JEREMÍAS 25 - Biblia Guarani Tumpa Iñee

Setenta año rupi ɨvɨ ipombae oiko vae regua

¹ Irundɨa año ma mburuvicha guasurä oiko Joacim, Josías taɨ Judá pe yave, yandeYa jei Jeremías pe opaete ɨvɨ Judá regua. Jae ko tenondegua año re, Nabucodonosor oiko mburuvicha guasurä Babilonia pe yave.

² Ñeemombeúa Jeremías omombeu opaete vae Judá pegua pe jare Jerusalén pe yogüɨreko vae reta pe. Jei:

³ “Josías, Amón taɨ trece año ma oiko mburuvicha guasurä Judá pe yave güive añave regua, yandeYa imiari cheve, jae ko veintitré año ma, jare che chemiari voi peve cheapɨmbae reve, ërei mbaetɨ peendu cheve.

⁴ Jare yepe tëi yandeYa ombou voi peve iñeemombeúa reta, ërei pe reta mbaetɨ peyapo jeigüe, mbaetɨ vi peipota kërai ave peyeapɨsaka jese.

⁵ Jae reta jei peve: ‘Peeya pereko kavimbae jare perembiapo pɨ̈chɨi yae vae; pepuere vaerä peiko ɨvɨ yandeYa omee peve jare peñemuñagüe reta pe jekuae avei pegua vae pe.

⁶ Agüɨye pemboete tumpa ambuae reta; agüɨye peyeokuai chupe reta, agüɨye vi pemboete. Agüɨye pemboarasɨuka yandeYa, pemboete tumpa reta pe aeño peyapo peyeupe vae rupi, jayave jae ngaraa ombou peve mbae ikavimbae.’

⁷ Ërei yandeYa jei añave: ‘Pe reta mbaetɨ peipota peyapo che jae vae; chemboarasɨuka pemboete tumpa reta pe aeño peyapo peyeupe vae rupi; kuae ikavimbae peyapo vae peyeupeguarä aeño ko.’

⁸ Jáeramo yandeYa Imbaepuere yae ete vae jei: ‘Pe reta mbaetɨ ma peendu amombeu tëi peve peyapo vaerä vae jeko pegua,

⁹ ambouta opaete tëtaguasu reta ɨvɨtuguasu kotɨgua jare cherembiokuai Nabucodonosor mburuvicha guasu Babilonia pegua opüa vaerä kuae ɨvɨ re, jare opaete pɨpegua reta re jare opaete iyɨvɨrigua tëtaguasu reta re. Opaeteita amboai. Aeyata yeyóyai yóyai rupi yogüɨreko, jekuae avei pegua.

¹⁰ Amokañɨta chugüi reta tairari reta vɨakatu pegua jare yerovia pegua, jare tairari mendaa pegua, ombaeso vae ave ngaraa ma oyeendu ani mechero ave ngaraa ma jendɨ oyekuaa.

¹¹ Opaeteita kuae tëtaguasu oyemboai; jare opɨtata tëtagüerä. Setenta año rupi kuae tëtaguasu reta yogüɨrekota mburuvicha guasu Babilonia pegua ipo pe.

¹² Jare oupitɨ ma setenta año yave, aiporaraukata mburuvicha guasu Babilonia pegua pe jare opaete jókuae tëtaguasu pe, iyoa jeko pegua; jae ko Caldeaɨgua reta iɨvɨ; amboaita jekuae avei pegua. Che ndeYa ko jae kuae.

¹³ Ambouta jókuae tëtaguasu re opaete amoërakua jare oyekuatía oï kuae tembikuatía pe vae; jae ko opaete Jeremías omoërakua tëtaguasu reta kotɨ vae.

¹⁴ Tëtaguasu reta tuichagüe jare mburuvicha guasu reta imbaepuere yae vae ipo pe oa retata vi Caldeaɨgua reta. Jökorai aiporaraukata chupe reta jeko reta oï rupi.’ ”

Tëtaguasu reta oiporarata vae regua

¹⁵ YandeYa, Israel iTumpa jei cheve: “Eipɨɨ kuae kopa tɨnɨe chearasɨ pe vae, vino pe tɨnɨe rami vae, jare emee toɨu jese opaete tëtaguasu reta romondotaa rupi.

¹⁶ Oɨu reta jese yave, jesagüɨrɨ retata jare imbokere rami opɨta retata, ñeraro ambouta chupe reta vae jeko pegua.”

¹⁷ Che aipɨɨ jókuae kopa yandeYa ipo güi, jare amee oɨu jese opaete tëtaguasu reta jae chemondoa rupi.

¹⁸ Amee oɨu jese Jerusalén jare tëta guasu reta Judá pegua, mburuvicha guasu reta jare mburuvicha reta, oyemboai vaerä jare oyeeya vaerä tëtagüerä, oyeyóyai yóyai vaerä, yepopeyurä, añave oasa oï rami.

¹⁹ Amee vi oɨu jese Faraón mburuvicha guasu Egipto pegua, jare iyɨvɨrigua reta jare mburuvicha reta jare opaete jëta pegua reta,

²⁰ jare opaete joko pe yogüɨreko ïru tëtaguasu pegua reta vae, jare opaete mburuvicha guasu reta ɨvɨ Uz pegua reta jare filisteo reta iɨvɨ pegua: Ascalón, Gaza, Ecrón jare Asdod güi jembɨregüe reta;

²¹ Edom, Moab jare Amón iñemuña reta;

²² opaete mburuvicha guasu reta Tiro pegua jare Sidón pegua; jare opaete Ɨguasu Mediterráneo jembeɨ rupigua reta;

²³ Dedán, Tema jare Buz jare opaete iñäka-ɨke oñapi vae reta;

²⁴ opaete mburuvicha guasu reta Arabia pegua; opaete mburuvicha guasu reta yogüɨreko ñuu rupi vae;

²⁵ opaete mburuvicha guasu reta Zimri pegua, Elam jare Media pegua reta;

²⁶ opaete mburuvicha guasu ɨvɨtuguasu kotɨgua, köiño vae ani mombɨrɨ yogüɨreko oyougüi vae. Opaete mborookuaía reta ɨvɨ pegua. Jare taɨkue ete oɨuta jese mburuvicha guasu Babilonia pegua.

²⁷ Jaɨkue rupi yandeYa jei cheve: “Ere chupe reta che peYa Imbaepuere yae ete vae, Israel iTumpa ayókuai oɨu reta vaerä jese, oyembosavaɨpo regua, ogüëe jare togüɨapi, opüa yembae vaerä, ñeraro ambouta chupe vae jeko pegua.

²⁸ Jare mbaetɨ oipota reta oipɨɨ ndegüi kopa oɨu vaerä yave, ere chupe reta: ‘CheYa Imbaepuere yae ete vae jei: Reɨu ñotai ko jese.

²⁹ Echa amboɨpɨta amondo cheporonupa tëta guasu chembaerä oñeñono tee vae re, ¿perovia pa pe reta mbaetɨta peñenupa? Ngaraa pepɨta jökoraiño, echa ambouta ñeraro opaete ɨvɨ pegua reta re. Che peYa Imbaepuere yae ete vae ko jae.’

³⁰ Nde, Jeremías, emoërakua opaete kuaekuae reta. Ere chupe reta: ‘CheYa iñeeäta ɨvate güi, jae oikoa ikɨambaea güi. Imbae vae reta kotɨ iñeeäta; uva oitɨami vae itairari, otairarita opaete ɨvɨ pegua reta kotɨ.

³¹ Jɨapugüe oyeenduta ɨvɨ iyapɨ kotɨ, echa yandeYa ojäata tëtaguasu reta, oenɨita ojäa vaerä opaete vae reta, omeeta jupimbae reta mano pe. Jei yandeYa.’ ”

³² YandeYa Imbaepuere yae ete vae jei: “Susere yavaetegüe outa ma oväe, tëtaguasu reta ñavo rupi ojota; ama ɨvɨtuai reve tuichagüe opüata ɨvɨ iyapɨ kotɨ güi.”

³³ YandeYa oyukauka jókuae ara vae, oñemoaita ɨvɨ jembeɨ güive ïru jembeɨ pe. Ngaraa etei kia oyaeo jese reta vae, mbaetɨta kia güɨraja jetegüe oñotɨ vae; oñemoaita opɨta ɨvɨ rupi tepoti rami.

³⁴ ¡Vecha iyangarekoa reta, peräse mbae jasɨ güi! ¡Pe reta, vecha reta jeroataa reta, peyapayere ɨvɨ rupi! Echa oväe ara peyeyukauka vaerä jare opa vaerä peñemoai moai; opata peyeyuka vecha kuimbae rami.

³⁵ Vecha iyangarekoa reta ngaraa ipuere otekuarai, vecha reta jeroataa reta ngaraa ojoyepe.

³⁶ Jäse vecha iyangarekoa reta, vecha reta jeroataa reta güɨroäse jɨmba jembiumbae, echa yandeYa opa omboai ikapii reta.

³⁷ YandeYa iyarasɨ, jare opa omboai kapii katu.

³⁸ Oë, yaguapope raɨ jaitɨ oeya rami, echa ɨvɨ oyemboai opɨta, tovaicho reta iyarasɨ rupi, yandeYa iyarasɨ ramo.