JEREMÍAS 1 - Biblia Guarani Tumpa Iñee

Tumpa oenɨi jare oyókuai Jeremías

¹ Jeremías, Hilcías taɨ iñee reta, jae ko metei sacerdote reta güi yogüɨrekose Anatot pe, Benjamín iñemuña reta ɨvɨ pe vae.

² YandeYa jei Jeremías pe, Josías, Amón taɨ trece año ma oiko mburuvicha guasurä Judá pe yave.

³ Jei vi chupe Joacim, Josías taɨ oiko mburuvicha guasurä Judá pe yave, jare once año Sedequías oiko mburuvicha guasurä Judá pe vae iyapɨ regua. Sedequías jae vi ko Josías taɨ; Jerusalén pegua reta oyereraja regua tembipɨɨrä pandepoa yasɨ pe jókuae año.

⁴ YandeYa jei cheve körai:

⁵ “Ndei ndesɨ jɨe pe roapo mbove che rokuaa, jare ndei rea mbove che roñono tee; roñono ñeemombeuarä tëtaguasu reta peguarä.”

⁶ Jare che jae: “¡Atataɨ, cheYa Tumpa! Mase, ¡che mbaetɨ aikatu chemiari, echa chetaɨrusu yae vɨteri ko!”

⁷ Ërei yandeYa jei cheve: “Agüɨye ere chetaɨrusu yae ko. Che royokuaía rupi ko reota, jare opaete royókuai vae rereta.

⁸ Agüɨye ekɨɨye kia reta güi, echa che aïta nde ndive roepɨ vaerä, che ndeYa ko, jae kuae ndeve.”

⁹ Jayave yandeYa ombou ipo jare opoko cheyuru re, jei cheve: “Mase, ko añono cheñee reta ndeyuru pe.

¹⁰ Kuae ara roñono tëtaguasu reta re jare mburuvicha guasu reta iporookuaía re, reapomondoro vaerä jare remboai vaerä, rerokomegua vaerä jare reitɨ vaerä, jare vi remopüa ye vaerä jare rembopɨau ye vaerä.”

¹¹ YandeYa jei vi cheve körai: “Jeremías, ¿mbae pa reecha?” Jare che jae chupe: “Aecha ɨvɨra almendra jäka.”

¹² Jare yandeYa jei cheve: “Jaekavi rere. Echa jökorai aïndaivi ambopo vaerä cheñee.”

¹³ YandeYa jei cheve mokoía ma, körai: “¿Mbae pa reecha?” Che jae chupe: “Aecha metei yapepo opupu oï vae, oyepɨyere ma oï ɨvɨtuguasu kotɨ güi.”

¹⁴ Jayave yandeYa jei cheve: “Ɨvɨtuguasu kotɨ güi oyepɨyereta kañɨtei, opaete kuae ɨvɨ pegua reta re.

¹⁵ Mase, che amboatɨta opaete ɨvɨtuguasu kotɨgua reta. Yogüeruta juvicha guasu reta, jare oyembojeyupa retata metei ñavo, Jerusalén jöke ñavo pe, jare opaete ikësea ikupe rupi, jare opaete tëta guasu reta Judá pegua rupi.

¹⁶ Jae kuae tembiporara aruta jókuae iyoa reta jare chereeya reta vae kotɨ vae, echa oapɨ reta ikäti kavi vae incienso tumpa ambuae reta pe, omboete reta, jae reta aeño oyapo vae.

¹⁷ Jare nde, eyeumbɨkua täta, ekua jare ere chupe reta opaete che royókuai vae. Agüɨye ekɨɨye chugüi reta, echa rekɨɨye ko yave, che ameeta nde rekɨɨye vaerä chugüi reta.

¹⁸ Che roñono añave, tëta guasu oñekëse kavi yae vae rami, okɨta jiero pegua rami, okɨta jiero iyu vae pegua rami, opaete kuae ɨvɨ Judá pegua reta kotɨ: Juvicha guasu reta kotɨ, itenondegua reta kotɨ, isacerdote reta kotɨ, jare opaete vae reta kotɨ.

¹⁹ Jae reta oekata maratu ndeapo vaerä, ërei ngaraa nemoamɨri, echa che aïta nde ndive, roepɨ vaerä. Che ndeYa ko, jae kuae ndeve.”