JEREMÍAS 34 - Biblia Guarani Tumpa Iñee

Ñee mburuvicha guasu Sedequías peguarä

¹ Nabucodonosor, mburuvicha guasu Babilonia pegua, opaete isundaro reta jare ïru tëtaguasu pegua reta jae ipo pe ñogüɨnoi vae ndive, oyomboatɨ opüa Jerusalén re jare iyɨvɨrigua tëta guasu reta re yave, yandeYa jei Jeremías pe:

² “Che, ndeYa Israel iTumpa, royókuai reo vaerä nemiari Sedequías mburuvicha guasu Judá pegua pe, ere: ‘YandeYa jei: Kuae tëta guasu ameeta mburuvicha guasu Babilonia pegua ipo pe jare jae oapɨta.

³ Nde ngaraa reasayepe ipo güi; ndepɨɨ retata jare nemee retata chupe, reecha eteita mburuvicha guasu jare nemomiarita jae etei, jare ndererajata Babilonia pe.

⁴ Ërei opaete kuae mbaembae oasa reve, eyeapɨsaka, Sedequías mburuvicha guasu Judá pegua, yandeYa jei vae re: Ngaraa remano kɨsepuku pe.

⁵ Remano kavita, jare ikäti kavi vae oapɨ retata ndeve, neñemuñagüe reta omano yave oyeapɨ rami, jókuae tenonde rupi ndegüi oporookuai vae reta, jare neräpiro reve jei retata: ¡Maera pa ko yanderuvicha! Che ndeYa ko jae kuae, oyeapota ko.’ ”

⁶ Opaete kuae ñee reta Jeremías jei Sedequías mburuvicha guasu Judá pegua pe, Jerusalén pe.

⁷ Jökorai ramboeve, mburuvicha guasu Babilonia pegua isundaro reta opüa ñogüɨnoi Jerusalén re, jare tëta guasu reta Laquis jare Azeca re, echa jaeño ete tëta guasu reta oñekëse kavi vae, Judá pegua opɨta vɨteri vae.

Yemongeta tembiokuai hebreo reta regua oyembopoä

⁸ YandeYa imiari Jeremías pe, mburuvicha guasu Sedequías opa güire oyapo yemongeta opaete Jerusalén pegua reta ndive oyeyora vaerä opaete tembiokuai reta.

⁹ Jókuae yemongeta oyeapogüe pe jei, metei ñavo oyora vaerä jembiokuai kuimbae ani jembiokuai kuña jëtara hebreo, jökorai agüɨye vaerä metei ave kia güɨnoi jembiokuairä jëtara hebreo.

¹⁰ Opaete mburuvicha reta jare tëta ipo reta oendu kuae yemongeta oyeapogüe yave ikɨ̈reɨ, jare oyora jembiokuai reta, mbaetɨ ma oyókuai ye.

¹¹ Ërei jaɨkue rupi oipoepɨ reta iyemongeta, jókuae jembiokuai reta opa oyora vae re, jare opa ye oipɨɨ jembiokuai reta, oyeokuai pɨau ye vaerä chupe reta.

¹² Jayave, yandeYa jei Jeremías pe:

¹³ “Che, ndeYa Israel iTumpa, ayapo morogüɨrökuavee päve peñemuñagüe reta ndive anoe reta yave ɨvɨ Egipto güi, jókuae oyeokuaiasɨ katúa güi. Ayókuai reta

¹⁴ chiu año oväe ñavo oyora reta vaerä oipotagüe jëtara hebreo oñemee jembiokuairä vae, jare oyeokuai chupe ova año vae. Ërei ngatu peñemuñagüe reta mbaetɨ oendu jare mbaetɨ oyapo reta che jae vae.

¹⁵ Ko mbovɨ ara, pe reta peipoepɨ tëi pereko, jare peyapo jaekavi cheve vae, peyora ramboeve tembiokuai perëtara reta vae. Jare peyapo yemongeta peñererökuavee reve tupao oñeñono tee cheveguarä vae pe.

¹⁶ Ërei jaɨkue rupi peipoepɨ ye peyemongeta, pemboeteä cheree, opa ye peipɨɨ perembiokuai reta kuimbae jare kuña peyoragüe, oyeokuai ye vaerä peve.

¹⁷ Jáeramo, che peYa Israel iTumpa jae: Pe reta mbaetɨ peyapo cheporookuai, echa mbaetɨ peyora perëtara perembiokuairä pereko vae; jáeramo añave, che ambouta peve ñeraro, mbaerasɨ ovakatu vae jare karuai; jare poñonota ñemomarai pe opaete mborookuaía reta ñogüɨnoi ɨvɨ pe vae jóvai. Che peYa ko jae kuae.

^18-19 Mburuvicha reta Judá pegua jare Jerusalén pegua, jare opaete mburuvicha iyɨvɨrigua reta, sacerdote reta jare opaete vae reta oñererökuavee reta cheróvai; toro taɨrusu vae omboyao reta ikupe mbɨte rupi, jare oasa reta jókuae omboyaogüe ipäu rupi. Ërei ngatu jaɨkue rupi omboeteä jókuae oñererökuavee vae, mbaetɨ ombopo reta iñererökuavee.

²⁰ Jáeramo, ameeta jae reta opa vaerä oa tovaicho reta, oeka oyuka vaerä vae reta ipo pe, jare jëogüegüe reta chucha reta jembiurä jare mbaeporou reta jembiurä.

²¹ Jökoraiño vi Sedequías mburuvicha guasu Judá pegua jare iyɨvɨrigua mburuvicha reta opata vi oa tovaicho reta oeka oyuka vaerä vae reta ipo pe, mburuvicha guasu Babilonia pegua isundaro reta ipo pe, jókuae oñemopüa poi ma peré vae.

²² Ërei ayokuaita oyerova reta ye vaerä kuae tëta guasu kotɨ, jare opüata jese, opɨ̈rota jare oapɨ retata. Jare ïru tëta guasu reta Judá pegua opɨtata ipombae, mbaetɨ eteita pɨpe vae. Che peYa ko jae kuae.”