JEREMÍAS 17 - Biblia Guarani Tumpa Iñee

Judá iyoa re oiporara vae regua

¹ Tëtaguasu Judá, ndeyoa oyekuatía oï tapiyu pe oyekuatía rami, jare ita täta yae vae itï pe rami oyekuatía oï ndepɨa re, jare mɨmba oyeyuka oyeapɨ jese vae re guakarätiecha oï vae re.

² Neñemuña reta imaendúa mɨmba oyeyuka oyeapɨ jese vae reta re, jare netumpa-raanga Asera iä reta ɨvɨra iküaraɨa kavi vae reta igüɨ rupi ñogüɨnoi vae re, jare ɨvɨtɨ reta ɨvate vae re,

³ jare ɨvɨtɨ reta ñuu pegua re. Ndeyoa jeko pegua, apɨ̈roukata ndegüi opaete ndembaeyekou reta; oñepɨ̈rota ndegüi, mbaemboete renda reta ɨvɨtɨ rupigua, opaete ndeɨvɨ rupi renoi vae jeko pegua.

⁴ Reeyata ko ɨvɨ che amee ndembaerä vae, roapota nderovaicho reta jembiokuairä, ɨvɨ nde reikuaambaea pe, echa chearasɨ oyepotata tata rami jekuae avei pegua, nemokañɨtei vaerä.”

Ñemoñee reta

⁵ YandeYa jei körai: “Tijeko jókuae ipɨa opia chegüi vae, kuimbae reta rei güɨrovia katu vae, oeka jare oyeko jese reta vae.

⁶ Ñuu pegua ñurati ramita ko, ngaraa oikuaa mbae ikavi vae outa vae re, oikota ɨvɨ otini yaea rupi, ɨvɨ yukɨ ipombaea rupi.

⁷ Ërei, toyekou jókuae kuimbae güɨrovia katu cheré vae, chereño oyeko vae.

⁸ Echa ɨ jembeɨ pe ɨvɨra oï vae ramita ko, japo reta oupitɨta ɨ oguataa, jare ngaraa oyandu kuaraɨasɨ, jokɨ katu aveita, ara-tini pe mbaetɨta ipiru, jare ia aveita.

⁹ Oporombotavɨ katu yae vae ko yandepɨa opaete ïru mbaembae reta güi, jare jeko kavimbae yae ko, ¿kia ra ipuere oikuaa?

¹⁰ Che, ndeYa, aikuaa kërai ko pepɨa vae, aikuaa opaete yemongeta reta, amboekovia vaerä metei ñavo vae pe jeko oï rupi, jare jembiapo reta oï rupi.”

¹¹ Jupimbae reve oyemboikokatu vae, inambu güɨroaiño ïru jupía vae rami ko. Oeyata ko güɨramoiño, ndei indechi mbove, jare yarakuaambae opɨtata kuri.

¹² Oretupao guasu iyemboetea yae vae ko, tuichagüe yae iyɨpɨ güive.

¹³ CheYa Tumpa, nde jae ko Israel iyeroviaka. Opaete ndereeya vae imarata ko. Opaete oyembosɨrɨ ndegüi vae, okañɨta metei kuimbae jee oyekuatía ɨvɨkúi re rami, echa ndereeya, nde ɨesaɨ osɨrɨ vae.

Jeremías oyerure yandeYa pe

¹⁴ Chepoano cheYa Tumpa, jare takuera; chereepɨ cheYa, jare taasayepe, echa ndeño ko romboete.

¹⁵ Opaete vae reta jei cheve: “¿Kërai pa jókuae yandeYa iñee remoërakua vae? ¡Toyembopo mo añave voi!”

¹⁶ Ërei che cheYa, mbaetɨ romoñera reiporarauka vaerä chupe reta, mbaetɨ vi aipota chupe reta mbaesusere. Nde reikuaa kavi, mbae ko jae nderóvai vae,

¹⁷ agüɨye chemongɨɨye, echa nde ko jae cheñepɨ̈roa mbaeporara iara pe.

¹⁸ Emomaraiuka chemotareɨ vae reta, ërei che agüɨye jökorai. Emongɨɨye reta, ërei che agüɨye jökorai. Embou jese reta mbaesusere, opaetei emokañɨtei reta.

Ara mbutuu regua

¹⁹ YandeYa jei cheve körai: “Ekua eyemboɨ Opaete vae reta Jöke jee vae pe, mburuvicha guasu reta Judá pegua oike jare oëa rupi, javoi ekua vi eyemboɨ ïru öke reta Jerusalén pegua pe.

²⁰ Jare ere opaete vae pe: ‘Mburuvicha guasu reta Judá pegua, opaete Judá pegua reta jare opaete Jerusalén pe peiko vae reta, kuae öke rupi peike vae reta, peyeapɨsaka yandeYa iñee re.

²¹ Körai jei yandeYa: Ara mbutuu pe agüɨye etei peraja voɨta, Jerusalén jöke rupi ave agüɨye peroike voɨta, peaɨu perekove yave.

²² Agüɨye penoe pero güi ave voɨta ara mbutuu pe, agüɨye ave vi peparavɨkɨ, peñono tee ara mbutuu cheve, peñemuñagüe reta ayókuai rami.

²³ Ërei jae reta mbaetɨ oendu, ñäteɨ oyapo reta jaegüe, jaeño oyembopɨapochɨ reta agüɨye vaerä oendu, ñenupa rupi ave mbaetɨ oipota oendu reta.’

²⁴ ‘Che, peYa jae: Peyapo che jaegüe, agüɨye kërai ave peroike voɨta kuae tëta guasu jöke rupi ara mbutuu pe, mbae nunga mbaravɨkɨ ave agüɨye peyapo; peñono tee ara mbutuu.

²⁵ Peyapo yave jökorai, oime aveita mburuvicha guasu oguapɨ vaerä David iguapɨa pe, jare oiketa tëta guasu jöke rupi käretou pe jare kavayu re iyɨvɨrigua reta ndive, jare Judá pegua reta jare Jerusalén pe yogüɨreko vae reta ndive. Jare Jerusalén pe oime aveita yogüɨreko vae.

²⁶ Jare yogüeruta tëta guasu reta Judá pegua Jerusalén iyɨ́vɨri ñogüɨnoi vae reta, jare Benjamín iɨvɨ güi jare ɨvɨpe kavi güi jare Neguev güi. Güeru retata tupao pe mɨmba oyeyuka opaetei oyeapɨ vaerä vae, jare mɨmba oyeyuka vaerä jare mbota temitɨ jäɨgüe, jare ikäti kavi vae incienso, jare mbota yasoropai pegua.

²⁷ Ërei pe reta mbaetɨ yave peyapo cheporookuai, peñono tee vaerä cheve ara mbutuu, jekuaeño peroike pevoɨta Jerusalén jöke rupi yave, che ayatapɨta jókuae öke reta re, jare opata oapɨ o kavi reta Jerusalén pegua, jare ngaraa kia ipuere ombogüe.’ ”