JEREMÍAS 22 - Biblia Guarani Tumpa Iñee

Mburuvicha guasu reta Judá pegua maratuta vae

¹ YandeYa jei cheve körai: “Ekua mburuvicha guasu Judá pegua jo kotɨ jare nemiari kuae ñee

² mburuvicha guasu Judá pegua jóvai, David iguapɨa pe oguapɨ oï vae jare iyɨvɨrigua reta jare opaete tëta pegua reta jóvai, ere: ‘Peyeapɨsaka yandeYa iñee re.

³ Kuae pe, peyapo jupi vae jare sɨmbi vae, peyora jasɨ katu oiko vae oporogüɨrekoasɨ katu vae ipo güi, agüɨye pembotavɨ ani mbae peñomi ketɨgua güi, tɨ̈reɨ güi ani imemano vae güi. Agüɨye peyuka jekombae.

⁴ Echa kuae che poyókuai vae, añetete peyapo yave, oime aveita mburuvicha guasu oguapɨ vaerä David iguapɨa pe; jae oiketa käretou pe kavayu ndive kuae mburuvicha guasu jo jöke rupi; yogüeru reve jae ndive iyɨvɨrigua reta jare opaete vae reta.

⁵ Ërei mbaetɨ yave peyapo kuae oyemombeu peve vae, cheyé aeño añererökuavee, kuae mburuvicha guasu jo opaeteita oyemboai.’ ”

⁶ Echa yandeYa jei mburuvicha guasu Judá pegua jo kotɨ: “Nde ko chevegua nepöra yae ɨvɨtɨ Galaad rami, ɨvɨtɨ Líbano iyapɨte rami, ërei ngatu ropoepɨta ñuurä, ɨvɨ ipombae vaerä.

⁷ Ambouta ndeve kuimbae reta jembiporu ñeraro pegua reve reve, nemokañɨtei vaerä. Oyasɨata nderokɨta reta ɨ̈vɨrare ikavigüe yae vae, jare oñono retata tata pe.

⁸ Jeta ïru tëtaguasu pegua reta oasa kuae tëta guasugüe iyɨ́vɨri rupi vae, oparanduta oyoupe: ‘¿Maera ra körai oyapo kuae tëta tuicha yae vae iYa Tumpa?’

⁹ Jare jeita chupe reta: ‘Echa oeya reta morogüɨrökuavee päve iYa Tumpa omee chupe reta vae, omboete reta tumpa ambuae reta jare oyeokuai reta chupe.’ ”

Jeremías omoërakua Salum (Joacaz) regua

^10-12 Agüɨye peäpiro mburuvicha guasu Josías, agüɨye peäpiro omanogüe; peäpiro taɨ Salum, tu jekovia pe oguapɨ mburuvicharä vae, echa oyereraja ko ou yembae vaerä; ngaraa ye ma oecha iɨvɨ oa pɨpe vae.

¹³ “¡Paravete, nde ikavimbae rupi jare jupimbae rupi remopüa nderorä vae; nde remombaravɨkɨ ïru vae reta remboepɨmbae reve chupe iparavɨkɨ reta jepɨ!

¹⁴ Rere: ‘Tamopüa cheyeupe o tuicha vae, o ipɨguasu vae.’ Jare removentana, reñova ɨ̈vɨrare pe, jare remopɨ̈ta kavi.

¹⁵ ¿Reyemongeta pa mburuvicha guasurä reï ndero reñova kavi ɨ̈vɨrare pe jeko pegua? Nderu oiko kavi, echa oyapo jupi vae jare sɨmbi vae, jáeramo oë kavi opaete mbaembae chupe.

¹⁶ Oepɨ yepi paravete vae reta, jare oikoasɨ katu vae reta, jáeramo oë kavi chupe opaete mbaembae. Jökorai ko jókuae chekuaa vae. Che ndeYa ko jae kuae.

¹⁷ Ërei nde jaeño reyemoambeko, reipota rai vae renoi vaerä; jare reyukauka vaerä jekombae, rerekoasɨ katu jare ndembaeyuvanga katu nerëta re.”

¹⁸ YandeYa jei Joacim Josías taɨ, mburuvicha guasu Judá pegua regua: “Ngaraa kia oäpiro imano. Ngaraa kia reta oyaeo jare jei: ‘¡Atataɨ, cherëtara! ¡Atataɨ, chereindɨ!’ ‘¡Atataɨ, cheya! ¡Atataɨ, cheruvicha!’

¹⁹ Mburika omano ramiñota oyapo reta; ombotɨrɨrɨta güɨraja omombo, Jerusalén güi ikatu pe.”

Jerusalén regua oñemoërakua vae

²⁰ “¡Judá, eyeupi ɨvɨtɨ Líbano re jare esapúkai! ¡Ɨvɨtɨ Basán re esapúkai! ¡Esapúkai ɨvɨtɨ Abarim güive, echa opaete ndeporopota jese vae reta opa oñemokañɨtei!

²¹ Chemiari tëi ndeve ikavi reiko yave, ërei mbaetɨ reipota reyeapɨsaka cheré. Jökorai reiko ndetaɨrusu güive. ¡Mbaetɨ reipota reyeapɨsaka cheñee re!

²² Ɨvɨtu opata güɨraja nderuvicha reta, jare ndeporopota jese vae reta opata oyereraja iɨvɨ güi. Nemara yaeta repɨta jare reñemomichiukata, opaete ikavimbae reyapo vae jeko pegua.

²³ Añave nde reiko pɨagüive ndero kavi pe, oñeova ɨ̈vɨrare reta Líbano pegua pe vae pe. ¡Ërei jaema reiporarata, jasɨ katu yae vae ou nderé yave! Kuña imembɨrasɨ oï vae rami.”

Tumpa iñee mburuvicha guasu Jeconías peguarä

²⁴ YandeYa jei Jeconías, Joacim taɨ, mburuvicha guasu Judá pegua pe: “Tae cheyé aeño: Yepe tëi nde metei moäka-vera mborookuai pegua cheakatu kotɨgua rami chepoäka re, joko güi roekɨta ko,

²⁵ romeeta nderovaicho reta ndereeka ndeyuka vaerä vae ipo pe, rekɨɨye chugüi vae reta pe. Romeeta Nabucodonosor mburuvicha guasu Babilonia pegua ipo pe, jare Caldeaɨgua reta ipo pe.

²⁶ Jare rogüɨrajaukata nde jare ndesɨ ïru ɨvɨ pe, mbaetɨ pea pɨpe vae pe, joko pe pemano päveta.”

²⁷ Jayave, ngaraa ma oyerova reta ye, kuae ɨvɨ ikɨ̈reɨ yae oyerova reta ye tëi vae pe.

Ñeemombeúa ipɨakañɨ

²⁸ ¿Jae pa ko Jeconías ɨrɨru oyeka jare mbaetɨ ye osirive vae? ¿Maera pa jae jare iñemuña reta oyemombo ɨvɨ oikuaambae kotɨ?

²⁹ ¡Ɨvɨ, ɨvɨ, ɨvɨ; eyeapɨsaka yandeYa iñee re!

³⁰ YandeYa jei: “Pemoapɨta kuae kuimbae jee taɨmbae rami, kuimbae oë kavimbae chupe opaete mbaembae vae rami. Echa metei ave iñemuña reta güi ngaraa oguapɨ David iguapɨa pe, oporookuai pɨau ye vaerä Judá re.”