JEREMÍAS 49 - Biblia Guarani Tumpa Iñee

Amón iñemuña reta maratuta vae regua

¹ YandeYa jei Amón iñemuña reta regua körai: “¿Mbaetɨ pa Israel iñemuña reta? ¿Mbaetɨ pa mbaembae iyarä vae reta? ¿Maera pa tumpa-raanga Milcom añave oyemombae Gad iɨvɨ re? ¿Maera pa Amón iñemuña reta yogüɨreko jëta guasu reta pe?”

² YandeYa jei: “Oväeta ara Amón iñemuña reta jëta guasu Rabá pe oyeendu vaerä sapúkai ñeraro pegua; oyepoepɨta tëtagüerä, jare pɨpegua tëta guasu reta opata oyeapɨ. Jayave Israel opɨ̈ro yeta jëta guasu reta oñepɨ̈ro chugüigüe. Che ndeYa ko jae kuae.

³ ¡Hesbón, eäpiro Hai, echa opa oyemboai! ¡Kuña reta Rabá pegua, peyaeo jasɨ katu reve! ¡Peyemonde temimonde mbɨatɨtɨ pegua pe! ¡Peñeäpiro, pembopere perete! Echa tumpa-raanga Milcom oyererajauka tembipɨɨ, isacerdote reta jare juvicha reta ndive.

⁴ ¿Maera pa reyembotuicha ndeɨvɨpe kavi re? Ndeɨvɨpe kavi opa ma oyemboai, tëta iñeereendumbae, rerovia katu mbaembae remboatɨgüe re, rere: ‘¿Kia pa oporepeñata cheré?’

⁵ Mase, oipota rupi güi aruta nderé rekɨɨye yae vaerä. Che, Tumpa Imbaepuere yae ete vae jae. Metei ñavo pegüi reta oëta otekuarai jape jape ae rupi, jare mbaetɨta kia omboatɨ ye otekuaraigüe reta.

⁶ Ërei jaɨkue rupi aru yeta tembipɨɨ güi Amón iñemuña reta. Che ndeYa ko jae kuae.”

Edom maratuta vae regua

⁷ YandeYa Imbaepuere yae ete vae jei Edom iñemuña reta regua körai: “¿Mbaetɨ ma pa arakuaa katu Temán pe? ¿Opa pa arakuaa katu iyarakuaa katu yae vae reta güi? ¿Oikomegua pa chugüi reta iyarakuaa katu?

⁸ ¡Dedán pegua reta, petekuarai, pekua peñemi kavi! Echa amboaita Esaú iñemuña reta jëta; oväe ma ara aiporarauka vaerä chupe.

⁹ Ombaepoo vae reta yogüeru uva oipoo yave, oeyaño amogüe uva iagüe; pɨ̈tu yave imonda vae reta yogüeru omaeñomi yave, güɨraja jókuae oipota vaeño.

¹⁰ Ërei che opaeteita aitɨvɨro Esaú jëta, aväeta iñemía reta, jare mbaetɨta ipuere oñemi. Iñemuña reta, jëtara reta jare jëta iyɨpɨ pegua reta, opaeteita okañɨtei; mbaetɨ eteita kia opɨta jei vaerä:

¹¹ ‘Peeya cheve tɨ̈reɨ reta, ayangareko jese vaerä. Imemano vae reta ipuere vi oyerovia chereño.’ ”

¹² YandeYa jei körai: “Jókuae jupi vae oiporara yave, nde mbaetɨ ko jupi köraiño repɨta vaerä, reiporara tai ko.

¹³ Che peYa, cheyé aeño arökuavee. Tëta guasu Bosra opɨtata ipombae, ñeerä jare yepopeyurä; jare opaete ïru jëta guasu reta oyemboaita opɨta jekuae avei pegua.”

¹⁴ YandeYa omombeu cheve, metei ñee jerajaa ojo opaete tëtaguasu reta pe jei vaerä: “¡Peyomboatɨ jare peporepeña Edom re! ¡Peyeapo katu ñeraro peguarä!

¹⁵ Mase, che pomomichi yaeta ïru tëtaguasu reta güi, peñereröɨrouka yaeta opaete vae reta pe.

¹⁶ Ndepɨayemboete pe reyembotavɨuka, jare ndepɨapochɨ pe. Reiko ɨ̈vavira ipäu rupi, jare ɨvɨtɨ guasu re. Ërei yepe tëi reñemoëta ɨvate güɨraké rami, joko güi rombogüeyɨukata. Che ndeYa ko jae kuae.”

¹⁷ “Edom opaeteita oyemboai. Opaete oasa jokoropi vae ipɨakañɨta jare oyóyai yoyaita oecha yave kuae susere reta,

¹⁸ echa opɨtata Sodoma jare Gomorra rami jare tëta guasu reta iyɨvɨrigua, opa oyemboai yave rami. Mbaetɨ yeta kia ou oiko pɨpe ani oasa jokoropi vae ave. Che ndeYa ko jae kuae.

¹⁹ Mase, ayuta metei yaguapope Jordán pegua kaa tëɨ yae vae güi oë ojo kapii jokɨ katu vae pe rami, joko güi ambotekuaraita Edom pegua reta, jare ameeta oporookuai che aiparavo vae. Echa ¿kia pa chemboyovake? ¿Kia pa oyemboɨta cheve? ¿Kia nunga vecha iyangarekoa pa ipuereta cheré?

²⁰ Peyeapɨsaka kërai che peYa ayemongeta Edom kotɨ vae re, jare kërai ko cheyemongeta Temán pegua reta kotɨ vae re: Vecha raɨ ave güɨraja retata jare kapiirupa opata oyemboai.

²¹ Edom jɨapu oa vae omokanata ɨvɨ; jɨapu ojota oyeendu Ɨguasu Pɨ̈ta vae pe.

²² Tovaicho reta oporepeñata Bosra re, güɨraké ipepo oipɨso kavi oporepeña rami, jókuae ara Edom pegua jëia vae reta orɨrɨita, kuña imembɨ oa oï vae rami.”

Damasco maratuta vae regua

²³ Damasco regua jei körai: “Tëta guasu Hamat jare Arfad pegua reta ipɨa jopa yae ñogüɨnoi, echa ñee ikavimbae ou oväe chupe reta. Ipɨakɨɨye yae ñogüɨnoi, mbaetɨ ipuere ñogüɨnoi pɨagüive.

²⁴ Damasco, otekuaraita tëi, ërei jëogüe. Ou jese kɨɨye jare mbɨatɨtɨ, orɨrɨi metei kuña imembɨ oa oï vae rami.

²⁵ Tëta guasu jërakua yae vae jare ovɨakatu vae, oyemombo opɨta.

²⁶ Jókuae ara itaɨrusu reta oyoata tëta joka guasu rupi, jare opaeteita omano ñeraro regua reta. Che, peYa Imbaepuere yae ete vae jae.

²⁷ Ayatapɨta Damasco ikësea re, jare jókuae tata oapɨta Ben-adad jo reta.”

Cedar jare Hazor maratuta vae regua

²⁸ YandeYa jei körai Cedar iñemuña reta regua jare Hazor pegua mburuvicha reta regua, jae ko Nabucodonosor mburuvicha guasu Babilonia pegua omoamɨri vae reta: “¡Pepüa, peporepeña Cedar re! ¡Opa pemokañɨtei jókuae ñemuña reta kuaraɨ oëa kotɨgua!

²⁹ Pepɨ̈ro jo reta guakapi pegua jare jɨmba reta, iasoya jare opaete jembiporu reta. Pepɨ̈ro chugüi icamello reta jare pesapúkai, pere: ‘¡Opaetei okɨɨye ñogüɨnoi vae!’

³⁰ ¡Hazor pegua reta, petekuarai! ¡Pekua peñemi kavi! Che, Tumpa ko jae. Echa Nabucodonosor, mburuvicha guasu Babilonia pegua, oyapo yemongeta ikavimbae pekotɨ.

³¹ Che, Tumpa ko ayókuai: ¡Pepüa, peporepeña jókuae tëtaguasu oiko pɨagüive jare oyerovia iyé vae re, jöke reta ave mbaetɨ jare imotätaa, jare jaeño etei oiko!

³² ¡Pepɨ̈ro chugüi icamello reta jare opaetei jɨmba reta! Opata amoai moai oipota rupi, jókuae kuimbae reta iñäka-ɨke oñapi vae; oipota rupi güi aruta chupe omokañɨtei vaerä. Che peYa ko jae kuae.

³³ Hazor ipombae jekuae avei pegua aguarayaɨmba oñemoëtata pɨpe, Mbaetɨ yeta kia ou oiko pɨpe, ani oasa jokoropi vae ave.”

Elam maratuta vae regua

³⁴ Sedequías omboɨpɨ oiko mburuvicha guasurä Judá pe yave, yandeYa jei Jeremías pe Elam regua körai:

³⁵ “Che, ndeYa Imbaepuere yae ete vae jae: Elam igüɨrapa reta amopëta, jae ko jókuae jembiporu iyeroviaka ete.

³⁶ Aruta ɨvɨtu kuae tëta Elam re, opaete ɨvɨ jembeɨ kotɨ güi, opa vaerä amoai moai oipota rupi, opaetei tëtaguasu reta rupi oimeta otekuaraigüe.

³⁷ Elam amborɨrɨiukata okɨɨye güi jovaicho reta jóvai, aruta chupe susere reta, aitɨta chearasɨ jese reta, jare ambouta chupe ñeraro opaetei omokañɨtei regua. Che ndeYa ko jae kuae.

³⁸ Cheporookuaía añonota Elam pe, amokañɨteita juvicha guasu reta jare mburuvicha reta. Che ndeYa ko jae kuae.

³⁹ Ërei metei ara, Elam pegua reta aru yeta iɨvɨ pe tembipɨɨrä yogüɨrekoa güi. Che ndeYa ko jae kuae.”