JEREMÍAS 26 - Biblia Guarani Tumpa Iñee

Jeremías oyemomburu omano vaerä

¹ Joacim, Josías taɨ omboɨpɨ oï mburuvicha guasurä Judá pe yave, yandeYa jei Jeremías pe:

² “Eyemboɨ chetupao joka pe jare nemiari opaete tëta guasu reta Judá pegua güi yogüeru ombaemboete vaerä tupao pe vae reta pe, opaete cheñee reta royókuai nemiari vaerä chupe reta vae. Agüɨye eeya metei ave ñee reta.

³ Güɨramoi oendu reta, jare oeya reta metei vae ñavo jeko kavimbae; jayave che aipoepɨta cheyemongeta, ayapota tëi ikavimbae chupe reta vae, jembiapo reta ikavimbae jeko pegua re vae.

⁴ Ere chupe reta, körai jei yandeYa: ‘Peendúä cheve peguata vaerä cheporookuai añono peróvai vae rupi yave,

⁵ ani mbaetɨ peipota peyeapɨsaka vaerä cherembiokuai reta ñeemombeúa re, che ambou peve iyɨpɨ güive osondombae reve vae reta, jare kuae reta re mbaetɨ peyeapɨsaka yave,

⁶ che ayapota kuae tupao ndive, Silo ayapo rami. Jare kuae tëta guasu añonota yepopeyu pe, opaete tëtaguasu reta ɨvɨ pegua reta jóvai.’ ”

⁷ Jare sacerdote reta, ñeemombeúa reta jare opaete vae reta oendu Jeremías imiari kuae ñee reta yandeYa itupao pe vae.

⁸ Jare Jeremías opa ma imiari opaete yandeYa oyókuai jei vaerä opaete vae reta pe yave; sacerdote reta, ñeemombeúa reta jare opaete vae reta oipɨɨ Jeremías, jei reve chupe: “¡Remanota ko añave!

⁹ ¿Maera pa rere yandeYa jee re: ‘Kuae tupao oasata Silo oasa rami, jare kuae tëta guasu oyemboaita, ipombae opɨta regua’?” Jare opaete vae reta oyomboatɨ Jeremías kotɨ, yandeYa itupao pe.

¹⁰ Judá pegua mburuvicha reta oendu kuae mbaembae re yave, yogüɨraja mburuvicha guasu jo güi yandeYa itupao pe, jare oguapɨ reta Öke Pɨau jöke pe, yandeYa itupao pe.

¹¹ Jayave sacerdote reta jare ñeemombeúa reta, omoë reta iñee mburuvicha reta pe jare opaete vae reta pe, jei reve: “Kuae kuimbae omanota ko, echa omoërakua kuae tëta guasu kotɨ maratuta vae. Pe reta etei peendu rami.”

¹² Javoi Jeremías imiari opaete mburuvicha reta pe jare opaete vae reta pe, jei: “YandeYa chembou amoërakua vaerä kuae tupao kotɨ jare kuae tëta guasu kotɨ, opaete kuae ñee reta peendu vae.

¹³ Añave peyeapo kavi pereko reta güi jare perembiapo reta güi, jare peendu peYa Tumpa iñee, jayave yandeYa oipoepɨta iyemongeta, oyapota tëi ikavimbae peve vae güi.

¹⁴ Ërei che, ko aï pepo pe; peyapo cheve peve jaekavita jare jupi vae.

¹⁵ Ërei peikuaa kavi peyeupe: Cheyuka yave, pe reta, kuae tëta guasu jare opaete yogüɨreko pɨpe vae reta penoita teko, jekombae jugüɨ re; echa añetete ko yandeYa chembou pépɨri, amoërakua vaerä peve etei opaete kuae ñee reta.”

¹⁶ Jayave mburuvicha reta jare opaete vae reta jei sacerdote reta pe jare ñeemombeúa reta pe: “Mbaetɨ teko güɨnoi kuae kuimbae omano vaerä, echa yandeYa Tumpa jee re imiari yandeve.”

¹⁷ Javoi opüa amogüe tenondegua reta jókuae ɨvɨ pegua, jare imiari opaete joko pe yatɨ vae reta pe, jei reve:

¹⁸ “Miqueas, Moreset pegua omoërakua Tumpa iñee, Ezequías oiko mburuvicha guasurä Judá pe yave, imiari opaete Judá pegua reta pe, jei: ‘Körai jei yandeYa Imbaepuere yae ete vae: Sión opɨtata, metei ko pe ɨvɨ opa oyemongúi vae rami, Jerusalén opɨtata jendagüeño, jare ɨvɨtɨ tupao jendagüe pe okuakuaata ɨvɨra.’

¹⁹ ¿Mburuvicha guasu Ezequías jare opaete Judá pegua reta oyuka yera Miqueas? Okɨɨye reta yandeYa güi, jare oyerure chupe. Jare yandeYa ¿oipoepɨä yera iyemongeta, oyapota tëi ikavimbae ikotɨ reta vae güi? Jayave yande, ¿yayapota pa ikavimbae yae vae yandekotɨ ae?”

²⁰ Jökoraiño vi ñeemombeúa Urías, Semaías taɨ, tëta Quiriat-jearim pegua, omoërakua yandeYa jee re kuae tëta guasu kotɨ jare opaete kuae ɨvɨ re, Jeremías omoërakua rami.

²¹ Mburuvicha guasu Joacim, iyɨvɨrigua reta jare imborɨka mburuvicha reta oendu jeigüe vae yave, mburuvicha guasu ikɨ̈reɨ oyukauka. Ërei Urías oikuaa jókuae yave, okɨɨye jare otekuarai Egipto kotɨ.

²² Mburuvicha guasu Joacim omondo Egipto pe Elnatán, Acbor taɨ, jare ïru kuimbae reta ndive,

²³ kuae reta güeru Egipto güi Urías, jare omee mburuvicha guasu Joacim ipo pe; jae omondo oyukauka jare jëogüegüe oñotɨuka oipotagüe ramiño.

²⁴ Ërei Ahicam, Safán taɨ, omoë iñee oepɨ vaerä Jeremías, jare kuae jei vae rupi mbaetɨ omboeterenga reta Jeremías opaete vae reta ipo pe, oyuka reta vaerä.