JEREMÍAS 3 - Biblia Guarani Tumpa Iñee

Israel oyapo jupimbae yandeYa jóvai

¹ YandeYa jei: “Metei kuimbae omombo yave jembireko, javoi jókuae kuña ojo omenda ïru kuimbae ndive yave, tenondegua ime ngaraa ma güɨreko ye. ¡Jókuae nunga, ikavimbae yae ko kuae tëtaguasu peguarä! Ërei ngatu nde, Israel, jeta yae ko ndeaguasa, ërei ¡añave peyerova ye chekotɨ! Che ndeYa jae kuae.

² Emae ɨvɨtɨ reta iyapɨte re: ¿Kia nunga re ra mbaetɨ reyapo aguasa? Tape jembeɨ pe reguapɨse reäro reta, Arabiaɨgua reta oporoäro ñuu pe rami, remongɨa tëtaguasu ndeaguasa pota vae rupi, jare ikavimbae reyapo vae rupi.

³ Kuae jeko pegua mbaetɨ okɨ, jare ama taɨkuegua iara pe ave. Ndeaguasa pota vaeño rembotenonde; ¡mbaetɨ nemara!

⁴ ¿Rereä pa añave cheve: ‘CheRu, chetaɨrusu güɨroata vae,

⁵ ndearasɨ aveita pa reiko? ¿Ndearasɨta pa jekuae ave rupi?’ Körai rere tëi cheve reve, reyapo jeta mbae ikavimbae.”

YandeYa omboarakuaa Israel jare Judá oeya vaerä jeko ikavimbae

⁶ Josías mburuvicha guasurä oiko yave, yandeYa jei cheve: “¿Reecha pa ipɨapochɨ vae Israel oyapogüe? Jae ojo jare oñemee oyapo vaerä aguasa, opaete ɨvɨtɨ reta rupi jare ɨvɨra iküaraɨa kavi vae igüɨ rupi.

⁷ Ayemongeta ko kuae teko opa oyapo yave, oyerova yeta chekotɨ; ërei mbaetɨ oyerova. Jare ipɨkɨɨ ipɨapochɨ vae Judá oecha jókuae;

⁸ oecha vi amombo ipɨapochɨ vae Israel, iyaguasa pota jeko pegua; ërei ipɨkɨɨ ipɨapochɨ vae Judá, mbaetɨ oipoɨu, jaeño ojo vi oñemee oiko vaerä aguasa rupi.

⁹ Jare jókuae mbaeä etei chupe oyapo vae rupi güɨrokomegua kuae tëtaguasu. Yogüɨreko jupimbae cheróvai, omboete ita reta jare ɨvɨra reta.

¹⁰ Opaete kuaekuae rupi, ipɨkɨɨ ipɨapochɨ vae Judá mbaetɨ oyerova ye chekotɨ ipɨa reve, oyerova raangaiño añete vae nunga. Che ndeYa jae kuae ndeve.”

¹¹ YandeYa jei cheve: “Ipɨapochɨ vae Israel mbaetɨ jeko ete mbatee jupimbae vae Judá güi.

¹² Ekua jare emoërakua kuae ñee remae reve ɨvɨtuguasu kotɨ, jare ere: ‘YandeYa jei: ¡Peyerova ye chekotɨ ipɨapochɨ vae Israel! Ngaraa chearasɨ aitɨ nderé, echa che cheporoparareko vae ko, ngaraa chearasɨ aiko jekuae avei. Che ndeYa jae kuae ndeve.

¹³ Jaeño emombeu teko renoi vae, echa neäteɨ reyapo ndeYa Tumpa iporookuai, reeka reyemboaguasa vaerä ketɨgua reta ndive, opaete ɨvɨra iküaraɨa kavi vae igüɨ rupi, jare mbaetɨ reyapo cheporookuai. Che ndeYa jae kuae ndeve.’ ”

¹⁴ YandeYa jei: “Ipɨapochɨ vae reta, peyerova ye, che ko peYa. Perëta guasu ñavo güi aipɨɨta metei jare tëtara ñavo güi mókoi, jare pogüɨrajata Sión pe.

¹⁵ Ameeta peangarekoa retarä chepɨa potaa, jare jae reta peangarekota yarakuaa katu kavi reve.

¹⁶ Javoi jeta yae ma peñemuña perëtaguasu pe yave, ngaraa ma kia oyemoambeko käjou morogüɨrökuavee päve pegua yandeYa imbae re, kia ave ngaraa ma imaendúa jese, ngaraa ma vi oata, ngaraa vi ipɨau oyeapo. Che peYa, jae ndeve körai.

¹⁷ Jayave, Jerusalén oyembojeeta kuri yandeYa Iporookuaía; opaete tëtaguasu reta oyemboatɨta joko pe chemboete vaerä, ngaraa ma ipɨapochɨ rupi yogüɨreko ye.

¹⁸ Jókuae ara oväe ma yave, Judá oñemometeita Israel ndive, jare oyerova päveta ɨvɨtuguasu kotɨgua tëtaguasu kotɨ güi, che ɨvɨ amee iñemuñagüe reta pe vae pe.

Israel itumpa-raanga pota

¹⁹ Israel, che ko aipota reiko cheraɨrä, jare amee ndeve ɨvɨ ipotaa yae vae, tëtaguasu reta iɨvɨ ikavi yae vae. Ayemongeta ko rere vaerä cheve cheRu, jare mbaetɨ yeta resɨrɨ chegüi.

²⁰ Ërei metei kuña jeko kavimbae oeya ime rami, jökorai mbaetɨ ndereko ikavi cheve. Che peYa, jae.

²¹ Oyeendu sapúkai ɨvɨtɨ re. ¡Jae ko Israel iñemuña reta, oyaeo reta oiporu mboroparareko! Opia reta tape sɨmbi vae güi, jare iñakañɨ reta, che iYa iTumpa güi.

²² Peyerova ye chekotɨ, cheraɨ ipɨapochɨ vae reta, jare che popoanota pepɨapochɨ güi.” “Ko royu ndekotɨ, echa nde jae ko oreYa Tumpa.

Israel pegua reta omboyevɨ yandeYa pe

²³ Mbaetɨ etei mbaerä osirive oreve rosapúkai ɨvɨtɨ re vae; jaeño nde oreYa Tumpa re roväe yemborɨ.

²⁴ Oretumpa-raanga pota vae, opa omokañɨteiuka oreñemuñagüe reta oväe orendei yave güive vae; jae ko: Vecha reta, guaka reta, taɨ reta jare tayɨ reta.

²⁵ Oreropa jare oremara yae, echa orendei güive añave regua, ore jare oreñemuñagüe reta oreyoa nde oreYa Tumpa kotɨ, jare mbaetɨ royapo nde rere vae.”