JEREMÍAS 30 - Biblia Guarani Tumpa Iñee

Tumpa güɨrökuavee tembipɨɨ reta oyerova yeta vae

¹ YandeYa jei Jeremías pe körai:

² “Che, Israel iTumpa jae: Eikuatía metei tembikuatía pe opaete jae ndeve vae,

³ echa oväeta ara, aru ye vaerä chembae vae reta Israel jare Judá pegua reta, tembipɨɨrä ñogüɨnoia güi. Aru yeta yogüɨreko vaerä ɨvɨ, che amee iñemuñagüe reta imbaerä vae pe.”

⁴ Jae kuae ñee reta yandeYa jei Israel jare Judá regua vae.

⁵ Jei körai: “¡Aendu täse kɨɨye pegua, mbaetɨ mbɨakatu pegua!

⁶ Peparandu, ¿ipuere yera metei kuimbae imembɨ? Ërei maera pa aecha kuimbae reta oyeetepoka, kuña imembɨ oa oï vae pe jasɨ vae rami, jare opaete jovaiyu ñogüɨnoi.

⁷ ¡Oyearo ma ara yavaetegüe, mbaetɨi jókuae nunga ara tenonde rupi! Ara mbɨatɨtɨ pegua ko Jacob iñemuña reta pe, ërei che aroasayepe retata.

⁸ Che, peYa Imbaepuere yae ete vae jae: Ayorata chembae vae reta tembipɨɨ güi, jare ngaraa ye ma ketɨgua reta jembipɨɨrä yogüɨreko.

⁹ Oyeokuai retata che iYa, Tumpa pe, jare David iñemuña amopüata juvicha guasurä vae pe.”

YandeYa güɨroasayepeta imbae vae reta

¹⁰ YandeYa jei: “Cherembiokuai Jacob iñemuña reta, agüɨye pekɨɨye; Israel iñemuña reta, agüɨye pekɨɨye, echa nde jare neñemuña reta ayorata jókuae mombɨrɨ oyererajaa güi. Yogüɨreko yeta mbɨakatu pe, mbaetɨta kia omongɨɨye, yogüɨreko pɨagüiveta.

¹¹ Che, peYa jae: Aï pe ndive pogüɨroasayepe vaerä. Amboaita opaete tëtaguasu reta jókuae opa pomoai moaia rupigua. Ërei pe mbaetɨta pomboai; jaeño aiporaraukata peve pereko oï rupi; ngaraa poeya peiporarambae.”

¹² YandeYa jei: “Pepere ipöambae ko, pembaerasɨ reta mbaetɨ ipöa.

¹³ Mbaetɨ kia oyemoambeko peré; mbaetɨ kia oipoano pepere, mbaetɨ moa chupegua.

¹⁴ Opaete pepotase vae iñakañɨ pegüi; mbaetɨ ma oyemoambeko reta peré. Che ko pombopere, tovaicho ombopere jovaicho rami, aiporarauka ete kavi peve, jeta ikavimbae peyapo jeko pegua, jare peyoa jeta yae jeko pegua.

¹⁵ ¿Maera pa peroäse pepere? Pembaerasɨ ipöambae ko. Ikavimbae jeta peyapo jeko pegua, jare peyoa jeta yae vae jeko pegua, körai poapo.

¹⁶ Ërei opaete pemboai vae, oyemboaita, jare opaete perovaicho oyererajata tembipɨɨrä iɨvɨ güi; amboaiukata jókuae pemboai vae, opaete jókuae opɨ̈ro mbae pegüi vae, oñepɨ̈rota vi mbae chugüi reta.

¹⁷ Ërei pombogüerata, aipoanota pegüi pepere reta, perovaicho reta jei tëita peve: ‘Sión oyemombo oï, mbaetɨ kia oyemoambeko jese.’ Che peYa ko jae kuae.”

¹⁸ YandeYa jei: “Aru yeta tembipɨɨ güi Jacob iñemuña reta, aiparareko yeta iɨvɨ; omopüa pɨau yeta tëta guasu oyemboaigüe, jare mburuvicha guasu jo, jendagüe pe.

¹⁹ Chugüi reta oëta tairari yasoropai pegua, jare yerovia katu pegua mbuka reta. Ngaraa iñemuña reta jagüe, echa che amoñemuñaukata. Ngaraa oñereröɨrouka reta, echa che amboeteukata.

²⁰ Israel iñemuña reta tenonde yave ramita, jare chemboete reta yeta metei rami; che aiporaraukata, opaete oiporarauka chupe vae reta pe.

²¹ Ipɨte reta güi oëta juvicharä: Oporookuai vae oëta ipɨte reta güi aeño. Amboyemboyaukata cheyé, echa, ¿kia pa ikɨ̈reɨta oya vaerä cheré?

²² Yogüɨrekota chembae retarä jare che aikota iTumparä. Che peYa ko jae kuae.”

²³ YandeYa iyarasɨ ama ɨvɨtuai reve vae rami ko, ama ɨvɨtuai reve rami oyepɨu iyoa vae reta re.

²⁴ YandeYa iyarasɨ ngaraa oasa, jae oipota vae, opa oyapo regua. Oväeta ara peikuaa vaerä kuae mbaembae reta.