JEREMÍAS 52 - Biblia Guarani Tumpa Iñee

Sedequías mburuvicha guasurä oiko vae regua

¹ Sedequías güɨnoi veintiún año yave omboɨpɨ oiko mburuvicha guasurä, once año oiko mburuvicha guasurä Jerusalén pe. Ichɨ jee Hamutal; jae ko Jeremías, Libna pegua tayɨ.

² Ërei oyapo ikavimbae yandeYa jesa róvai, Joacim oyapo rami etei.

³ Jáeramo yandeYa iyarasɨ Jerusalén jare Judá kotɨ, opa omoë omombo iyeugüi regua. Jaɨkue rupi Sedequías oñemopüa mburuvicha guasu Babilonia pegua re.

Jerusalén oa vae regua

⁴ Sedequías chau año ma oiko mburuvicha guasurä yave, payandepoa yasɨ, payandepo araa pe, Nabucodonosor mburuvicha guasu Babilonia pegua ou opaete isundaro reta ndive oporepeña Jerusalén re jare opa oñova. Oyembojeyupa reta jare omopüa reta ɨvɨ yeupikarä jókuae tëta guasu iyɨ́vɨri rupi.

⁵ Jare tëta guasu oñeova oiko Sedequías onse año oiko mburuvicha guasurä yave regua.

⁶ Irundɨa yasɨ chau araa pe, jókuae año re karuai jeiete yae ma jókuae tëta guasu pe, mbaetɨ ma oime tembiurä jókuae tëta pegua reta pe.

⁷ Jayave oipea reta japerä tëta guasu ikësea rupi, yepe tëi Caldeaɨgua reta oñova güɨnoi, mburuvicha guasu jare opaete sundaro reta ndive otekuarai tëta guasu güi pɨ̈tu yave. Ñogüɨnoe reta öke tëta guasu ikësea mókoi oyóvai ñogüɨnoi vae ipäu pe oï vae rupi mburuvicha guasu iko raɨ rupi, jare mburuvicha guasu ojo tape Arabá kotɨ ojo vae rupi.

⁸ Ërei ngatu sundaro reta Caldeaɨgua oaɨkuemoña mburuvicha guasu Sedequías, jare oupitɨ reta ɨvɨpe kavi Jericó pegua pe. Jare opaete isundaro reta oeya.

⁹ Oipɨɨ reta jare güɨraja mburuvicha guasu Nabucodonosor jóvai, Ribla pe jae oïa pe, ɨvɨ Hamat pe. Joko pe Nabucodonosor jei Sedequías kotɨ kërai oiporarauka vaerä chupe.

¹⁰ Jare jovakei taɨ reta opa oñaseokɨ̈ti, jare opaete Judá pegua mburuvicha reta.

¹¹ Ërei mburuvicha guasu Babilonia pegua opa güɨnoeuka Sedequías güi jesäɨ, jare oipokua reta karena pe güɨrajauka Babilonia kotɨ, joko pe oñono reta tembipɨɨrɨru pe omano regua.

Tupao oyemboai

¹² Nabucodonosor mburuvicha guasurä oiko Babilonia pe diecinuevea año, pandepoa yasɨ, payandepo araa pe yave, Nabuzaradán, sundaro omaeäro vae reta juvicha, ou oväe Jerusalén pe

¹³ jare oapɨ yandeYa itupao, mburuvicha guasu jo jare opaete o reta Jerusalén pegua; opaete o tuichagüe reta;

¹⁴ jare opaete sundaro Caldeaɨgua reta yogüeru jókuae sundaro ruvicha ndive vae, güɨroyere ombosururu reta Jerusalén ikësea.

¹⁵ Javoi Nabuzaradán güɨraja Babilonia kotɨ paravete vae reta jare opaete opɨtagüe, jare oñemee mburuvicha guasu Babilonia pegua ipo pe vae, jare opaete tëta pegua reta.

¹⁶ Jaeño oeya reta amogüe paravete yae vae reta, oparavɨkɨ reta vaerä uvarupa pe jare kó pe.

¹⁷ Caldeaɨgua reta opa oyoka okɨta reta tupao pegua, ɨrɨru iguapɨka reta, ɨrɨru tuichagüe jiero iyu vae pegua reta; jare opaetei güɨraja reta Babilonia pe.

¹⁸ Güɨraja reta vi tanimbu oyemombo pɨpe vae reta jare sɨpe reta, mechero imecha oyeasɨa pɨpe vae tenasa reta, tasa guasu reta jare kuchara guasu reta, jare opaete tembiporu reta jiero iyu vae pegua mbaemboetea pe oyeporu vae.

¹⁹ Jökoraiño vi sundaro omaeäro vae reta juvicha opa güɨraja mbaembae oro pegua jare korepoti pegua: Tätapɨi jɨru reta, tasa guasu reta, kopa reta, yapepo reta, mechero jenda reta, ñae reta, tasa reta.

²⁰ Mókoi reve okɨta jare ɨrɨru tuicha vae, jare igüɨ pegua doce toro iä reta, jare ɨrɨru iguapɨka reta jiero iyu vae pegua, Salomón oyapouka tupao peguarä vae; opaete kuaekuae ipoɨgüe mbaetɨ yandepuere yaikuaa.

²¹ Metei ñavo okɨta güɨnoi ocho metro oasa ɨvategüe jare cinco metro oasa ye jete yapuagüe; iyɨvɨte igüɨrusu jare yandambusugüe chiu centímetro.

²² Okɨta ñavo iyapɨte re güɨnoi omopöra vae jiero iyu vae pegua, mókoi metro ɨvategüe, ikupe rupi güɨnoi pɨsa rami oñeope vae jiero iyu vae pegua, omopöra reve granada ia iä pe. Mókoi reve okɨta oyovake.

²³ Pɨsa rami oñeope vae ñavo re oï cien granada ia iä, jókuae reta güi oyekuaa oï vae, jae ko noventa y seis.

Judáɨgua reta oyereraja iɨvɨ güi ïru ɨvɨ pe

²⁴ Sundaro omaeäro vae reta juvicha oipɨɨ vi Seraías, sacerdote tenondegua, jare Sofonías, sacerdote jaɨkuegua jare mboapɨ tupao joka järoa reta.

²⁵ Oipɨɨ vi tëta guasu pe sundaro reta juvicha, jare chiu oporomboarakuaa mburuvicha guasu jo pe vae reta, jare tenondegua ete ombaekuatía vae, sundaro reta jee omoapɨta vae, jare sesenta kuimbae oñeväe tëta guasu pe vae.

^26-27 Nabuzaradán, sundaro omaeäro vae reta juvicha, opa oipɨɨ jare güɨraja mburuvicha guasu Babilonia pegua jóvai Ribla pe, ɨvɨ Hamat pe. Joko pe mburuvicha guasu Babilonia pegua omee opa vaerä oyeyuka. Jökorai Judá pegua reta opa oyereraja iɨvɨ güi.

²⁸ Nabucodonosor opa oipɨɨ güɨraja vae reta jae kuae: Chiúa año ma oiko mburuvicha guasurä yave, güɨraja tres mil veintitré Judá pegua reta;

²⁹ dieciocho año ma oiko mburuvicha guasurä yave, oipɨɨ güɨraja ochociento treinta y dos Jerusalén pegua reta;

³⁰ jare Nabucodonosor veintitré año ma oiko mburuvicha guasurä yave, Nabuzaradán güɨraja seteciento cuarenta y cinco Judá pegua reta; jae ko opaete reve cuatro mil seisciento iɨvɨ güi oyererajagüe reta.

Joaquín iyeyora jare imboetea yae Babilonia pe vae

³¹ Joaquín mburuvicha guasu Judá pegua oyereraja ma iɨvɨ güi treinta y siete año, docea yasɨ veinticinco araa pe yave, Evil-merodac omboɨpɨ oiko mburuvicha guasurä Babilonia pe; jae ipɨakavi Joaquín pe jare güɨnoe tembipɨɨrɨru güi,

³² ipɨakatu reve omomiari, jare omboeteuka ïru mburuvicha reta ñogüɨnoi Babilonia pe vae pe.

³³ Jökorai, Joaquín güi omboiuka jemimonde tembipɨɨrä oï yave omonde vae, jare okaru mburuvicha guasu ndive opaete ara oikove oiko ramboeve.

³⁴ Omboresive avei vi mburuvicha guasu Babilonia pegua güi korepoti, opaete ara oikove oiko ramboeve, omano regua.