare opaete vae reta jei: ¡Toyogüeru jarembae toyaeo oreré; toyepɨyere yanderesaɨ reta, tiñákɨti yanderesakua!

¹⁹ Echa Sión güi oyeendu ñee yaeo reve vae körai: ¡Maera pa ko opa yayemboai! ¡Ñemomarai tuichagüe yaiporara! Yaeyata ko yandeɨvɨ, echa yandero reta opa oyemboai.

²⁰ Kuña reta, peyeapɨsaka yandeYa iñee re, peendu iñemoñee: Pemboe toyaeo pememɨkuña reta jare pevɨa-ïru reta körai:

²¹ “Mano ou oike yandero pe, oyuka michia reta kaye pe jare taɨrusu reta oka guasu pe.

²² Kuimbae reta jëogüegüe oñemoai tepoti rami kaa rupi, trigo oyepoo yave osururu ɨvɨ rupi vae mbaetɨ ye kia omonoo vae rami.” Jei yandeYa.

Tumpa regua oikuaa vae oyemboete

²³ YandeYa jei körai: “Agüɨye yarakuaa vae toyemboete iyarakuaa re, jäta ngatu vae ave agüɨye toyemboete jäta ngatu re, jare oikokatu vae agüɨye toyemboete imbaeyekou reta re.

²⁴ Ërei ngatu toyemboete kuae re oipota oyemboete vae: Toyemboete chekuaa vae re. Che ko jae Tumpa ayapo mboroparareko vae, morojäa jare aporombojupi ɨvɨ pe vae; echa kuaekuae reta aipota. Che ndeYa jae kuae.”

²⁵ YandeYa jei: “Oväeta ara aiporarauka vaerä opaete oyembocircuncida vae reta pe, itumpa-raanga pota vae reta pe:

²⁶ Egipto pe, Judá, Edom, Amón jare Moab, jare opaete ñuu rupi yogüɨreko vae, iñäka-ɨke oñapi vae reta pe. Echa opaete kuae tëtaguasu pegua reta itumpa-raanga pota vae ko, jökoraiño vi Israel pegua reta ipɨa pe.”