JEREMÍAS 24 - Biblia Guarani Tumpa Iñee

Ɨva ikavi vae jare ikavimbae vae re oyembojaanga vae

¹ Nabucodonosor mburuvicha guasu Babilonia pegua güɨraja güire Jeconías mburuvicha guasu Judá pegua, Joacim taɨ, jare mburuvicha reta Judá pegua ndive, ipoki mbae oyapo vae reta jare jiero pegua mbaravɨkɨ iyapoa reta Jerusalén pegua, yandeYa oechauka cheve mókoi kanata ɨva, yandeYa itupao jóvai.

² Metei kanata pe oï ɨva ikavigüe, tenonde yagüɨye vae, ërei ïru pe oï ɨva ikavimbae, mbaetɨ etei ikavi oyeu vaerä vae.

³ Jare yandeYa oparandu cheve: “Jeremías, ¿mbae pa reecha?” Che jae chupe: “Ɨva. Ɨva ikavi vae, ikavi yae vae jare ɨva ikavimbae, ikavimbae yae vae, mbaetɨ etei ikavi oyeu vaerä vae.”

⁴ Jayave yandeYa jei cheve:

⁵ “Che ndeYa, Israel iTumpa, jae: Judá re amaeta ɨva ikavi yae vae rami, jókuae amee opa oyererajauka Caldeaɨgua reta iɨvɨ pe vae reta. Aipararekota amae jese reta.

⁶ Ayangarekota jese reta, jare aru yeta kuae ɨvɨ pe. Amopüa reta yeta jare ngaraa ma amboai ye, añono retata jenda pe jare ngaraa ma anoe ye.

⁷ Ameeta chupe reta kɨ̈reɨ ngatu, chekuaa reta vaerä che ko jae iYa, jare yogüɨrekota chembae retarä, jare che aikota iTumparä, echa oyerova reta yeta chekotɨ opaete ipɨa ndive.

⁸ Ërei ngatu Sedequías, mburuvicha guasu Judá pegua, jare mburuvicha reta jare ïru Jerusalén pegua reta opɨtaño kuae ɨvɨ pe vae, ani oñemoëta Egipto pe vae, amaeta jese reta ɨva ikavimbae yae vae rami, jókuae mbaetɨ etei ikavi oyeu vaerä vae rami.

⁹ Ayapota chupe reta vae rupi opaete tëtaguasu reta okɨɨye yaeta, jare omae kavi potaä jese reta; yogüɨrekota susere rupi jare ñeerä, yeyóyai yóyai rupi jare yepopeyurä opaete ɨvɨ rupi che amoai moaia rupi.

¹⁰ Amondota chupe reta ñeraro, karuai jare mbaerasɨ ovakatu vae, opaetei okañɨ reta regua, ɨvɨ che amee chupe reta jare iñemuñagüe reta pe vae güi.”