ISAÍAS 8 - Biblia Guarani Tumpa Iñee

YandeYa güiño yaipoɨu

¹ YandeYa jei cheve: “Eipɨɨ metei ɨvɨra oñeopagüe, tuicha vae jare emboyekuaa kavi eikuatía eñono jese Maher-salal-hasbaz.

² Eyapo kuae, sacerdote Urías jare Zacarías, Jeberequías taɨ jovake.”

³ Aroke cherembireko, jare ipurúa, jare oa imembɨ. Jayave yandeYa jei cheve: “Embojee Maher-salal-hasbaz pe.

⁴ Echa kuae michia raɨ ndei oikatu ‘papa’ jare ‘mama’ jei mbove: Oñepɨ̈rota Damasco jare Samaria güi imbaembae ikavigüe; mburuvicha guasu Asiria pegua opata opɨ̈ro.”

⁵ Jekuae yandeYa jei ye cheve:

⁶ “Kuae tëta güɨröɨro ma ɨ Siloé pegua, jókuae ɨ mbegüe kavi oguata vae, echa oyerovia reta ramo Rezín re jare Remalías taɨ re,

⁷ jáeramo, yandeYa güeruta jese reta ɨ tuicha jare ipɨ̈rata yae vae, (kuae jae ko mburuvicha guasu Asiria pegua, opaete imbaepuere ndive). Jókuae ɨ tɨnɨe yaeta ɨ̈aka, jare oyepɨyereta opaete jembeɨ rupi,

⁸ outa oväe Judá pe jare opaeteita tɨnɨe, iyayu rupi opɨtata jese. Güɨra omoata ipepo vae ramita, opata oyasoi ndeɨvɨ, Emanuel.”

⁹ Peyomboatɨ tëtaguasu reta, opata pekañɨtei; peyeapɨsaka, tëtaguasu ketɨgua reta: Yepe tëi peyupavota, ërei opata pekañɨtei; yepe tëi peipɨɨta perembiporu ñeraro pegua, ërei opata pekañɨtei.

¹⁰ Peyapo yemongeta, ërei opata oikomegua; peyemongeta oipotagüe mbae, ërei ngaraa oyeapo, echa Tumpa oime oï ore ndive.

¹¹ YandeYa chepɨɨ täta, jare cheokuai agüɨye vaerä amomoe kuae tëta oyapogüe. Jei cheve:

¹² “Agüɨye peenɨi ñemopüa, opaete kuae tëta guasu reta ombojee ñemopüa vae. Agüɨye pekɨɨye jae reta okɨɨye chugüi vae güi.

¹³ YandeYa Imbaepuere yae ete vae re pemae Iyoambae; chugüi peipoɨu jare pekɨɨye.

¹⁴ Jae toï peve mbaemboetea; ërei Israel iñemuña reta oyemboyao mókoi tëtaguasu ñogüɨnoi vae peguarä oïta ita rami, ipɨ̈sa-yeyuka oyepɨaka reta jese vaerä; ñuai ramita, Jerusalén pegua reta oa pɨpe vaerä.

¹⁵ Jeta ipɨ̈sa-yeyukata oyepɨaka reta jese, jare omano retata; jeta oata ñuai pe vae, jare oyepɨɨta opɨta reta.”

¹⁶ Peñovatu kavi kuae ñee; agüɨye tokañɨ cheporookuai reta jare cheporomboe reta, cheremimboe reta agüɨye tomokañɨ cheporomboe.

¹⁷ Yepe tëi yandeYa oñomi jova Jacob iñemuña reta güi, ërei jeseve che ayeko avei ko jese. Añonota chepɨa jeseño.

¹⁸ Mase, che jare kuae chemichia reta yandeYa omee cheve vae, roï ko metei yembojaangarä tëta Israel peguarä, yandeYa Imbaepuere yae ete vae kuae ɨvɨtɨ Sión pe oiko vae ko oreñono chupe reta.

¹⁹ Jare jei reta yave peve: “Peparandu imbaekuaa vae reta pe, jare mbae maratuta vae imombeúa reta pe.” Ërei pe pere chupe reta: “¿Mbaetɨta pa tëta oparandu iTumpa pe? ¿Oparanduta ra omanogüe vae reta jekove pe, oikove vae reta regua?”

²⁰ ¡Peyeko mborookuai reta re! Mbaetɨ pere jökorai yave, mbaetɨño ko peikuaa kavi.

²¹ Jeta vae reta oguatata oipota rupi, oiporara reve jare yɨmbɨaɨ reve; jare yɨmbɨaɨ güi pochɨ retata, jare oyangao retata juvicha guasu jare iTumpa, omae reve ara kotɨ,

²² jare oeka reta tëi yemborɨ kuae ɨvɨ pe yave, jaeño oväe retata mbaeporara jare mbɨatɨtɨ; jare jókuae susere pe opata ɨvɨ oñeñono oyeeya.