JEREMÍAS 7 - Biblia Guarani Tumpa Iñee

Jeremías oñemoñee tupao guasu pe

¹ YandeYa jei Jeremías pe, körai:

² “Eñeñono che ndeYa itupao jöke pe, jare joko pe emoërakua kuae ñee, körai: Opaete Judá pegua, kuae öke rupi peike pemboete vaerä yandeYa vae reta, peyeapɨsaka yandeYa iñee re.

³ Körai jei yandeYa Imbaepuere yae ete vae, Israel iTumpa: ‘Peñono kavi pereko jare peñeñono kavi ikavimbae peyapo vae güi, jare amaeñota peiko kuae ɨvɨ pe.

⁴ Agüɨye perovia jókuae oporombotavɨ vae reta re. ¡YandeYa itupao ko kuae, ngaraa maratu yaasa!, jei vae reta re.

⁵ Ërei peñono kavi pereko reta jare peñeñono kavi ikavimbae peyapo vae reta güi yave, jare peyapo yave jupi vae oyoupe perapicha reta ndive,

⁶ jare mbaetɨ peyuvanga ketɨgua re, tɨ̈reɨ re jare imemano vae re yave, ani kuae ɨvɨ pe ave mbaetɨ jekombae peyuka yave, ani jókuae tumpa ambuae reta mbaetɨta ikavi peve vae mbaetɨ pemboete yave,

⁷ ameeta peikoño vaerä jekuae avei pegua kuae ɨvɨ pe, peñemuñagüe reta pe amee vae pe.

⁸ Ërei, pe reta perovia katu yae ñee reta apu pegua re, jókuae mbaetɨ pemboyekou vae re.

⁹ Pemaeñomi, peporoyuka, peyuvanga menda re, peñererökuavee jaanga, peapɨ ikäti kavi vae incienso Baal pe, jare pemboete tumpa ambuae mbaetɨ peikuaa vae reta.

¹⁰ Javoi peyu kuae o cheree oñeenɨia pe peñeñono cheróvai. ¿Perovia pa jaekavi peiko jökorai, perovia pa jaekavi peyapoño vaerä jókuae ikavimbae reta mbaetɨ aropɨa vae?

¹¹ ¿Kuae o cheree oñeenɨi pɨpe vae, peve jae pa ko imonda vae reta iñemía? Opaete jókuae che aecha ko. Che peYa jae kuae.

¹² Pekua añave Silo pe, tenonde ete cheree oyemboetea pe, jare pemae jese, kërai ikavimbae ayapo chupe, tëta Israel chembae vae ikavimbae oyapo vae jeko pegua.

¹³ Añave che peYa jae: Opaete kuaekuae reta peyapo jeko pegua; pomomiari tëi iyɨpɨ güive chekueraimbae reve, ërei mbaetɨ peendu; poenɨi tëi, ërei mbaetɨ pemboyevɨ cheve ñee.

¹⁴ Jáeramo, ayapota vi kuae o cheree oñeenɨi pɨpe vae pe, Silo pe ayapo rami; kuae pe reta perovia katu jese vae, che amee peve jare peñemuñagüe reta pe vae.

¹⁵ Pomombota cheyeugüi, opaete perëtara reta Efraín iñemuña amombo rami.’

Judá oiporara ipɨapochɨ jeko pegua

¹⁶ Nde, Jeremías, agüɨye eyerure kuae tëta re, agüɨye ndepɨatɨtɨ ikotɨ reta reve chemoñera. Echa ngaraa ayeapɨsaka nderé.

¹⁷ ¿Remaeä pa jae reta kërai mbae oyapo tëta guasu reta ɨvɨ Judá pe, jare kaye reta Jerusalén pegua rupi vae re?

¹⁸ Michia reta güeru yepea tu pe jare tu reta oyatapɨ, kuña reta omboípɨu trigokúi mbɨyaperä omee vaerä mbota tumpa-raanga ara pegua Mburuvicha kuña pe oenɨi jae reta vae. Omee reta vi mbota vino oyepɨyere vae tumpa ambuae reta pe, chemboarasɨuka vaerä.

¹⁹ ¿Cheño ra chemboarasɨuka reta? Mbaetɨ ko, jae reta aeño ko teko oyapo iyeupe oñemomarai vaerä. Che ndeYa jae kuae.

²⁰ Jáeramo che peYa, aitɨta chearasɨ kuae tupao re, jare opaete tëta ipo reta re, jökoraiño vi mɨmba reta re, opaete ɨvɨra reta re, jare opaete temitɨ reta re. Mbae ókai vae mbaetɨ kia ipuere ombogüe vae ramita.”

²¹ Körai jei yandeYa Imbaepuere yae ete vae, Israel iTumpa, imbae vae reta pe: “Pemee jeta mɨmba oyeyukagüe opaetei oyeapɨ vae jare mɨmba oyeyuka vae pepuere rupi, jare peu jókuae isoogüe.

²² Echa che mbaetɨ etei ko ayókuai peñemuñagüe reta mɨmba oyeyukagüe opaete oyeapɨ vae re, ani mɨmba oyeyuka vae re, jókuae ara Egipto güi anoe reta yave.

²³ Jaeño ayókuai reta oendu katu vaerä cheñee; echa jökorai yave che aikota iTumparä jare jae reta yogüɨrekota chembae retarä. Ayókuai vi yogüɨreko vaerä che ayókuai rami, ikavi yogüɨreko vaerä.

²⁴ Ërei ngatu mbaetɨ oendu reta, jare mbaetɨ oyapo reta che jae vae, jaeño oyembopɨa täta yae reve yogüɨreko ipɨa jemimbota rupiño. Oyerova vaerägüe chekotɨ, ikupeño omee reta cheve.

²⁵ Peñemuñagüe reta Egipto güi ñogüɨnoe güive añave regua, che ambou avei peve opaete cherembiokuai ñeemombeúa reta.

²⁶ Ërei ngatu pe mbaetɨ peyapo che jae peve vae, jaeño peyembopɨa täta oasa ete ye peñemuñagüe reta güi.

²⁷ Nde Jeremías, ere opaete kuaekuae reta, yepe tëi mbaetɨ oendu reta ndeve; esapúkai, yepe tëi mbaetɨ mbae jei reta ndeve.

²⁸ Ere körai: ‘Jae ko kuae tëtaguasu mbaetɨi oyapo iYa Tumpa jeigüe vae, mbaetɨ vi oipota oyeapo kavi. Jupi rupi yogüɨrekose vae opa okañɨ chugüi.’ ”

Tumpa-raanga regua mbaemboete Jerusalén pe

²⁹ ¡Jerusalén, eyasɨa ndea, javoi emombo! ¡Etairari tairari mbɨatɨtɨ pegua pe ɨvɨtɨ jaambae re! Echa yandeYa iyarasɨ yae oï tëta jae imbae vae kotɨ, güɨröɨro jare oeya.

³⁰ YandeYa jei: “Judá pegua reta oyapo ikavimbae cheróvai; oñono reta itumpa-raanga aröɨro yae vae chero pe, jökorai chero omongɨa reta.

³¹ Jare ɨvɨtɨ päu ipe kavía Ben-hinom jee vae pe omopüa reta mbota reta oyeapɨ jese vae Tofet, jese oapɨ reta vaerä taɨ reta ani tayɨ reta, che mbaetɨ etei ayókuai jese reta vae, mbaetɨ vi kërai ave yepe ayemongeta jese vae.

³² Jáeramo che peYa amombeu peve, oväeta kuri ara mbaetɨ vaerä ma oñeenɨi Tofet ani ɨvɨtɨ päu ipe kavi vae Ben-hinom, jaeño oñeenɨita Ɨvɨtɨ päu ipe kavi vae Yeyuka Renda. Jare Tofet pe oñeotɨta omanogüe, mbaetɨ ma jendarä jeko pegua.

³³ Kuae tëta pegua omanogüe reta jëogüegüe chucha reta jembiurä ko, jare mɨmba pochɨ vae ñana rupigua jembiurä; mbaetɨta kia omondo chugüi.

³⁴ Amokañɨta Judá pegua tëta guasu reta güi jare kaye reta Jerusalén pegua güi, tairari yerovia katu arete pegua reta, jare tairari menda pegua reta; opaete kuae ɨvɨ oyemboaita opɨta.”