JEREMÍAS 36 - Biblia Guarani Tumpa Iñee

Baruc omongeta tembikuatía tupao pe

¹ Joacim, Josías taɨ, irundɨa año ma oiko mburuvicha guasurä Judá pe yave, yandeYa jei Jeremías pe körai:

² “Eipɨɨ metei tupapire oyepomombɨ vae, jare eikuatía jese opaete che jae ndeve Israel jare Judá regua vae, jare ïru tëtaguasu reta regua, mburuvicha guasu Josías oiko yave güive amboɨpɨ chemiari ndeve añave regua vae.

³ Güɨramoi Judá pegua reta oendu opaete susere reta ayemongeta ambou vaerä chupe reta vae yave, oeya reta jeko kavimbae, javoi che cheɨ̈rota jeko kavimbae jare iyoa reta re chupe reta.”

⁴ Jare Jeremías oenɨi Baruc, Nerías taɨ, jare jae oikuatía Jeremías jei oï chupe vae, metei tupapire oyepomombɨ vae pe opaete yandeYa jei vae.

⁵ Javoi Jeremías jei Baruc pe: “Mase, chegüi oyeopia ko, aja vaerä yandeYa itupao pe.

⁶ Jáeramo, nde ekua kuri tembíu güi yekuaku iara pe; jare emongeta kuae tembikuatía oyepomombɨ vae, cheñee reta reikuatía pɨpe vae, oendu reta vaerä yandeYa iñee, opaete vae jare opaete tëta guasu reta Judá pegua güi yogüeru kuae kotɨ vae.

⁷ Güɨramoi jayave oyerure reta yandeYa pe jare oeya reta jeko ikavimbae vae, echa yandeYa iyarasɨ omoërakua kuae tëta kotɨ vae yavaete yae vae ko.”

⁸ Baruc, Nerías taɨ oyapo opaete ñeemombeúa Jeremías oyókuai vae; ojo tupao pe jare omongeta yandeYa iñee oyekuatía oï jókuae tembikuatía oyepomombɨ vae pe vae.

⁹ Joacim, Josías taɨ, chaúa yasɨ pandepoa año ma oiko mburuvicha guasurä Judá pe yave, oñemoërakua oime vaerä yekuaku tembíu güi yandeYa jóvai, Jerusalén pegua reta peguarä jare opaete ïru tëta guasu reta Judá pegua güi yogüeru Jerusalén pe vae reta peguarä.

¹⁰ Jare Baruc omongeta tembikuatía Jeremías iñee reta oyekuatía pɨpe vae, yandeYa itupao pe, Gemarías, ombaekuatía vae Safán taɨ icuarto joka ɨvate oï vae pe, Öke Pɨau jee vae jöke pe, opaete vae reta oendu vaerä.

Baruc omongeta tembikuatía oyepomombɨ vae mburuvicha reta jóvai

¹¹ Micaías, Gemarías taɨ, Safán jɨmɨmino, oendu opaete yandeYa iñee Baruc omongeta tembikuatía oyepomombɨ vae pe vae yave,

¹² ojo mburuvicha guasu jo pe, ombaekuatía vae icuarto pe, mburuvicha reta oyomboatɨ ñogüɨnoia pe, jae ko: Elisama, ombaekuatía vae; Delaía, Semaías taɨ; Elnatán, Acbor taɨ; Gemarías, Safán taɨ; Sedequías, Hananías taɨ, jare ïru mburuvicha reta.

¹³ Micaías omombeu chupe reta opaete jae oendu Baruc omongeta tembikuatía oyepomombɨ vae güi opaete vae pe vae regua.

¹⁴ Jayave mburuvicha reta omondo Jehudí, Netanías taɨ, Selemías jɨmɨmino, Cusi jɨmɨmino yoapɨ ye jei vaerä Baruc pe, güeru vaerä jókuae tembikuatía omongeta opaete vae pe vae. Baruc, Nerías taɨ güɨraja jókuae tembikuatía jare ojo jae reta ñogüɨnoia pe,

¹⁵ jare jae reta jei chupe: —Eguapɨ jare emongeta oreve tembikuatía pe oyekuatía oï vae. Baruc omongeta chupe reta,

¹⁶ jare jae reta oendu rupive okɨɨye yae jare jei reta oyoupe: —Yamombeuta ko kuae, mburuvicha guasu pe.

¹⁷ Javoi jei reta Baruc pe: —Emombeu oreve kërai etei ko reikuatía Jeremías iñee reta vae.

¹⁸ Baruc jei: —Jeremías jei oï cheve ramboeve, che aikuatía tinta pe kuae tembikuatía.

¹⁹ Jayave mburuvicha reta jei Baruc pe: —¡Nde jare Jeremías pekua peñemi, jare agüɨye kia toikuaa kia pe ko peï vae!

Mburuvicha guasu Joacim oapɨ tembikuatía oyepomombɨ vae

²⁰ Mburuvicha reta oeya jókuae tembikuatía ombaekuatía vae Elisama icuarto pe, jare yogüɨraja reta omombeu opaete kuaekuae mburuvicha guasu pe.

²¹ Jayave mburuvicha guasu omondo Jehudí güeru vaerä jókuae tembikuatía Elisama icuarto güi, jae ko ombaekuatía vae; Jehudí güeru yave, omongeta mburuvicha guasu jóvai jare opaete iyɨvɨrigua mburuvicha reta jóvai.

²² Mburuvicha guasu oï jo iroɨ pegua pe, jókuae yasɨ chaúa pe, jare güɨnoi iyɨpɨ pe tätapɨi rɨru tata ndive.

²³ Jare Jehudí omongeta yave mboapɨ ani irundɨa jɨsɨ jókuae tembikuatía güi, mburuvicha guasu oyasɨa kɨseraɨ pe jare oitɨ jókuae tata jendɨ oï iyɨpɨ pe vae pe. Jökorai opa oapɨ jókuae tembikuatía oyepomombɨ vae.

²⁴ Mburuvicha guasu jare iyɨvɨrigua mburuvicha reta oendu yave, mbaetɨ etei okɨɨye reta, jare mbaetɨ kërai ave omboyekuaa reta ipɨatɨtɨ.

²⁵ Elnatán, Delaía jare Gemarías omoñera tëi mburuvicha guasu agüɨye vaerä oapɨ jókuae tembikuatía, ërei jae mbaetɨ oendu chupe reta,

²⁶ jaeño oyókuai Jerameel, Hamelec taɨ, Seraías, Azriel taɨ jare Selemías, Abdeel taɨ, oipɨɨ vaerä ombaekuatía vae Baruc jare ñeemombeúa Jeremías. Ërei yandeYa omoñemi reta.

Jeremías oikuatiauka ye ïru tembikuatía oyepomombɨ vae

²⁷ Mburuvicha guasu opa güire oapɨ tembikuatía Jeremías iñee reta Baruc oikuatía pɨpe vae, yandeYa jei ye Jeremías pe:

²⁸ “Eipɨɨ ye ïru tupapire oyepomombɨ vae, jare eikuatía pɨpe opaete ñee reta, tenondegua pe oyekuatía tëi vae, Joacim mburuvicha guasu Judá pegua opa oapɨ vae.

²⁹ Jare körai ere mburuvicha guasu pe: ‘Körai jei yandeYa: Nde reapɨ tembikuatía, jare reñeengata vi Jeremías pe, echa oikuatía jese mburuvicha guasu Babilonia pegua outa opa omboai kuae tëtaguasu, mbaetɨta pɨpe kuimbae ani mɨmba yepe.

³⁰ Jáeramo, che ndeYa jae Joacim mburuvicha guasu Judá pegua kotɨ, mbaetɨ vaerä güɨnoi iñemuña reta güi oguapɨ vaerä David iporookuaía pe. Jëogüegüe opɨtata kuaraɨ jasɨ pe jare iroɨ pe pɨ̈tu yave.

³¹ Jae jare iñemuña reta, jare iyɨvɨrigua mburuvicha reta pe aiporaraukata iyoa jeko pegua. Ambouta jese reta, jare Jerusalén pe yogüɨreko vae reta re jare opaete Judá pegua reta re opaete susere reta amoërakua vae, jae reta mbaetɨ oipota oendu vae.’ ”

³² Jayave Jeremías oipɨɨ ïru tupapire oyepomombɨ vae jare omee ombaekuatía vae Baruc, Nerías taɨ pe; jae oikuatía opaete Jeremías iñee reta jókuae tupapire pe, jókuae mburuvicha guasu Joacim opa oapɨ vae pe oï vae. Jeremías omboyoapɨ ye jeta ïru ñee reta tenonde oyekuatía tëi vae güi.