JEREMÍAS 23 - Biblia Guarani Tumpa Iñee

Jembɨregüe reta oyerova ye vae regua

¹ YandeYa jei: “¡Paravete jókuae maangarekoa reta, oyuka jare opa omoai moai chevecha reta jókai güi vae!”

² Jáeramo körai jei yandeYa Israel iTumpa, cherëta re oyangareko vae reta pe: “Pe reta opa pemoai moai jare peiämondo chevecha reta jare mbaetɨ peyangareko jese. Mase, añave aiporaraukata peve perembiapo kavimbae re. Che ndeYa ko jae kuae.

³ Che etei aru yeta chevecha reta jembɨregüe, opaete ɨvɨ rupi amoaia kotɨ güi, jare aru yeta yogüɨrekosea pe; okuakuaata jare jeta oñemuña retata.

⁴ Jare maangarekoa reta añonota oyangareko vaerä jese reta; jare ngaraa ye ma oipoɨu jare okɨɨye reta, ngaraa etei ma vi okañɨ reta. Che ndeYa ko jae kuae.”

⁵ YandeYa jei: “Mase, oväeta ara amopüa vaerä David iñemuña güi, metei jupi vae, jae oikota mburuvicha guasurä yarakuaa katu reve, jare jae ikavi yaeta, jare oyapota morojäa jare jupi vae kuae tëtaguasu pe.

⁶ Jae oï ma yave Judá oyeyorata, jare Israel oiko pɨagüiveta. Jae kuae oikota jeerä, pɨpe ombojee retata: ‘YandeYa ko jae jupi vae yandeveguarä vae.’ ”

⁷ Jáeramo yandeYa jei: “Oväeta ara, ngaraa ma jei reta Tumpa oikove avei vae jee re: ‘YandeYa oikove avei vae jee re, Israel iñemuña reta güɨnoe ɨvɨ Egipto güi vae.’

⁸ Jaeño jei retata: ‘YandeYa oikove avei vae jee re Israel iñemuña reta güɨnoe ɨvɨtuguasu kotɨgua ɨvɨ güi vae jare opaete ïru tëtaguasu reta rupi jae opa omoai moaia kotɨ güi vae.’ Jare yogüɨreko retata iɨvɨ ae pe.”

Ñeemombeúa jaanga reta kotɨ oñemoërakua vae

⁹ Ñeemombeúa reta regua oñemoërakua jeko pegua, chepɨatɨtɨ yae aï; opaetei cherete orɨrɨi, osavaɨpogüe rami aï, vino jou mbatee vae rami, yandeYa jare iñee ikɨambae jeko pegua.

¹⁰ Echa tëtaguasu tɨnɨe iyaguasa pota vae reta, kuimbae reta osɨi oyapo ikavimbae, imbaepuere oiporu reta jupimbae oyapo reta vaerä. Jáeramo yandeYa oyepopeyu ɨvɨ re, jare ɨvɨ otini, jare kapii ñuu rupigua opa ipiru.

¹¹ YandeYa jei: “Ñeemombeúa reta jare sacerdote reta ave iyoa; chetupao pe ave aväe ikavimbae oyapo reta vae.

¹² Jáeramo jape reta pɨtumimbi jare iïchɨi yae ramita; omoañaukata jare ogüɨapi retata, echa che aruta jese reta ikavimbae, oväe yave ara oiporara reta vaerä. Che ndeYa ko jae kuae.

¹³ Che aecha ñeemombeúa reta Samaria pegua, oyapo reta mbae ikavimbae yae vae chemboarasɨuka vaerä; omombeu reta Baal jee re mbae maratuta vae, jare chembae vae Israel iñemuña reta pe oyavɨuka reta.

¹⁴ Che aecha ñeemombeúa reta Jerusalén pegua oyapo mbae pɨ̈chɨi yae vae; oyapo reta aguasa jare oporombotavɨ reta, jökorai omoäta ngatu reta jeko kavimbae reta, agüɨye vaerä oyepoepɨ reta jeko kavimbae güi. Jae reta jare tëta pegua reta, Sodoma jare Gomorra rami ko cheve.

¹⁵ Jáeramo che, peYa Imbaepuere yae ete vae, jae körai kuae ñeemombeúa reta kotɨ: Ameeta jou reta mbae iro yae vae, jare ameeta oɨu reta ɨ oyemombayachigüe re, echa ñeemombeúa Jerusalén pegua reta güi, ikavimbae oñemoai opaete kuae tëtaguasu rupi.”

¹⁶ YandeYa Imbaepuere yae ete vae jei: “Israel iñemuña reta, agüɨye peyapo ñeemombeúa reta omoërakua peve vae. Omombeu peve vae apu ko, iyeugüi aeño ko jei reta, che mbaetɨ ko jae chupe reta.

¹⁷ Cheñee güɨröɨro vae reta pe jei reta: ‘YandeYa jei opaete mbae oë kavita ko peve.’ Jare opaete ipɨa jeigüe reño yogüɨreko vae reta pe jei reta: ‘Ngaraa mbae ikavimbae ou peve.’ ”

Jeremías ipɨakañɨ

¹⁸ Echa ¿kia pa oikuaa yandeYa iyemongeta reta yaikuaambae vae? ¿Kia pa oecha jare oendu iñee? ¿Kia pa oyeapɨsaka jese?

¹⁹ YandeYa iyarasɨ outa ama ɨvɨtuai reve rami; outa ama ɨvɨtuai reve rami jeko kavimbae reta re.

²⁰ Ngaraa osɨrɨ yandeYa iyarasɨ, oyeapo regua jae oyapota vae, oyapo regua jae ipɨa pe oyemongeta vae. Oväeta ara peikuaa kavi vaerä kuae mbaembae reta.

YandeYa omoërakua ñeemombeúa jaanga reta kotɨ vae

²¹ “Che mbaetɨ ko ayókuai jókuae ñeemombeúa reta, ërei jae reta yogüɨrajaño; kërai ave mbaetɨ chemiari chupe reta, ërei jae reta omoërakua mbae maratuta vae.

²² Oikuaa reta yave mona cheyemongeta reta oyekuaambae vae, oikuaaukata tëi ko cheñee chembae vae reta pe; omombiata tëi ko jeko ikavimbae güi, jare jembiapo reta ikavimbae güi.”

²³ YandeYa jei: “Che ko jae Tumpa aï opaete rupi vae, mbaetɨ aï meteia peño.

²⁴ ¿Oime ra kia ipuereta oñemi chegüi vae? che, opaete rupi ko aï, ara pe jare ɨvɨ pe. Che peYa ko jae kuae.

²⁵ Aendu jókuae ñeemombeúa reta iyapu reve omoërakua mbae maratuta vae cheree re vae, jare jei reta che chemiari jae reta ndive ipaɨu rupi vae.

²⁶ ¿Kërai yave regua ra jókuae ñeemombeúa jaanga reta omoërakuata apu, iyeugüi aeño jei reta vae?

²⁷ ¿Oyemongeta reta ra, jókuae ipaɨu reta re imiari oyoupe vae rupi omombiata chegüi chembae vae reta, iñemuñagüe reta ñakañɨ chegüi jare omboete reta Baal rami?

²⁸ ¡Metei ñeemombeúa opaɨu yave, tomombeu opaɨu ko vae; ërei cheñee omboresive ko yave, tomombeu kavi añetegüe! Mbaetɨi ko kapii oyovake trigo ndive.

²⁹ Cheñee ko tata rami, jare martillo opa oyoka ita guasu vae rami. Che ndeYa ko jae kuae.

³⁰ Jáeramo ayovaicho ñeemombeúa reta kotɨ, jókuae omombeu reta oyoupe vae re oyemombae reta oyougüi vae reta kotɨ. Jókuae omoërakua reta cheñee rami vae.

³¹ Mase, ko ayovaicho jókuae ñeemombeúa reta kotɨ, omombeu reta cheñee rami, jókuae iyeugüi aeño omombeu reta vae.

³² Che ayovaicho jókuae ñeemombeúa reta omombeu ipaɨu añetembae vae reta kotɨ; iñee ngatu jare iñee-yukɨ rupi oyavɨuka chembae vae reta pe. Che mbaetɨ ko ambou, mbaetɨ vi ayókuai, jayave jókuae reta mbaetɨ etei ko ipuere omborɨ opaete vae reta. Che ndeYa ko jae kuae.

Kërai yamombeu vaerä yandeYa iñee

³³ Jeremías, kia nunga vae tëta pegua oparandu ndeve yave, ani metei ñeemombeúa, ani metei sacerdote: ‘¿Mbae pa ko yandeYa jei?’ Ere chupe reta: ‘YandeYa jei peve, pereeyata.’

³⁴ Jare metei ñeemombeúa ani metei sacerdote ani kia nunga vae tëta pegua jei yave: ‘YandeYa omoërakua mbae maratuta vae’, che taiporarauka chupe jare jo pegua reta pe.

³⁵ Kia oparandu metei iñeïru pe, ani jëtara pe yave, ipuere jei: ‘¿Mbae jei pa yandeYa? ¿Mbae pa jei?’

³⁶ Agüɨye ye mo pere: ‘YandeYa omoërakua mbae maratuta vae’, echa kia jei yave jókuae ñee, amboyevɨta chupe jókuae jae omoërakuagüe. Echa pe reta peipoepɨ yandeYa oikove vae iñee, peTumpa, yandeYa Imbaepuere yae ete vae.

³⁷ Jeremías, eparandu ñeemombeúa reta pe: ‘¿Mbae jei pa yandeYa? ¿Mbae pa jei?’

³⁸ Jei reta yave: ‘YandeYa omoërakua mbae maratuta vae’, ere chupe reta: ‘YandeYa jei: Pe reta jekuaeño pere jókuae ñee ayopia pegüi vae,

³⁹ jáeramo, che cheakañɨta pegüi, jare pomombota cheyeugüi jare tëta guasu amee peve vae jare peñemuñagüe reta pe vae.

⁴⁰ Jare aruta peré ñemomichi jekuae avei pegua jare ñemomaraiasɨ mbaetɨta peakañɨ chugüi vae.’ ”