JEREMÍAS 28 - Biblia Guarani Tumpa Iñee

Hananías omoërakua raanga vae regua

¹ Pandepoa yasɨ jókuae año, jae ko irundɨa año ma Sedequías oï mburuvicha guasurä Judá pe yave, ñeemombeúa Hananías, Azur taɨ, tëta Gabaón-ɨgua, jei cheve tupao pe, sacerdote reta jare opaete vae reta jóvai:

² —YandeYa Imbaepuere yae ete vae Israel iTumpa jei: “Amopëta yuvo mburuvicha guasu Babilonia pegua güi, jare

³ mókoi añoa re aruruka yeta kuae pe, opaete jókuae tembiporu reta tupao pegua, mburuvicha guasu Nabucodonosor güɨrajagüe.

⁴ Jare aruruka yeta kuae pe Jeconías, Joacim taɨ, jae ko mburuvicha guasu Judá pegua, jare opaete oyereraja Judá güi Babilonia pe vae. Echa che amopëta yuvo mburuvicha guasu Babilonia pegua güi.”

⁵ Jayave ñeemombeúa Jeremías jei ñeemombeúa Hananías pe, opaete sacerdote jare opaete vae reta ñogüɨnoi tupao pe vae jóvai:

⁶ —¡Añete mona yandeYa oyapo jökorai! ¡Mbae mona yandeYa ombopo ñee reta rere vae, jare oyereru ye tembiporu reta tupao pegua, jare oyereru ye iɨvɨ pe opaete oyererajauka Babilonia pe vae!

⁷ Ërei eyeapɨsaka kuae jaeta ndeve jare opaete vae reta pe vae re:

⁸ Tenonde yogüɨreko ñeemombeúa reta ndei che ani nde reiko mbove vae, omoërakua reta ñeraro, tembiporara jare mbaerasɨ ovakatu vae opaete tëtaguasu reta kotɨ jare mborookuaía reta kotɨ.

⁹ Ërei metei ñeemombeúa omoërakua yave mbae ikavi vae, iñee oyembopo yaveño opaete vae güɨroviata Tumpa ko ombou vae.

¹⁰ Jayave ñeemombeúa Hananías oekɨ yuvo, ñeemombeúa Jeremías güi iyayu re güɨnoi vae jare opa omopë mopë,

¹¹ javoi jei opaete vae reta pe: —YandeYa jei: “Köraita ko kuae güi mókoi añoa rupi aekɨ yuvo opaete tëtaguasu reta iyayu güi, Nabucodonosor, mburuvicha guasu Babilonia pegua iyuvo, jare opata amopë mopë.” Jare Jeremías ojo joko güi.

¹² Mbovɨ ara rupi, Hananías oekɨ jare opa omopë mopë güire Jeremías güi yuvo iyayu re güɨnoi vae, yandeYa jei Jeremías pe körai:

¹³ “Ekua ere Hananías pe, che peYa jae: Opa remopë mopë yuvo ɨvɨra pegua, ërei che amokätɨro nderé metei yuvo jiero pegua.

¹⁴ Echa che ndeYa Imbaepuere yae ete vae Israel iTumpa, jae: Añono opaete tëtaguasu reta iyayu re yuvo jiero pegua, oyeokuai reta vaerä Nabucodonosor, mburuvicha guasu Babilonia pegua pe. Mɨmba ñana rupigua reta ave amee ipo pe.”

¹⁵ Jayave ñeemombeúa Jeremías jei ñeemombeúa Hananías pe: —¡Eyeapɨsaka, Hananías! YandeYa mbaetɨ tëi ndembou, ërei nde rembotavɨ kuae tëta, reroviauka chupe reta añetembae.

¹⁶ Jáeramo, yandeYa jei: “Romokañɨteita kuae ɨvɨ iárambo güi. Kuae año remanota, echa neñee jeko pegua opaete vae reta oyembopɨapochɨ chekotɨ.”

¹⁷ Jare jókuae año voi, chiúa yasɨ pe, ñeemombeúa Hananías omano.