JEREMÍAS 19 - Biblia Guarani Tumpa Iñee

Ɨrɨru oyeka vae re ombojaanga vae

¹ YandeYa jei cheve: “Ekua egua metei ɨrɨru ñaeu pegua, oñaeu-apo vae güi, jare eraja nderupíe amogüe tenondegua reta tëta pegua jare amogüe sacerdote reta tenondegua.

² Javoi pekua ɨvɨtɨ päu ipe kavi vae Ben-hinom pe, kuaraɨ oëa kotɨ öke oï vae re katu oï vae pe, jare joko pe emoërakua ñee reta, che amombeuta ndeve vae.

³ Ere körai: ‘Judá pegua mburuvicha guasu reta jare Jerusalén pe peiko vae reta, peyeapɨsaka kuae ñee yandeYa Imbaepuere yae ete vae Israel iTumpa jei vae re: Aruta susere ikavimbae yae vae kuae ɨvɨ re, jare kia nunga vae oendu yave oipɨayuka eteita.

⁴ Echa Israel iñemuña reta chereeya, jare omongɨa reta kuae ɨvɨ; oapɨ reta ikäti kavi vae incienso tumpa-raanga reta pe, jae reta mbaetɨ oikuaa vae pe, iñemuñagüe reta ave jare mburuvicha guasu reta Judá pegua mbaetɨ oikuaa vae pe; jare kuae ɨvɨ omotɨnɨe reta jekombae jugüɨ pe.

⁵ Omopüa reta vi mbaemboete renda reta Baal peguarä, opaetei oyeapɨ vaerä joko pe imichia reta Baal pe; che mbaetɨ etei ayókuai jese reta vae, mbaetɨ vi kërai ave yepe ayemongeta jese vae.

⁶ Jáeramo oväeta ara kuae ɨvɨ mbaetɨ vaerä ma oñeenɨi Tofet, ani ɨvɨtɨ päu ipe kavi Ben-hinom pe ave, jaeño oñeenɨita Ɨvɨtɨ päu ipe kavi vae Yeyuka Renda.

⁷ Kuae pe Judá pegua reta jare Jerusalén pegua reta iyemongeta opata arokomegua chugüi reta. Ameeta jovaicho reta ipo pe oa reta vaerä, opa vaerä oyuka reta; jare jëogüegüe reta chucha reta jembiurä jare mbaeporou reta jembiurä.

⁸ Aipoepɨta kuae tëta opɨta vaerä ipombae jare kɨɨyearä, opaete oasa jokoropi vae ipɨakañɨta jese jare okɨɨye yaeta opaete oyemboai vae re.

⁹ Ameeukata jou reta taɨ reta jare tayɨ reta ae, jare oyoupii aeño oyou retata, tovaicho reta oiporarauka chupe reta yave, oikëse reta yave tëta guasu.’

¹⁰ Kuae opa rere yave, eyoka jókuae ɨrɨru yogüɨraja nderupíe vae reta jóvai,

¹¹ jare ere chupe reta: ‘YandeYa Imbaepuere yae ete vae jei körai: Kia oyoka ɨrɨru ñaeu pegua yave opa oyembojaɨ jare mbaetɨ ma ikavi oyeapo kavi ye vaerä, jökoraita ayapo kuae ɨvɨ Judá jare tëta guasu Jerusalén. Omanogüe reta oñotɨ retata Tofet pe, mbaetɨ ketɨ oñeotɨ vaerä jeko pegua.

¹² Jökoraita ayapo kuae tëta guasu jare pɨpegua reta. Tofet rami.

¹³ O reta Jerusalén pegua jare mburuvicha guasu reta Judá pegua jo reta, jare o reta iárambo ikäti kavi vae incienso oapɨ reta yasɨtata reta pea pe, jare omee reta mbota vino oyepɨyere vae tumpa ambuae pe vae, ikɨata opɨta cheróvai Tofet rami.’ ”

¹⁴ Kuae jaɨkue rupi Jeremías ou ye Tofet güi, yandeYa omondo jee re imiaría güi, jare oyemboɨ tupao joka pe jei opaete vae reta pe:

¹⁵ “YandeYa Imbaepuere yae ete vae Israel iTumpa jei: ‘Ambouta kuae tëta guasu re jare opaete tëta iyɨvɨrigua reta re tembiporara amoërakua chupe reta vae, echa oyembopɨa täta yae reta mbaetɨ vaerä oendu reta cheñee reta.’ ”