JEREMÍAS 31 - Biblia Guarani Tumpa Iñee

Israel iñemuña reta oyerova ye iɨvɨ pe

¹ YandeYa jei: “Jókuae ara rupi che aikota opaete ñemuña reta Israel pegua iTumparä, jare jae reta yogüɨrekota chembaerä.”

² YandeYa jei: “Ñuu pe chepɨakavi yae mano güi oasayepe vae reta pe. Israel iñemuña reta yogüɨraja yave ɨvɨ oputuu vaerä vae kotɨ.

³ Ɨma yae ma che ayekuaa chupe reta jae reve: Che roaɨu yae mboroaɨu opambae ndive; jáeramo jekuae aveiño cheporoparareko pekotɨ.

⁴ Romopüa pɨau yeta, Israel. Rembopu yeta angúa raɨ, repɨraeta reyerovia katu reve.

⁵ Renoi yeta uvarupa, ɨvɨtɨ reta Samaria pegua rupi, uva oñotɨ vae, oyekou yaeta iagüe re.

⁶ Echa oväeta ara omaeäro vae reta osapúkai vaerä ɨvɨtɨ Efraín re, jei reve: ‘Peyu, yaja Sión pe, yamboete vaerä yandeYa Tumpa.’ ”

⁷ YandeYa jei: “Petairari vɨakatu jare yerovia katu pegua tairari Jacob iñemuña reta re, echa jae reta ko tenondegua opaete tëtaguasu reta güi vae. Peenduka pembaemboete, pere: ‘YandeYa oepɨ imbae vae reta, Israel güi jembɨregüe.’

⁸ Aru reta yeta tëtaguasu ɨvɨtuguasu kotɨgua güi, jare opata amboatɨ ɨvɨ iyapɨ kotɨ güi. Yogüeruta jae reta ndive jesambae reta jare iköcho vae reta, kuña reta ipurúa vae jare imembɨ oa ma vae. ¡Jeta yeyé yogüeruta jupíe reta!

⁹ Yogüeru retata oyaeo reve oyerovia güi jare oyerure reve; araja retata ɨ katúa rupi, tape ipe kavía rupi, mbaetɨta oyepɨaka vae rupi. Echa Israel tu ko che, Efraín jae ko cheraɨ tenondegua ete.

¹⁰ Tëtaguasu reta, peyeapɨsaka yandeYa iñee re, jare pemoërakua mombɨrɨ ɨguasu jembeɨ rupigua reta pe, pere: ‘YandeYa opa omoai moai Israel iñemuña reta, ërei omboatɨ yeta jare oyangarekota jese, vecha iyangarekoa, ivecha re oyangareko rami.’

¹¹ Echa yandeYa güɨnoe ye Jacob iñemuña reta, oyora metei tëtaguasu imbaepuere yae ete chugüi reta vae güi.

¹² Otairari retata jare oyeroviata yogüeru ɨvɨtɨ Sión re, oyekou retata yandeYa omborɨgüe re, jae ko: Trigo, vino jare olivo iasaite, vecha reta jare guaka reta. Kó raɨ oyemboɨu kavi yae vae ramita, jare ngaraa ye ma ipɨtu reta.

¹³ Kuñatai reta opɨraeta oyerovia reve, jökoraiño vi kunumi reta jare ndechi reta. Che ameeta chupe reta mbɨakatu; jesaɨ, aipoepɨta vɨakatu pe, jare ameeta chupe reta yerovia katu, mbae oiporara vae ipoepɨka pe.

¹⁴ Ameeta sacerdote reta jeta okaru kavi, jare chembae vae reta oyekouta chembaeyekou re. Che ndeYa ko jae kuae.”

¹⁵ YandeYa jei: “Ramá pe oyeendu yaeo, tesaɨ jare yaeo yemboasɨkatu pegua; Raquel ipɨatɨtɨ oï imembɨ reta re, jare mbaetɨ oipota oyembopɨakatuka, echa opa omano reta.”

¹⁶ Ërei yandeYa jei chupe: “Emombɨta mo ndeyaeo jare nderesaɨ; echa jekoviata ndeve ndepɨatɨtɨ vae, echa nemembɨ reta oyerova yeta jovaicho reta iɨvɨ güi. Che ndeYa ko jae kuae.

¹⁷ Oime mbae ikavi vae nderenonde kotɨ, jae ko: Nemembɨ reta yogüeru yeta iɨvɨ ae pe. Che ndeYa ko jae kuae.

¹⁸ Aendu tëta Efraín oyaeo jasɨ katu reve jei: ‘Che, metei toro taɨrusu imasombae rami yepi, ërei nde chenupa jare chemomaso; chemboyerova ye ndekotɨ, echa nde jae cheYa Tumpa.

¹⁹ Che asɨrɨ ndegüi, ërei añave ayembopɨambuae chereko güi; aikuaa cheyoa ko jare akua cheu re chepɨatɨtɨ güi; chemomarai yae cheyoa reta chetaɨrusu pegua.’

²⁰ Tëta Efraín, jae ko cheraɨ aaɨu yae vae, jae ko cheraɨ chepɨa oyerovia yae jese vae. Añeengata chupe tëi reve, mbaetɨi cheakañɨ chugüi; chepɨa pe chemaendúa avei jese jare aiparareko yae. Che ndeYa ko jae kuae.

²¹ Israel, emokañɨmaa tape yavaimbae reve reväe ye vaerä. ¡Israel, emae kavi jese, eyerova ye jokoropi; eyerova ye nerëta guasu reta kotɨ!

²² ¿Kërai yave regua pa reikota, kuñatai iñeereendumbae rami? Che ndeYa, ayapota mbae ambuaeyee vae kuae ɨvɨ pe, jae ko: Kuñai oyangarekota kuimbae re vae rami vae.”

Israel oï kavi yeta vae regua

²³ YandeYa Imbaepuere yae ete vae Israel iTumpa jei: “Aru ye ma Judá pegua reta tembipɨɨ güi iɨvɨ pe, jare yogüɨreko ye ma pɨpe yave, jei retata kuae ñee: ‘¡YandeYa tiporerekua kuae ɨvɨtɨ oñeñono tee jare jupigüe oyeapo pɨpe vae re!’

²⁴ Judá pe jare tëta guasu reta rupi yogüɨreko yeta, kó pe oparavɨkɨ vae reta jare mɨmba iyangarekoa reta.

²⁵ Echa ameeta jeta okaru kavi jare oɨu, ikangɨ jare ipɨtu vae reta.”

²⁶ Jökorai yave apa jare amae. Chepaɨu ikavi yae cheve.

Morogüɨrökuavee päve ipɨau vae

²⁷ YandeYa jei: “Mase, oväeta ara amoñemuña vaerä jeta Israel pegua reta jare Judá pegua reta jare jeta mɨmba reta.

²⁸ Aïndaivi aapomondoro vaerä jare ambosururu vaerä; ambojopa vaerä jare amokañɨ vaerä; jare ambopɨatɨtɨ vaerä: Jökorai vi aïndaivi amopüa ye vaerä jare ambopɨau ye vaerä.

²⁹ Jókuae ara rupi ngaraa ye ma jei reta: ‘Tu reta jou uva jayasɨgüe jare taɨ reta jäi iyeɨ.’

³⁰ Ërei opaete kuimbae jou uva jayasɨgüe vae jäi iyeɨta ko. Jökorai ko metei ñavo vae omanota iyoa ae re.”

³¹ YandeYa jei: “Mase, oväeta ara ayapo vaerä morogüɨrökuavee päve ipɨau vae Israel pegua reta jare Judá pegua reta ndive.

³² Mbaetɨ peñemuñagüe reta ndive morogüɨrökuavee päve ayapo rami, jókuae ara aipoko anoe ɨvɨ Egipto güi rami; echa cheporogüɨrökuavee päve mbaeä etei chupe reta, yepe tëi che ko jae reta ime rami. Che peYa ko jae kuae.

³³ Ërei kuae ko jae morogüɨrökuavee päve ayapota tëta Israel ndive jókuae ara kuri vae: Añonota cheporookuai reta ipɨa pe, aikuatiata ipɨa re; jare aikota jae reta iTumparä jare jae reta yogüɨrekota chembaerä.

³⁴ Jare ngaraa ye ma metei ave omboe japicha vae, ani ramo jëtara vae, jei reve: ‘Eikuaa yandeYa’; echa opaete vae chekuaata, mbaeä etei vae reta güive opaete tuichagüe reta; echa cheɨ̈rota chupe reta jeko kavimbae re jare ngaraa ye chemaendúa iyoa reta re. Che peYa ko jae kuae.”

³⁵ YandeYa, oyapo kuaraɨ omboesape vaerä ara pe vae, yasɨ jare yasɨtata reta omboesape vaerä pɨ̈tu rupi vae, ɨguasu oipɨu jare ɨaparúa jɨapu oyapo vae, jae ko jee yandeYa Imbaepuere yae ete vae; jei körai:

³⁶ “Ërei metei ara oikomegua yave kuae mborookuai añono cherembiapo reta re vae, jókuae ara güive Israel iñemuña reta, ngaraa ma yogüɨreko tëtaguasu chembaerä jekuae avei pegua. Che peYa ko jae kuae.

³⁷ Metei ara oñejäa yave ara, jare oñemae ɨvɨ iguapɨka re yave, jókuae ara aröɨrota cheyeugüi Israel iñemuña reta opaete oyapogüe re. Che peYa ko jae kuae.”

³⁸ YandeYa jei: “Oväeta ara cherëta guasu oñemopüa pɨau ye vaerä, oɨvate Hananeel jee vae güive Öke Jugua jee vae pe.

³⁹ Jembeɨ isɨmbita ojo joko güi Gareb iɨvɨtɨ re, javoi oyere Goa kotɨ.

⁴⁰ Opaete ɨvɨtɨ päu ipe kavi vae omanogüe oñeotɨ pɨpe vae jare tanimbu oyemomboa, jare opaete ɨvɨtɨ päu ipe kavi vae oï ɨ̈aka Cedrón iárambo vae güive Kavayu Röke jee vae iekina pe, kuaraɨ oëa kotɨ, oñeñono tee chevegüarä. Jare kuae tëta guasu ngaraa ye ma oyemboai.”