JEREMÍAS 20 - Biblia Guarani Tumpa Iñee

Sacerdote Pasur maratuta vae regua

¹ Sacerdote Pasur, Imer taɨ, jae ko tupao re oyangareko vae reta juvicha; jae oendu Jeremías omoërakua mbae maratuta vae yave,

² omondo oinupauka jare oñonouka ɨvɨrakua oï öke ɨvatea Benjamín jee vae kotɨgua pe, tupao iyɨpɨ pe.

³ Pɨareve pe Pasur omondo güeruruka Jeremías ɨvɨrakua güi. Jayave Jeremías jei chupe: “YandeYa oipoepɨ nderee Pasur, Magor-misabib pe.

⁴ Echa yandeYa jei körai: ‘Ropoepɨta kɨɨye rupi reiko vaerä jare opaete ndevɨa-ïru reta okɨɨyeta ndegüi; nderovake ndevɨa-ïru reta opata omano tovaicho reta ipo pe. Ameeta opaete Judá pegua reta mburuvicha guasu Babilonia pegua ipo pe, jae güɨrajata iɨvɨ güi ani oyukata kɨsepuku pe.

⁵ Ameeta vi tovaicho reta ipo pe opaete mbaeyekou kuae tëta guasu pegua, opaete mbaembae jare opaete mbaembae jepɨ vae reta, jare opaete mburuvicha guasu Judá pegua imbaembae jepɨ vae reta, güɨraja vaerä Babilonia pe.

⁶ Jare nde, Pasur, reyererajaukata Babilonia pe, opaete ndero pegua reta ndive. Joko pe remanota, joko pe vi neñotɨ retata opaete ndevɨa-ïru reta ndive, jókuae ndeapu reve remoërakua mbae maratuta vae re chupe vae reta.’ ”

Jeremías ipɨatɨtɨ vae regua

⁷ CheYa Tumpa, nde ko chembotavɨ, jare che chetavɨ; nepɨ̈rata yae chegüi jare chemoamɨri. Ara ñavo cheyóyai yóyai reta vae; opaete vae opuka cheré.

⁸ Chemiari ñavo, amoërakua susere jare kañɨtei; cheyóyai yóyai reta jare opuka reta avei cheré, echa neñee amoërakua.

⁹ Jae yave: “Agüɨye mo tachemaendúa cheYa re, agüɨye mo tachemiari jee re.” Ërei jayave neñee cheɨvɨte pe tata rami, chekägüe rupi ojo, aipota tëi aropɨa, ërei mbaetɨ chepuere.

¹⁰ Aendu jeta vae iñeenguru jei reta: “¡Oime kɨɨye opaete rupi!” “¡Peyu, ñañeapo Jeremías re!” Chevɨa-ïru reta ave oäro ambaeyavɨ vaerä. Jei reta: “Güɨramoi ombaeyavɨta; jayave jëguata yandeve, javoi yayepɨ jese.”

¹¹ Ërei ngatu nde cheYa, oime reï che ndive, metei ñeraro regua imbaepuere yae vae rami; jáeramo, oeka teko cheré vae reta, ngaraa ipuere chemoamɨri; ipuereä jeko pegua imara yaeta opɨta jekuae avei rupi, jare ngaraa iñakañɨ reta chugüi vae.

¹² CheYa Imbaepuere yae ete vae, nde remae kavi jupi rupi yogüɨreko vae re vae, nde reikuaa katu kuimbae ipɨa iyemongeta vae, eechauka cheve kërai reiporarauka chupe reta vae, echa che añeñono ndepo pe.

¹³ ¡Petairari yandeYa pe, pemboete yandeYa! Echa jae oepɨ oyererekoasɨ katu vae, jeko kavimbae reta ipo güi.

¹⁴ ¡Amotareɨ jókuae ara aa pɨpe vae! ¡Jókuae ara chesɨ güi aa vae agüɨye toyemboete!

¹⁵ ¡Tijeko jókuae kuimbae omboyerovia cheru vae, omombeu yave chupe michia raɨ kuimbae ko oa chupe vae!

¹⁶ ¡Jókuae kuimbae, toiko tëta guasu reta yandeYa opa omboai jekuae avei pegua rami! ¡Toendu avei täse ndeimbove yave, jare kuaraɨ ara mbɨte yave, sapúkai ñeraro pegua,

¹⁷ echa mbaetɨ omaeño amano chesɨ jɨe peve! Jökorai chesɨ jɨe oikota tëi ko cheve tɨvɨarä, jare che mbaetɨta tëi aa.

¹⁸ ¿Maera ra aë chesɨ jɨe güi, aecha vaerä jasɨ katu vae jare mbɨatɨtɨ, amano regua ñemomarai pe?