JEREMÍAS 15 - Biblia Guarani Tumpa Iñee

Oñemoërakua tembiporara

¹ YandeYa jei cheve: “Yepe tëi mona Moisés jare Samuel oyerure cheve, ngaraa aiparareko kuae tëta. Ere kuae tëta pe toë, tojo reta cheróvai güi.

² Oparandu yave ndeve ketɨ ra yogüɨrajata vae re, ere chupe reta: Körai jei yandeYa: ‘Oyembojee mbaerasɨ yavaetegüe pe omano vaerä vae, pɨpe tomano; oyembojee ñeraroa pe omano vaerä vae, joko pe tomano; oyembojee karuai rupi omano vaerä vae, pɨpe tomano; oyembojee iɨvɨ güi oyereraja vaerä tembipɨɨrä vae, toyereraja.’ ”

³ YandeYa jei: “Ambouta jese reta irundɨ tembiporara ambuaeyee yee vae, jae ko: Omano retata ñeraro pe, jare yaɨmba reta opata ombojaɨ jaɨ, chucha reta jouta, jare mbaeporou reta opata jou.

⁴ Ayapota chupe reta vae rupi opaete tëtaguasu reta okɨɨye yaeta, Manasés mburuvicha guasu Judá pegua, Ezequías taɨ jeko pegua, Jerusalén pe oyapo vae re.

⁵ ¿Kia pa ndepararekota Jerusalén? ¿Kia pa ipɨatɨtɨta nderé? ¿Kia pa oparanduta nderé kërai ra reï vae?

⁶ Nde chereeya, reyerova chegüi. Jáeramo che, mbaetɨ ma aropɨa, aitɨta chepo aiporarauka vaerä ndeve jare romboai vaerä.

⁷ Opa amoai moai nerëta pegua reta kapii rami, opa anoe tëta guasu reta güi; aeya imichiambaeño chembae vae reta, opa amokañɨtei, echa mbaetɨ oipota oeya jeko reta ikavimbae vae.

⁸ Aeya ipɨte reta pe jeta imemano vae reta, ɨguasu jembeɨ pe jeta yae ɨvɨkuitï rami. Kuaraɨ ara mbɨte yave ambou chupe reta mano, ichɨ reta re jare imembɨraɨe reta re; iparanoe ambouta chupe reta mbɨatɨtɨ jare kɨɨye.

⁹ Jeta imembɨ vae ipɨatɨtɨ yae, jare ipɨtu yae opɨta, imara jare oñemomichi yae, ara jembipe vae pɨtumimbi chupe. Kia nunga chugüi reta oikoveño vae, jovaicho reta pe ayukaukata. Che ndeYa jae kuae.”

Ñeemombeúa isapúkai

¹⁰ ¡Tataɨ, chesɨ, chugüi aa vae jaeño ayoaka jare añoraro vaerä opaete ɨvɨ pegua reta ndive! Mbaetɨ etei kia pe ave aiporu korepoti, cheve ave mbaetɨ kia ombaeporu, ërei opaete vae oyepopeyu cheré.

¹¹ Iyepopeyu reta toyembopo, cheYa, mbaetɨ yave ayeokuai kavi ndeve, mbaetɨ yave ayerure tovaicho reta re ndeve, ñogüɨnoi yave susere pe ani mbɨatɨtɨ pe.

Tumpa omoërakua tembiporara Israel peguarä

¹² “¿Kia pa ipuere oyoka jiero, jiero jare jiero iyu vae ɨvɨtuguasu kotɨgua?

¹³ Israel, romeeta ndeyoa reta jeko pegua nderovaicho reta ipo pe, ndembaeyekou reta jare opaete ndembaembae reta jepɨ vae, opaete renoi ndeɨvɨ pe vae, güɨrajaiño vaerä iyeupe reta.

¹⁴ Roapoukata nderovaicho reta jembiokuairä, ɨvɨ nde reikuaambaea pe, echa chearasɨ oyepota, tata rami opata nemokañɨtei.”

Ñeemombeúa oyerure yandeYa pe

¹⁵ CheYa, nde reikuaa ko opaete mbaembae, ¡nemaendúa cheré jare eyu chemborɨ! ¡Eiporarauka chemotareɨ vae reta pe cheve! Agüɨye ndepɨaguasu chupe reta, agüɨye emaeño tamano; mase, roaɨu jeko pegua ko aiporara ñemotareɨ reta.

¹⁶ Nde chemomiari yave che amboresive, aipɨɨ kavi cheyeupe neñee reta; jae ko chembopɨakatu vae jare chemboyerovia vae, echa che ndembae ko, cheYa Tumpa Imbaepuere yae ete vae.

¹⁷ Mbaetɨ añemoïru iyapirai reteiño vae reta ndive; ndembaerä cheapo güive aiko che aeño, echa chemotɨnɨe ndearasɨ pe.

¹⁸ ¿Maera pa chepɨa pe jasɨ vae mbaetɨ oasa? ¿Maera pa chepere mbaetɨ okuera; okueraä etei moa oñeñono jese yave? ¿Chereeyata pa nde, ɨesaɨ tɨpa katu vae rami?

YandeYa omboyevɨ ñee vae regua

¹⁹ Jayave yandeYa jei cheve: “Reyerova ye yave chekotɨ, che romboresive yeta, javoi ndepuere reyeokuai cheve. Mbaetɨ yave nemiari miariiño, ikavi vae reño nemiari yave, nde reïta nemiari vaerä cheveguarä. Jae reta ko yogüeruta ndekotɨ, nde agüɨye ekua ikotɨ reta.

²⁰ Che roñonota kuae tëta peguarä, tëta ikësea jëguambae vae jiero iyu vae pegua rami. Oñoraro retata nde ndive, ërei ngaraa nemoamɨri reta, echa che aï nde ndive roepɨ vaerä, jare rogüɨroasayepe vaerä. Che ndeYa jae kuaekuae.

²¹ Rogüɨroasayepeta jeko kavimbae vae reta ipo güi, ¡rogüɨroasayepeta jëia vae reta ipo güi!”