JEREMÍAS 13 - Biblia Guarani Tumpa Iñee

Kuakuaa ichuumbi vae re oyembojaanga vae

¹ YandeYa jei cheve: “Ekua egua ndeyeupe metei kuakuaa tïiasɨ vae lino pegua jare eñono ndekúa re, ërei agüɨye emoäkɨ ɨ pe.”

² Javoi che agua kuakuaa, yandeYa cheokuai rami jare añono chekúa re.

³ Jayave yandeYa jei ye cheve:

⁴ “Jókuae kuakuaa reguagüe ndekúa re renoi vae, eraja ɨ̈aka Éufrates pe jare eñomi joko pe metei ɨ̈vavira oyeka vae ipäu pe.”

⁵ Javoi aja ɨ̈aka Éufrates pe, añomi añono kuakuaa yandeYa cheokuai rami.

⁶ Ɨma pe yandeYa jei ye cheve: “Ekua ɨ̈aka Éufrates güi eru jókuae kuakuaa royókuai reñomi joko pe vae.”

⁷ Jayave che aja ɨ̈aka Éufrates pe, ayoo jare anoe jókuae kuakuaa, ërei jókuae kuakuaa ichuumbi, mbaetɨ ma ikavi.

⁸ Jayave yandeYa jei ye cheve:

⁹ “Jökorai etei ambochuumbita Judá jare Jerusalén ipɨapochɨ.

¹⁰ Kuae tëta jeko kavimbae vae, ñäteɨ cheporookuai oyapo vae, ipɨa jemimbotaño ombotenonde vae. Omboete jare oyeokuai tumpa ambuae reta pe. Jae ko, jókuae kuakuaa mbaetɨ etei ma ikavi rami.

¹¹ Kia omoata ikuakuaa iyé vae rami, opaete vae Israel pegua jare Judá pegua amboatɨ tëi cheyé, yogüɨreko vaerä chembaerä, jërakua vaerä cheree jare cheyemboetea. Ërei mbaetɨ oyapo reta che jae vae. Che ndeYa jae kuae.

Tinaa reta tɨnɨe vae re oyembojaanga vae

¹² Ere vi Israel iñemuña reta pe: ‘YandeYa, Israel iTumpa jei körai: Opaete tinaa ipuere tɨnɨe vino pe.’ Jae reta jeita ndeve: ‘¿Ore mbaetɨ pa roikuaa opaete tinaa ipuere ko tɨnɨe vae?’

¹³ Javoi nde ere chupe reta: ‘YandeYa jei: Ambosavaɨpota opaete kuae ɨvɨ pe yogüɨreko vae, mburuvicha guasu reta David jëtara, jae iporookuaía pe oguapɨ vae, sacerdote reta, ñeemombeúa reta jare opaete Jerusalén pe yogüɨreko vae.

¹⁴ Javoi ayokata tinaa rami, arokuata oyoe, tu reta taɨ reta ndive. Amokañɨteita, mbaetɨta aiparareko amae jese reta. Che ndeYa jae kuae.’ ”

Yeandu Israel peguarä

¹⁵ ¡Israel iñemuña reta, peyeapɨsaka kavi. Agüɨye pepɨayemboete, yandeYa ko imiari!

¹⁶ Pemboete peYa Tumpa, ndei jae ombou mbove pɨtumimbi vae, jare ndei pepɨ̈sa-yeyuka mbove ɨvɨtɨ reta rupi; peäro tëi tembipe, ërei jae oipoepɨ pɨtumimbiasɨ pe peve, ñamano rape katu vae pe.

¹⁷ Ërei mbaetɨ yave peendu kuae, ayaeo vɨarita pepɨapochɨ jeko pegua; cheresaɨ osɨrɨta, echa cheYa imbae vae reta opa oyererajauka tembipɨɨrä.

Tumpa Iñee mburuvicha guasu peguarä

¹⁸ “Ere mburuvicha guasu pe jare ichɨ pe: ‘Pegüeyɨ tenda mborookuaía pegua güi, jare peguapɨ ɨvɨ pe, echa peäka-regua oa pegüi.’

¹⁹ Tëta guasu reta Neguev pegua opa oñeova ñogüɨnoi; mbaetɨ kia ipuere oë. Opaete Judá pegua opa oyereraja, tembipɨɨrä opa oyereraja.

²⁰ Pemopüa peäka jare pemae kërai yogüeru tovaicho ɨvɨtuguasu kotɨ güi. ¿Ketɨ pa oime oñemee ndeve reyangareko vaerä jese vae, nderembiangareko tëta ikavi yae vae?

Israel oyererajata iɨvɨ güi vae regua

²¹ ¿Mbae pa rereta, Jerusalén, jókuae nderemimboe reta renoi nderuvicharä yave? ¿Ngaraa ra jasɨ ndeve, kuña imembɨrasɨ vae pe jasɨ yae rami?

²² Rere yave ndepɨa pe: ‘¿Maera ra körai aiko?’ Ndeyoa yae jeko pegua ko körai reiko; ¡jáeramo nemonandi reta jare oyuvanga reta nderé!

²³ ¿Ñaguanau ipuere pa ipireyu? ¿Yaguapara ipuere pa oyeekɨ ipïra? Jökorai ko peyepokuaa ikavimbae pe, ngaraai pepuere peyapo ikavi vae.

²⁴ Jáeramo che opata pomoai moai, ɨvɨtu opa kapii javiyugüe güɨroveve ñuu pe rami.

²⁵ Jae ko kuae oikota nde ndive vae Israel, amboepɨukata ndeve reyapogüe. Che ndeYa jae. Echa neakañɨ chegüi jare remboete tumpa-raanga reta.

²⁶ Che opaeteita vi romonandi, romomaraiuka yaeta.

²⁷ Aecha ko ndepɨa mbokere, aguasa reyapogüe, ndereko mbokere reyeapo vae, ɨvɨtɨ jare kaa rupi pɨ̈chɨi yae reyapogüe. ¡Ndeparavete, Jerusalén! ¿Kërai yave pa reyetɨota cheróvai? ¿Kërai yave regua ra ndekɨata reiko?”