JEREMÍAS 40 - Biblia Guarani Tumpa Iñee

Jeremías jare jembɨregüe reta opɨta Gedalías ndive

¹ YandeYa jei Jeremías pe, Nabuzaradán, sundaro omaeäro vae reta juvicha oyora güire Ramá pe. Nabuzaradán oväe chupe tembipɨɨ reta Jerusalén pegua reta jare Judá pegua reta ipɨte pe, oyepokua karena pe oï; oyereraja ñogüɨnoi iɨvɨ güi Babilonia kotɨ vae reta ipɨte pe.

² Sundaro omaeäro vae reta juvicha oenɨi Jeremías ïkotɨa jare jei chupe: “NdeYa Tumpa omoërakua kuae ikavimbae ombou vaerä kuae ɨvɨ re,

³ jare añave oyembopo jókuae omoërakua vae. Kuae oasa pe reta ndive, echa peyoa Tumpa kotɨ jare mbaetɨ peyapo jae jeigüe.

⁴ Mase, añave voi aekɨ ndegüi karena reyepokua pɨpe vae. Nekɨ̈reɨ reo cherupíe Babilonia pe yave, yaja; che ayangarekota nderé. Ërei mbaetɨ nekɨ̈reɨ reo yave, epɨtaño. Eiparavo ɨvɨ nde reipota reiko pɨpe vae, jaekavita ndeve vae.

⁵ Nekɨ̈reɨ repɨtaño yave, ekua ye Gedalías, Ahicam taɨ, Safán jɨmɨmino pɨri, mburuvicha guasu Babilonia pegua oñono tëta reta Judá pegua juvicharä oeya vae pɨri, eiko jae ndive jare nerëta pegua reta ndive. Ekua, jaekavita ndevea pe.” Javoi sundaro omaeäro vae reta juvicha omee Jeremías pe mbota jare jembiurä, javoi omboyupavo.

⁶ Jeremías ojo Gedalías, Ahicam taɨ pɨri Mizpa pe, oiko jae ndive jare jókuae ɨvɨ pe opɨtagüe reta ndive.

Sundaro ruvicha reta yogüeru Gedalías pɨri

⁷ Sundaro ruvicha reta jare sundaro reta Judá pegua, oimeño ñogüɨnoi kaa rupi vae reta oikuaa yave mburuvicha guasu Babilonia pegua oñono oeya Gedalías, Ahicam taɨ tëta juvicharä, kuimbae jare kuña reta oï vaerä ipo pe, michia reta jare paravete vae reta mbaetɨ oyereraja Babilonia pe vae.

⁸ Yogüeru isundaro reta ndive Mizpa pe Gedalías pɨri. Jae ko: Ismael, Netanías taɨ; Johanán jare Jonatán, Carea taɨ reta; Seraías, Tanhumet taɨ; Efai Netofaɨgua taɨ reta; jare Jezanías, metei kuimbae Maaca pegua taɨ. Opaete kuae reta yogüeru isundaro reta ndive.

⁹ Jare Gedalías, Ahicam taɨ, Safán jɨmɨmino, Tumpa jee re jei chupe reta: “Agüɨye pekɨɨye peyeokuai Caldeaɨgua reta pe. Pepɨta peiko kuae ɨvɨ pe, peiko mburuvicha guasu Babilonia pegua jeia re, jare ikavita peiko.

¹⁰ Che, apɨtata Mizpa pe, añemoë vaerä peré Caldeaɨgua reta jóvai, yogüeru yave kuae pe. Peparavɨkɨ, pemboɨru vino, temitɨ ia oñemotinigüe jare olivo iasaite, jökorai peiko tëta guasu reta peikota pɨpe vae pe.”

¹¹ Jökorai vi opaete Judáɨgua reta ñogüɨnoi Moab pe vae, jare Amón iñemuña reta ipɨte pe vae, jare Edom pe, jare ïru ɨvɨ pe ñogüɨnoi vae reta oikuaa mburuvicha guasu Babilonia pegua omaeño amogüe Judáɨgua opɨta iɨvɨ pe, jare oñono oeya Gedalías tëta ruvicharä chupe reta vae.

¹² Jayave yogüeru ye Judáɨgua reta ɨvɨ Judá pe, opaete ketɨ ketɨ rupi ñogüɨnoia güi, Gedalías pɨri Mizpa pe. Jare omboɨru reta vino jare temitɨ ia oñemotinigüe jeta yeyé.

Ismael omomburu Gedalías

¹³ Johanán, Carea taɨ, jare opaete ïru sundaro ruvicha reta opɨta kaa rupi vae yogüɨraja Mizpa pe, Gedalías pɨri,

¹⁴ jare jei reta chupe: —¿Mbaetɨ pa reikuaa Baalis, Amón pegua reta juvicha guasu ombou Ismael, Netanías taɨ, ndeyukauka vaerä? Ërei Gedalías mbaetɨ güɨrovia reta.

¹⁵ Jayave Johanán, Carea taɨ jei vɨari Gedalías pe Mizpa pe: —Emaeño che taja tayuka Ismael, Netanías taɨ, mbaetɨ eteita kia oikuaa. ¿Maera pa ñamaeñota kia ndeyuka? Echa jökorai yave opata oñemoai kuae Judáɨgua reta yogüeru ndekotɨ vae, jare opata okañɨtei.

¹⁶ Ërei Gedalías jei Johanán pe: —¡Agüɨye eyapo! Ismael regua nemiari vae mbaetɨ ko añete.