JEREMÍAS 16 - Biblia Guarani Tumpa Iñee

YandeYa oyókuai Jeremías vae regua

¹ YandeYa jei cheve körai:

² “Agüɨye emenda, agüɨye toime nderaɨ reta ani nderayɨ reta ave kuae ɨvɨ pe.

³ Echa che ndeYa, jaeta ndeve mbae oasata michia reta oa kuae ɨvɨ pe vae ndive, ichɨ reta jare tu reta ndive vae.

⁴ Mbaerasɨ yavaetegüe oyuka retata, jare mbaetɨta kia oäpiro reta, mbaetɨta vi kia oñotɨ reta vaerä: Oyoata ɨvɨ rupi tepoti rami. Ñeraro jare karuai opata omokañɨtei reta, jetegüe opata jou chucha reta jare mbaeporou reta.”

⁵ YandeYa jei vi cheve: “Agüɨye eike metei o pe tëogüe oäpiro ñogüɨnoia pe; agüɨye eäpiro ani ndepɨatɨtɨ jese, echa kuae tëta pe ngaraa ma amee chepɨakatu, cheporoaɨu, cheporoparareko. Che ndeYa jae kuaekuae.

⁶ Oikokatu vae reta jare paravete vae reta omanota kuae ɨvɨ pe; mbaetɨta kia oñotɨ reta vaerä jare oäpiro reta vaerä, ipɨatɨtɨ güi oyembopere vae ani opa oñeapi vae ave mbaetɨta jese reta.

⁷ Manoa pe tembíu kavi oyeapo vae ave mbaetɨta ombopɨakatu vaerä omano vae jëtara reta, yepe tëi omano tu ani ichɨ.

⁸ Jökoraiño vi agüɨye eike o pe aretea pe, reguapɨ vaerä rekaru jare reu vino jae reta ndive.

⁹ Echa che ndeYa Imbaepuere yae ete vae, Israel iTumpa, amombeu: Kuae ɨvɨ pe ayasɨata perovake, peikove peiko ramboeve opaete tairari reta, jare yerovia katu reta, jare tairari reta menda pegua.

¹⁰ Remoërakua yave opaete vae pe kuae mbaembae reta re, oparandu retata ndeve: ‘¿Maera pa kuae ikavimbae yae vae yandeYa omoërakua orekotɨ? ¿Mbae ikavimbae pa ko oime royapo? ¿Mbae nunga mbaeyoa pa ko oime royapo yandeYa Tumpa kotɨ?’

¹¹ Jayave nde ere chupe reta: ‘YandeYa jei: Peñemuñagüe reta chereeya jare omboete reta tumpa-raanga reta; oyeokuai jare oyetavatɨka reta chupe reta; chereeya reta jare mbaetɨ oyapo reta cheporookuai.

¹² Jare pe reta oasa ete ye peyapo ikavimbae jókuae peñemuñagüe reta güi, echa metei ñavo peyapo pepɨa jemimbotaño, mbaetɨ peyeapɨsaka cheré.

¹³ Jáeramo opata pomombo kuae ɨvɨ güi, ɨvɨ peikuaambaea kotɨ, peñemuñagüe reta ave mbaetɨ oikuaa vae kotɨ, joko pe peyeokuaita ara rupi jare pɨ̈tu rupi tumpa ambuae reta pe, echa ngaraa etei poparareko.’ ”

¹⁴ YandeYa jei: “Ërei oväeta ara, mbaetɨ vaerä ma pere: ‘YandeYa jee re, jókuae Egipto güi güɨnoe Israel iñemuña reta vae’

¹⁵ Jaeño pereta: ‘YandeYa jee re, Israel iñemuña reta güɨnoe ɨvɨtuguasu kotɨgua ɨvɨ güi vae, jare opaete ɨvɨ rupi omoai moaia kotɨ güi vae’. Che pogüeru yeta peɨvɨ pe, kuae ɨvɨ che amee peñemuñagüe reta pe vae pe.”

¹⁶ YandeYa jei: “Ambouta jeta yeporaka regua reta, oyeporaka reta vaerä Israel iñemuña reta re. Jaɨkue rupi ambouta jeta maepïaro regua reta, oipïaro vaerä Israel iñemuña reta opaete ɨvɨtɨ guasu reta rupi, jɨsɨ rupi ani ɨ̈vavira oyeka vae ipäu rupi.

¹⁷ Echa opaete jeko reta aecha; mbaetɨ etei oñemi chegüi vae, iyoa reta ave mbaetɨ ipuere oñemi chegüi.

¹⁸ Tenonde aiporaraukata täta chupe reta jeko kavimbae jare imbaeyoa reta re, echa omongɨa reta cheɨvɨ itumpa-raanga reta jekovembae pe, jare opaete ɨvɨ chembae rupi oyapo reta mbaembae che aröɨro vae.”

Jeremías oyerure yandeYa pe

¹⁹ CheYa Tumpa, cheñepɨ̈roa jare chemopɨ̈rata vae, cheñepɨ̈roa susere iara pe; ndekotɨ yogüeruta tëtaguasu pegua reta, jare jei retata: “Oreñemuñagüe reta omboresive tumpa-raanga retaño imbaerä, mbaetɨ mbaepuere güɨnoi vae jare osirivembae reta.

²⁰ ¿Ipuere ra kuimbae oyapo iyeupe itumpa retarä? ¡Jökorai yave, jókuae tumpa reta mbaetɨ ko tumpa añetete vae!”

YandeYa jei

²¹ “Jáeramo, metei jeia pe opaete rupi amboyekuaata chembaepuere; jökorai oikuaa retata cheree jae ko peYa Tumpa.