JEREMÍAS 8 - Biblia Guarani Tumpa Iñee

¹ YandeYa jei: “Jókuae ara tɨvɨa reta güi oñerenoeta mburuvicha guasu reta jare tenondegua reta Judá pegua ikägüegüe, sacerdote reta, ñeemombeúa reta jare Jerusalén pegua reta ikägüegüe,

² jare omoai retata ikatu rupi kuaraɨ pe, yasɨ pe jare opaete yasɨtata jae reta omboetese jare oyeokuaise chupe vae pe. Mbaetɨ eteita kia omonoo oñotɨ vaerä. Oñemoaita ñogüɨnoi ɨvɨ re tepoti rami.

³ Jókuae ñemuña reta jeko kavimbae güi jembɨregüe, kerupi che amoaia rupi ñogüɨnoia pe oeka eteita omano vaerä. Che ndeYa Imbaepuere yae ete vae, jae kuae.

Israel oiporara

⁴ Nde, Jeremías, emombeu opaete vae pe kuae ñee jae vae, körai: ‘Kia ogüɨapi yave, opüa ye ko; ani kia opia tape güi yave, ojo ye opia chugüía kotɨ.

⁵ Jayave Israel, ¿maera pa mbaetɨ chemboete? Jerusalén, ¿maera pa reyembopɨapochɨ jekuae avei, jare mbaetɨ reipota reyerova ye chekotɨ?

⁶ Ayeapɨsaka avei aiko, ërei mbaetɨ kia ave aendu oyembopɨambuae jeko kavimbae güi jare jei: ¿Mbae pa ko ayapo? Opaete vae ojo jape rupi ae ae, kavayu osɨi ñeraroa kotɨ rami.

⁷ Güɨratï oikuaa ketɨ ojo vaerä iara pe. Pɨkasui jare tapérai ani ärakua oikuaa kërai yave ojo vaerä ïkotɨa. Ërei nde tëta chembae, mbaetɨ reikuaa cheporookuai reta.

⁸ ¿Kërai pa pepuere pere peyeupe: Yandearakuaa yae ko, oime ñanoi yandeYa iporookuai reta? ¡Ërei mborookuai re oporomboe vae reta güɨrova ko jókuae mborookuai reta apu pe!

⁹ Ërei jókuae yarakuaa yae vae reta oñemomichita opɨta, okɨɨye yae retata, mɨmba ñuai pe oï vae rami. Güɨröɨro reta cheñee yave, ¿ketɨ pa oime oï iyarakuaa?

¹⁰ Jáeramo, jae reta jembireko ameeta ïru kuimbae reta pe, jare iko reta ameeta imoamɨría reta ipo pe. Echa michia güive okuakuaa vae pe, iyeupeguaräño imbaepotarai yae reta; ñeemombeúa reta jare sacerdote reta ave, opaete oporombotavɨ vae reta ko.

¹¹ Chembae vae reta ombopɨakatu vaerä jei reta, opaete mbae jaekavi ko oï, mbaetɨ tëi ikavi oï reve.

¹² ¡Jae reta imarata tëi ko kuae oyapogüe re, jókuae che mbaetɨ ma aropɨa vae! Ërei mbaetɨ, ¡mbaetɨ oikuaa imara vaerä kërai ave yepe! Jáeramo, aiporarauka chupe reta yave, ïru reta rami opata oa. Che ndeYa jae kuae.’ ”

¹³ YandeYa jei: “Tëta chembae vae ayasɨata trigo opa oyeasɨa rami. Ngaraa opɨta uva ave uva jäka re, ɨva ave mbaetɨta ɨva jäka re. Jaeño opɨtata joo ipirugüe.”

¹⁴ Opaete vae reta jeita: “¿Maera pa yaguapɨño ñaï kuae pe? ¡Yaja opaete vae tëta guasu oñekëse kavía pe, joko pe opa ñamano! Echa yandeYa Tumpa yandeyukata; omee yau ɨ oyemombayachigüe. Echa yandeyoa ikotɨ.

¹⁵ Ñaäro tëi mbɨakatu, ërei mbaetɨ etei mbae nunga ikavigüe oväe yandeve; ñaäro tëi yakuera katu yae vaerä, ërei kɨɨyeño oväe yandeve.

¹⁶ ¡Ou ma tovaicho! ¡Dan peve oyeendu ma ikavayu reta iñäpɨgua omoñee vae! Ikavayu reta iñee pe, omokana opaete ɨvɨ. Yogüeru omboai vaerä ɨvɨ jare opaete pɨpegua, tëta guasu reta jare opaete yogüɨreko pɨpe vae.”

¹⁷ YandeYa jei: “Ambouta peve mboi reta imbayachi yae vae, imbaekuaa vae mbaetɨta ipuere jese reta vae; jókuae mboi reta pesuuta.”

Jeremías ipɨatɨtɨ Judá jare Jerusalén re

¹⁸ Chepɨatɨtɨ yae jeko pegua, chepɨa omano.

¹⁹ Mase, cherëtaɨgua reta jäse oyeendu opaete kuae ɨvɨ pe körai: “¿Mbaetɨ ma ra oï yandeYa Sión pe? ¿Mbaetɨ ma ra Juvicha guasu oï joko pe?” Jare yandeYa Jei: “¿Maera pa chemboarasɨuka tumpa-raangarä peñopa kavi peyapo vae rupi, jókuae tumpa-raanga mbaetɨ mbaerä osirive vae jare peikuaambae vae rupi?”

²⁰ Oasa maetɨ iara, oasa mbaarɨvo, ërei oreve mbaetɨ mbɨakatu.

²¹ Aiporara yae, cherëtaɨgua reta oiporara ramo; chembopɨatɨtɨ yae jare akɨɨye yae aï.

²² ¿Mbaetɨ ra mbae nunga moa yepe Galaad pe? ¿Mbaetɨ ra kia oporopoano vae joko pe? Jayave, ¿maera pa mbaetɨ okuera cherëtaɨgua reta?