JEREMÍAS 39 - Biblia Guarani Tumpa Iñee

Jerusalén oyemboai vae regua

¹ Sedequías chaúa año, payandepo yasɨa ma oiko mburuvicha guasurä Judá pe yave, Nabucodonosor mburuvicha guasu Babilonia pegua, yogüeru opaete isundaro reta ndive Jerusalén kotɨ, jare opa oñova reta.

² Jare onsea año, irundɨ yasɨa, ara chaúa pe, Sedequías oiko mburuvicha guasurä yave, tovaicho reta omombu tëta guasu ikësea,

³ jare opaete Babilonia pegua mburuvicha guasu iyɨvɨrigua mburuvicha reta oike, jare oyembojeyupa reta öke mbɨte pegua pe. Jae ko Nergal-sarezer jare Samgar-nebo; jare tenondegua ete mburuvicha guasu jo pe vae reta, jae ko Sarsequim jare ïru Nergal-sarezer; jare opaete ïru mburuvicha reta, Babilonia pegua mburuvicha guasu iyɨvɨrigua reta.

⁴ Jare mburuvicha guasu Sedequías jare isundaro reta oecha yave kuae oasa oï vae, otekuarai reta tëta guasu güi. Ñogüɨnoe reta pɨ̈tu yave, tape mburuvicha guasu iko raɨ rupi oasa vae rupi, öke tëta guasu ikësea mókoi oyóvai ñogüɨnoi vae ipäu pe oï vae rupi, jare yogüɨraja tape Arabá kotɨ ojo vae rupi.

^5-6 Ërei ngatu sundaro Caldeaɨgua reta oaɨkuemoña, jare oupitɨ reta Sedequías ɨvɨpe kavi Jericó pegua pe. Oipɨɨ reta jare güɨraja mburuvicha guasu Nabucodonosor jóvai, Ribla pe jae oïa pe, ɨvɨ Hamat pe. Joko pe mburuvicha guasu Nabucodonosor jei mbae oyapo vaerä chupe reta: Javoi Sedequías jovakei opa taɨ reta oñaseokɨ̈ti, jare opaete Judá pegua mburuvicha reta.

⁷ Sedequías güi opa güɨnoe jesäɨ jare oipokua reta karena pe güɨraja vaerä Babilonia pe.

⁸ Javoi Caldeaɨgua reta oapɨ mburuvicha guasu jo jare o reta tëta guasu pegua, jare opa ombosururu reta tëta guasu Jerusalén ikësea.

⁹ Jare Nabuzaradán, sundaro omaeäro vae reta juvicha opa güɨraja Babilonia kotɨ, opaete tëta guasu pe opɨtagüe reta, oñemoïru jae reta ndive vae reta, jare opaetei.

¹⁰ Jaeño oeya ɨvɨ Judá pe paravete yae vae reta, mbaetɨ etei mbae güɨnoi vae, omee chupe reta uvarupa jare ɨvɨ.

Nabucodonosor ipɨakavi Jeremías kotɨ

¹¹ Nabucodonosor, mburuvicha guasu Babilonia pegua oyókuai yepe Nabuzaradán, sundaro omaeäro vae reta juvicha, Jeremías regua, körai:

¹² “Ndepo pe toï, eyangareko jese, agüɨye eyuvanga jese, jaeño emee chupe opaete jae oiporu ndeve vae.”

¹³ Jayave Nabuzaradán, jare tenondegua ete mburuvicha guasu jo pe vae reta, jae ko, Nabusazbán jare Nergal-sarezer, jare opaete ïru mburuvicha reta Babilonia pegua mburuvicha guasu iyɨvɨrigua reta,

¹⁴ omondo güɨnoeuka Jeremías tembipɨɨrɨru joka güi, jare omee Gedalías, Ahicam taɨ, Safán jɨmɨmino pe, güɨraja vaerä jëta pe oyangareko jese. Jökorai, Jeremías opɨta oiko opaete vae reta ipɨte pe.

Tumpa güɨrökuavee omborɨ vaerä Ebed-melec

¹⁵ Jeremías oimeño vɨteri tembipɨɨ oiko tembipɨɨrɨru joka pe yave, yandeYa jei chupe körai:

¹⁶ “Ekua jare ere Ebed-melec Etiopíaɨgua pe: YandeYa Imbaepuere yae ete vae Israel iTumpa, jei: ‘Ambopota cheñee oñemoërakua kuae tëta guasu oyemboaita vae, mbaetɨ ikavi vae. Kuae oyeapo yave, nde oimeta reï.

¹⁷ Ërei che jókuae ara rogüɨroasayepeta, ngaraa rea jókuae rekɨɨye chugüi vae reta ipo pe. Che ndeYa ko jae kuae.

¹⁸ Che rogüɨroasayepeta, ngaraa ndeyuka reta. Reasayepeta tekove ndive, echa rerovia cheré. Che ndeYa ko jae kuae.’ ”