JEREMÍAS 51 - Biblia Guarani Tumpa Iñee

YandeYa iporojäa Babilonia kotɨ

¹ YandeYa jei: “Ambouta ɨvɨtu oporomboai vae, Babilonia kotɨ jare pɨpegua reta oyemboyovaicho chekotɨ vae kotɨ.

² Ambouta Babilonia pe, jovaicho reta oyapo vaerä chupe, trigo ipire omboveve ɨvate vae reta oyapo rami; jare iɨvɨ opaeteita oitɨvɨro. Echa oväeta ara kañɨtei pegua, oporepeñata jese oipota rupi güi.

³ Ayokuaita oikatu uvɨ ojäa vae reta, omoata kavi vaerä igüɨrapa, jare toyemonde jete regua temimonde ñeraro pegua reta pe: ¡Agüɨye poiparareko Babilonia pegua taɨrusu vae reta, opa pemokañɨtei isundaro reta!

⁴ Opaete Caldeaɨgua reta omanota iɨvɨ pe, oyoata opɨta kaye reta rupi,

⁵ echa yepe tëi Israel jare Judá iyoa chekotɨ, omotɨnɨe iɨvɨ mbaeyoa pe, ërei che, iYa Imbaepuere yae ete vae, iYoambae Israel pegua, mbaetɨ aeya reta.

⁶ ¡Petekuarai Babilonia güi! ¡Peroasayepe perekove! ¡Agüɨye pemano jae iyoa jeko pegua! Echa oväe ara aiporarauka vaerä, aiporaraukata chupe jeko oï rupi.

⁷ Babilonia, kopa oro pegua rami ko chepo pe yepi, ombosavaɨpo opaete ɨvɨ pegua reta vae. Tëtaguasu reta oɨu jókuae vino re, javoi yarakuaambae opɨta reta.

⁸ Ërei güɨramoiño Babilonia oa, opa oyemboai. ¡Peäpiro! Peru chupe moa ipere peguarä, güɨramoi okuera.”

⁹ Roipoano tëi ma Babilonia, ërei mbaetɨ okuera. ¡Peeya! Yaja mo kuae güi, metei ñavo yandeɨvɨ ae ae pe, echa ikavimbae oyapogüe ojoi oväe ara pe, oupitɨ amapɨtu.

¹⁰ YandeYa omboyekuaa jupi vae yandeve. Peyu, yaja ñanemiari Sión pe yandeYa Tumpa oyapogüe re.

¹¹ ¡Peyapo katu peruvɨ reta! ¡Peyokua kavi yeopiaka reta peyɨva re! YandeYa omokɨ̈reɨ mburuvicha guasu reta Media pegua; echa omboaita Babilonia, jae kuae yandeYa iara oiporarauka vaerä, itupao pe oyapo vae re.

¹² ¡Peupi bandera peporepeña vaerä Babilonia ikësea re! ¡Pemoïru omaeäro vae reta! ¡Peñono kavi oporoäro vae reta! ¡Peñemi kavi pekätɨro! Echa yandeYa ombopota iyemongeta reta omoërakua Babilonia pegua reta kotɨ vae.

¹³ Nde, Babilonia, ɨ̈aka reta ipäu pegua, jare jeta ndembaeyekou vae. ¡Oväe ma ndeve ndeapɨ vaerä! ¡Oväe ma iyapɨ vaerä ndembaepotarai!

¹⁴ YandeYa Imbaepuere yae ete vae jei iyé ae: “¡Romotɨnɨeta tovaicho reta pe, tuku jeta yae rami, jae reta osapukaita nderé, nemoamɨri yave!”

Tairari mbaemboete pegua Tumpa pe

¹⁵ YandeYa imbaepuere pe oyapo ɨvɨ; oñono kavi ɨvɨ iyarakuaa katu rupi; oipɨso ara iyarakuaa kavi yae rupi.

¹⁶ Iñee rupi jɨapu ɨ jetagüe ɨvate ara pe, omboyeupi amapɨtu ɨvɨ iyapɨ kotɨ güi, ombou ama-vera okɨ yave, jare güɨnoe ɨvɨtu oñeovatúa güi.

¹⁷ Yarakuaambae ko opaete kuimbae reta. Imara opaete tumpa-raanga reta iyapoa, echa jembiapo reta yembotavɨ ko, mbaetɨ jekove.

¹⁸ Jaangaño ko, mbaeä etei ko, yandeYa iporojäa iara pe, opaeteita omboai.

¹⁹ Ërei, ¡ambuaeyee ko chugüi reta Jacob iTumpa, opaete mbaembae iYapoa! Jae oiparavo imbaerä Israel. YandeYa Imbaepuere yae ete vae; jókuae jae ko jee.

Babilonia tembiporu mbaeporara pegua yandeYa pe

²⁰ “¡Babilonia, nde ko jae chemartillo rami, cherembiporu ñeraro pegua rami! nde rupi amboai tëtaguasu reta, nde rupi amboai mborookuaía reta.

²¹ Nde rupi amokañɨtei kavayu reta jare kavayu regua reta, käretou ñeraro pegua jare imboguataa reta.

²² Nde rupi amokañɨtei kuimbae jare kuña reta, ndechi reta jare taɨrusu vae reta, kunumi reta jare kuñatai reta.

²³ Nde rupi amokañɨtei vecha iyangarekoa reta jare vecha reta, ko pe oparavɨkɨ vae reta jare güeye reta, tëta iyangarekoa reta jare mburuvicha guasu iyɨvɨrigua reta.

Babilonia oiporara

²⁴ Ërei perovake amboepɨukata Babilonia pe, opaete Caldeaɨgua reta pe, ikavimbae oyapo reta Sión pe vae re. Che peYa ko jae kuae.

²⁵ Che añemopüa ndekotɨ, ɨvɨtɨ guasu oporomboai vae; reporomboai opaete ɨvɨ rupi vae. Che peYa ko jae kuae. Amopüata chepo aiporarauka ndeve vaerä, rombotokororota roitɨ ɨ̈vavira güi, jare roeyata ɨvɨtɨ okaigüe rami.

²⁶ Metei ave ndeita osururugüe mbaetɨta osirive o iguapɨkarä, echa ipombae opɨtata jekuae avei pegua. Che peYa ko jae kuae.

²⁷ ¡Peupi bandera ñeraro pegua tëtaguasu pe! ¡Pemoñee mimbɨguasu, toyeapo katu tëtaguasu reta oporepeña vaerä Babilonia re! ¡Pepüa ikotɨ mborookuaía reta Ararat pegua, Mini pegua jare Askenaz pegua! ¡Pembojee metei sundaro ruvicha oporogüɨraja vaerä ñeraro pe! ¡Pemondo tenonde kavayu regua reta, tuku reta pochɨ yae vae rami!

²⁸ Peyupavo tëtaguasu reta peporepeña vaerä; jare mburuvicha guasu reta Media pegua, sundaro ruvicha reta jare mburuvicha guasu iyɨvɨrigua reta, jare opaete ɨvɨ ñogüɨnoi reta ipo pe vae reta.”

²⁹ Ɨvɨ okana jare orɨrɨi, echa yandeYa ombopo oï iyemongeta oeya vaerä ipombae Babilonia, mbaetɨ yeta kia oiko pɨpe.

³⁰ Sundaro jëia vae reta Babilonia pegua mbaetɨ ma oñoraro, oñepɨ̈ro reta iñemika pe; mbaetɨ ma ipuere reta, kuñaecha opɨta reta. Jo reta opa oyeapɨ, jöke reta imotätaa opa oyeakɨo.

³¹ Oyoaɨkue yoaɨkue oväe tupapire jare ñee jerajaa reta, omombeu vaerä mburuvicha guasu Babilonia pegua pe, jëta guasu opaetei ma oñepɨ̈ro vae.

³² Tovaicho reta opɨ̈ro tape reta ɨ̈aka tɨpɨmbaea, ñepɨ̈roka reta opa oapɨ reta, jare sundaro reta okɨɨye yae.

³³ Echa yandeYa Imbaepuere yae ete vae Israel iTumpa jei körai: “¡Babilonia, mbaembopiriría renda pe mbae oyembopiririta ma vae rami ko, oväeta ete ma iara oyepoo vaerä!”

^34-35 Jerusalén, Sión pegua tëta guasu jei: “Nabucodonosor, mburuvicha guasu Babilonia pegua, chembojaɨ jaɨ jare opa chemókoi; chereeya metei vaso ipombae rami. Mbaeporou ɨguasu rupigua rami chereu; oñemoɨ̈vɨata, oyúe yae chegüi vae pe, jare cherembɨregüe omombo. ¡Toiporara Babilonia, ikavimbae oyapo cheve vae re! ¡Caldeaɨgua reta toiporara oyuka chegüigüe reta re!”

Morogüɨrökuavee Israel peguarä

³⁶ YandeYa jei: “Che ayapota ndeve jupi vae, aiporaraukata nderovaicho reta pe. Opaeteita ambondɨpa Babilonia güi ɨ̈aka reta jare ɨesaɨ reta.

³⁷ Babilonia opɨtata tëtagüerä, aguarayaɨmba reta jëtarä, jare ipombae opɨtata, opaete vae opukata jese jare okɨɨyeta.

³⁸ Opaete jae reta oñeeta yaguapope reta rami, oñeeta yaguapope raɨ reta rami.

³⁹ Jakuvo ma yave, ameeta jou mbae oporombosavaɨpo vae, osavaɨpo yae vaerä. Jökorai oketa jekuae avei pegua, ngaraa ye ma okuera. Che peYa ko jae kuae.

⁴⁰ Javoi arajata mbaeyukaa pe, vecha kuimbae taɨrusu vae reta, vecha kuimbae reta jare kavara kuimbae reta oyereraja rami.”

Babilonia iñamɨri

⁴¹ ¡Babilonia, tëta guasu jërakua yae opaete ɨvɨ rupi vae, iñamɨri jare oñepɨ̈ro! ¡Opaete tëtaguasu reta oecha yave okɨɨye yae!

⁴² Ɨporu ou Babilonia re, iyɨaparúa tuichagüe pe opa oyasoi.

⁴³ Jëta guasu reta opa oyemboai, ɨvɨ otini jare ipombae opɨta, mbaetɨta kia oiko pɨpe, mbaetɨta vi kia oasa jupi.

⁴⁴ “Tumpa-raanga Bel amboaita Babilonia pe, anoeta iyuru rupi opa omokoigüe; ngaraa ye ma tëtaguasu reta yogüeru ikotɨ. ¡Babilonia ikësea reta osururuta!

⁴⁵ ¡Tëta chembae vae reta, peë joko güi, metei ñavo peroasayepe perekove, chearasɨ güi!

⁴⁶ Agüɨye peyembopɨtu, agüɨye pekɨɨye jërakua tëtaguasu pe vae güi. Año ñavo ambuaeyeeta mbae jërakua, oimeta teko ikavimbae ɨvɨ pe, jare ɨvɨ ruvicha reta oñorarota oyoupii.

⁴⁷ Jáeramo, oväeta ara amboai vaerä tumpa-raanga reta Babilonia pegua, kuae tëtaguasu oñemomaraiukata, jare tɨnɨeta tëogüe reta pe.

⁴⁸ Ara jare ɨvɨ, jare opaete oime pɨpe vae oyerovia yaeta Babilonia iñamɨri yave, echa ɨvɨtuguasu kotɨ güi yogüeruta imboaia reta. Che peYa ko jae kuae.

⁴⁹ Babilonia iñamɨrita ko, oyuka Israel pegua reta vae jeko pegua, jare opaete ɨvɨ pe oporoyuka vae jeko pegua.”

Ñee Judáɨgua reta ñogüɨnoi Babilonia pe vae peguarä

⁵⁰ Peasayepe mano güi vae reta, petekuarai pepɨtambae reve; jare yepe tëi mombɨrɨ peï, pemaendúa yandeYa re jare Jerusalén re.

⁵¹ Pe reta pere: “Oremara yae roï, echa roendu ikavimbae oyapo reta orekotɨ vae. Oremomaraiuka yae, echa ketɨgua reta oike, tupao ikɨambae yae vae pe.”

⁵² Ërei yandeYa jei: “Oväe ara amboai vaerä tumpa-raanga reta Babilonia pegua, jare opaete iɨvɨ rupi jäseta ipere vae reta.

⁵³ Yepe tëi Babilonia oyeupi ara pe, güɨnoi vaerä iñemika jëguambae, joko pe ambouta chupe oporomboai vae reta. Che peYa ko jae kuae.”

Babilonia oyemboai

⁵⁴ Babilonia pe jäse vae oyeendu, Caldeaɨgua reta iɨvɨ pe susere oyeendu.

⁵⁵ Echa yandeYa ko omboai Babilonia, omboapɨ chugüi iyembotuicha reta. Tovaicho reta ɨaparúa oñaro rami, jɨapu yae reve oa jese.

⁵⁶ Yogüeru omboai vaerä Babilonia; oipɨɨ ma isundaro jëia vae reta, jare opa ma omopë mopë chugüi igüɨrapa reta. Echa yandeYa Tumpa ko omee metei ñavo pe jeko oï rupi.

⁵⁷ Mburuvicha guasu, yandeYa Imbaepuere yae ete vae jei: “Ambosavaɨpota Babilonia pegua mburuvicha reta, iyarakuaa vae reta jare sundaro ruvicha reta, jare mburuvicha guasu iyɨvɨrigua reta jare sundaro reta; jökorai oketa jekuae avei pegua, ngaraa ye ma okuera.

⁵⁸ Che, peYa Imbaepuere yae ete vae, jae: Babilonia ikësea ipɨguasu yae vae opaeteita oyemboai, jare jöke tuicha yae vae reta opata oyeapɨ. Oparavɨkɨiño ma tëtaguasu pegua reta, oparavɨkɨiño ma opa ókai vaerä.”

Jeremías iñee güɨraja reta Babilonia peguarä

⁵⁹ Sedequías irundɨa año ma mburuvicha guasurä oiko Judá pe yave, ñeemombeúa Jeremías omondo tembikuatía Seraías, Nerías taɨ, Maasías jɨmɨmino ndive. Seraías ojo mburuvicha guasu Sedequías ndive Babilonia kotɨ yave; ojo jae ndive oyapo kavi vaerä teyupa, mburuvicha guasu oputuu ñavo.

⁶⁰ Jeremías yepe oikuatía metei tembikuatía pe opaete susere reta outa Babilonia re vae, jae ko opaete ñee reta oyekuatía oï Babilonia kotɨ vae,

⁶¹ jare jei Seraías pe: “Reo reväe Babilonia pe yave, emongeta kavi opaete kuae ñee reta.

⁶² Javoi ere: ‘CheYa Tumpa, nde ko rere opa vaerä remboai kuae tëta, mbaetɨ etei regua opɨta kia pɨpe, kuimbae ani mɨmba reta yepe, echa opaeteita remboai jekuae avei pegua.’

⁶³ Javoi opa remongeta yave kuae tembikuatía, eyokua jese ita, javoi emombo ɨ pe ɨ̈aka Éufrates pe,

⁶⁴ jare ere: ‘Köraita Babilonia ojo ɨ́vɨkotɨ, jare ngaraa ye ma opüa yandeYa ombouta omboai vae güi.’ ” Kuae pe Jeremías iñee reta iyapɨ.