JEREMÍAS 47 - Biblia Guarani Tumpa Iñee

Filisteo reta maratuta vae regua

¹ YandeYa jei ñeemombeúa Jeremías pe filisteo reta regua, ndei Faraón omboai Gaza mbove:

² YandeYa jei körai: “Ɨvɨtuguasu kotɨ güi ou maemegua, ɨporu ou rami; opaeteita oyasoi ɨvɨ jare opaete pɨpegua reta, tëta guasu reta jare pɨpegua reta. Opaete tëtaguasu pegua reta jäse, jasɨ katu reve oyaeo reta.

³ Oendu yave kavayu reta ipɨ oyeendu, käretou reta ñeraro pegua opärara, jare iruera reta jɨapu, opaete kuimbae reta mbaetɨ oyangareko imichia reta re, echa opaetei ipɨa jëogüe reta.

⁴ Echa oväe ara filisteo reta okañɨtei vaerä, okañɨteita Tiro jare Sidón güi, imborɨarä opɨta vɨteriño vae.” YandeYa omboaita ko filisteo reta, ɨguasu jembeɨ Caftor kotɨ güi oyakavogüe reta.

⁵ Gaza pegua reta opa ia oñapiasɨ, jare Ascalón pegua reta kïrii ngatu opɨta. Pe reta, puku vae iñemuñagüe reta, ¿kërai yave pa peyeasɨa poita, pepɨatɨtɨ pemboyekuaa jökorai vae güi?

⁶ ¡Atataɨ, cheYa ikɨsepuku! ¿Kërai yave pa reputuuta? ¡Ekua ye nderɨru pe, nekïrii, nekïrii epɨta!

⁷ Ërei, ¿kërai pa ndepuereta nekïrii yandeYa ko ndeokuai yave? Ndeokuai ko repüa vaerä Ascalón re jare opaete ɨguasu jembeɨ rupigua reta re.