JEREMÍAS 33 - Biblia Guarani Tumpa Iñee

Jerusalén oï kavi yeta vae regua

¹ YandeYa jei mokoía ma Jeremías pe, oimeño vɨteri tembipɨɨrä oiko tembipɨɨrɨru joka pe yave; jei chupe:

² “Che ndeYa, ɨvɨ iyapoa, ayapo jare añono kavi jenda pe vae, jae ndeve:

³ Eyerure cheve jare aenduta ndeve, amombeuta ndeve mbae tuicha vae jare oñemi oï ndegüi vae, nde reikuaambae vae.

^4-5 Che ndeYa, Israel iTumpa, amombeu ndeve Jerusalén jare mburuvicha guasu reta jëta Judá pegua regua, jókuae oyemboaita tembiporu ñeraro pegua jare yɨɨ pe oï vae. Ñogüɨnoe oñeraro vaerä jókuae Caldeaɨgua reta oporepeña tëta re vae ndive yave, omano vaeräño ko ñogüɨnoeta. Echa chearasɨ yae jeko pegua ameeta omano reta vaerä, echa kuae tëta güi ayembosɨrɨ, ikavimbae yae vae oyapo reta jeko pegua.

⁶ Ërei aipoano retata, oikovekatuta jare ameeta chupe reta mbɨakatu jare oiko pɨagüive reta vaerä.

⁷ Aru yeta Judá pegua reta jare Israel pegua reta tembipɨɨ güi, jare añono kavi yeta tenonde yave rami.

⁸ Aitɨota opaete mbaeyoa oyapo reta chekotɨ vae güi; cheɨ̈rota chupe reta, opaete ikavimbae oyapo jare oyembopɨapochɨ reta chekotɨ vae re.

⁹ Jare Jerusalén oïta cheve yerovia katurä, mbaemboete jare yemboete pegua opaete tëtaguasu reta ɨvɨ pegua jóvai. Jare jae reta oikuaa che amee opaete mbae ikavi vae Jerusalén pegua reta pe yave, orɨrɨi retata okɨɨye güi.”

¹⁰ YandeYa jei: “Pe reta pere, kuae ɨvɨ ipombae ko oï vae jare mbaetɨ pɨpe kuimbae ani mɨmba yepe; Jerusalén ikaye ipombae jare tëta guasu reta Judá pegua; mbaetɨ kuimbae ani mɨmba yepe pɨpe pere chupe vae pe,

¹¹ oyeendu yeta tairari arete pegua jare yerovia pegua, jare tairari menda pegua jare oyeenduta jei vae: ‘Pemee yasoropai yandeYa Imbaepuere yae ete vae pe, echa jae ipɨakavi jare iporoaɨu opambae ko.’ Jare güeru reta yeta mbota yasoropai pegua tupao pe, echa aru yeta tembipɨɨ güi, yogüɨreko ye vaerä tenonde yave rupi rami. Che ndeYa ko jae kuae.”

¹² YandeYa Imbaepuere yae ete vae jei: “Kuae ɨvɨ ipombae añave oï vae, mbaetɨ kuimbae ani mɨmba pɨpe vae, jare opaete jëta guasu reta rupi vae pe, oime yeta kapii, vecha iyangarekoa reta güɨraja vaerä jɨmba omongaru jokoropi.

¹³ Tëta guasu reta ɨvɨtɨ guasu rupigua jare ɨvɨpe kavi rupi ñogüɨnoi vae reta, jökoraiño vi Neguev pegua jare Benjamín iɨvɨ pegua tëta guasu reta, jare Jerusalén iyɨ́vɨri rupigua jare tëta guasu reta Judá pegua rupi, oime yeta vecha iyangarekoa reta oipapa ivecha reta. Che ndeYa ko jae kuae.”

¹⁴ YandeYa jei: “Mase, oväeta ara, che ambopo vaerä cheñererökuavee Israel pegua reta pe jare Judá pegua reta pe vae.

¹⁵ Jókuae ara rupi amopüata David iñemuña güi metei jupi vae, jae oyapota morojäa jare jupi vae kuae tëtaguasu pe.

¹⁶ Jókuae ara rupi Judá oyeyorata jare Jerusalén oiko pɨagüiveta, jare ombojee retata: YandeYa ko jae jupi vae yandeveguarä vae.

¹⁷ Che, ndeYa jae: Ngaraa oata David iñemuña güi metei oguapɨ vaerä mburuvicha guasurä Israel pe.

¹⁸ Ngaraa vi oata sacerdote jare levita reta iñemuña güi ara ñavo omee vaerä cheve mɨmba oyeyukagüe opaetei oyeapɨ vae, jare oapɨ reta mbota temitɨ jäɨgüe jare ïru mɨmba reta oyeyukagüe vae.”

¹⁹ YandeYa jei Jeremías pe:

²⁰ “Che, ndeYa jae: Mbaetɨ ko kia ipuere oipoepɨ yemongeta ayapo ara jare pɨ̈tu ndive vae, pɨ̈tu jare köe vaerä iora pe kavi,

²¹ jökorai ko mbaetɨ kia ipuere oipoepɨ cheporogüɨrökuavee päve cherembiokuai David ndive ayapo vae, oime avei vaerä taɨ oguapɨ jae iporookuaía pe, jare cheporogüɨrökuavee päve cherembiokuai levita reta jare sacerdote reta ndive vae.

²² Jare cherembiokuai David iñemuña reta jare oyeokuai cheve vae levita reta ambojetata, ara re yasɨtata rami jare ɨvɨkuitï ɨguasu jembeɨ rupigua mbaetɨ ipuere opa oyepapa rami.”

²³ YandeYa jei Jeremías pe:

²⁴ “¿Mbaetɨ pa reikuaa amogüe ketɨgua reta kuae pe yogüɨreko vae jei che aröɨro ko mókoi tëtara aiparavo vae, jae ko Israel jare Judá? ¡Jáeramo güɨröɨro reve omae reta chembae vae reta re, jare mbaetɨ ma oipapa tëtaguasu rami!

²⁵ Che, ndeYa jae: Che, ayapo yemongeta ara ndive jare pɨ̈tu ndive vae, jare ara jare ɨvɨ oiko aveita cheporookuai rupi.

²⁶ Jökorai ngaraa etei aröɨro cherembiokuai Jacob jare David iñemuña reta, ngaraa amaeño oata kia oporookuai vaerä Abraham, Isaac jare Jacob iñemuña reta re vae. Echa che cheporopararekota jese reta jare aru yeta tembipɨɨrä yogüɨrekoa güi.”