ISAÍAS 7 - Biblia Guarani Tumpa Iñee

Isaías omombeu Acaz pe vae

¹ Acaz, Jotam taɨ, Uzías jɨmɨmino oiko mburuvicha guasurä Judá pe yave, Rezín mburuvicha guasu Siria pegua jare Peka mburuvicha guasu Israel pegua, jae ko Remalías taɨ, yogüeru oporepeña Jerusalén re, ërei mbaetɨ ipuere reta opɨ̈ro.

² Jare omombeu reta Acaz, David iñemuña pe körai: “Siriaɨgua reta oñemoïru Efraín pegua reta ndive.” Jayave mburuvicha guasu jare opaete vae orɨrɨi ipɨa okɨɨye güi, kaa pe ɨvɨra reta okana ɨvɨtu yave rami.

³ Jayave yandeYa jei Isaías pe: “Ekua, nde jare nderaɨ Sear-jasub ndive peövaiti mburuvicha guasu Acaz, sekia ɨrɨru tuicha vae kotɨ ojo vae iyapɨ kotɨ, tape ojo Mbaeputuka renda kotɨ vae pe,

⁴ jare ere chupe: ‘Eyeandu, jare eyembopɨaguasu; agüɨye ekɨɨye jare agüɨye eyembopɨtu, jókuae mókoi tatasɨgüe jätati ñogüɨnoi vae güi, Rezín mburuvicha guasu Siria pegua güi jare Peka, Remalías taɨ mburuvicha guasu Israel pegua pochɨ ñogüɨnoi vae güi.

⁵ Siriaɨgua reta, tëtaguasu Efraín pegua Remalías taɨ ndive oyemongeta reta oyapo vaerä ikavimbae ndeve. Jei reta körai:

⁶ Yaike Judá pe, jare yamongɨɨye; opa ñapɨ̈ro, jare ñañono joko pe mburuvicha guasurä Tabeel taɨ.

⁷ Ërei yandeYa jei: ¡Jókuae, ngaraai ko jökorai oasa!

⁸ Tëta Damasco, jae ko kuae tëta guasu güi mburuvicha reta oporookuai vae, tëtaguasu Siria re. Jare mburuvicha guasu Rezín ko oï tëta guasu Damasco pe. Ërei sesenta y cinco año pe tëtaguasu Efraín mbaetɨta ma oiko.

⁹ Tëta Samaria, jae ko kuae tëta güi mburuvicha reta oporookuai vae, tëtaguasu Efraín re, jare Remalías taɨ ko oï mburuvicha guasurä tëta Samaria pe. Pe reta mbaetɨ peporogüɨrovia avei yave, mbaetɨta vi peiko jekuae avei.’ ”

Emanuel oata vae regua

¹⁰ YandeYa jei vi Acaz pe:

¹¹ “Eiporu cheve ndeyeupe mɨakañɨ reikuaa oyeapota ra vae, mɨakañɨ matɨ ɨvɨgüɨ kotɨ, ani ɨvate yae ara kotɨ vae.”

¹² Jare Acaz jei: “Mbaetɨta aiporu, ngaraa aeka kërai ajäa yandeYa.”

¹³ Jayave Isaías jei: “Peyeapɨsaka añave David iñemuña reta. ¿Mbaeä etei pa peve pemoambeko vaerä kuimbae reta, jare jökorai vi pemoambeko peï cheTumpa vae?

¹⁴ Jáeramo, yandeYa etei oyapota mɨakañɨ peve: Mase, ko metei kuñatai ndei etei kuimbae ndive oasa vae ipuruata, oata imembɨ metei kunumi raɨ, jare ombojeeta Emanuel pe.

¹⁵ Jouta guara jare ei, yarakuaa katu regua, oikuaa regua güɨröɨro ikavimbae vae jare oiparavo ikavi vae.

¹⁶ Echa michia raɨ ndei oikuaa güɨröɨro ikavimbae vae jare oiparavo ikavi vae mbove, mókoi mburuvicha guasu reta rekɨɨye chugüi vae reta iɨvɨ oyeeyata ipombae.

¹⁷ YandeYa güeruta nderé, nerëta re jare mburuvicha guasu jo pegua reta re, ara reta mbaetɨi jökorai vae, arakae Efraín oyemboyao Judá güi güive vae.” (Jókuae jae ko mburuvicha guasu Asiria pegua oporepeñata vae.)

¹⁸ Jókuae ara rupi yandeYa güeruta mberu rami mombɨrɨ Egipto iɨ̈aka rupi yogüɨreko vae reta, jare güeruta kävee rami Asiriaɨgua reta.

¹⁹ Jare yogüeru retata oñeñono jugua ñavo rupi, itakua reta rupi, opaete ñana pɨte yuu katuai vae rupi, jare opaete kaa rupi.

²⁰ Jókuae ara rupi yandeYa oiporuta mburuvicha guasu Asiria pegua, metei kɨse raɨ jaimbe yae vae rami, matɨ ɨ̈aka Éufrates jovaicho kotɨ güi; pɨpe oñapita Israel iñemuña reta ia, itɨmaka-raa jare jendɨvaa.

²¹ Jókuae ara rupi, metei ñavo vae güɨnoita metei guaka jare mókoi vecha,

²² jare neche jeta vae jeko pegua jouta guara. Jare opaete oasayepegüe jouta guara jare ei kuae ɨvɨ pe.

²³ Jókuae ara rupi, tenonde yave uvarupa güɨnoi yepi mil temitɨ uva iyɨpɨ vae, jare jepɨ yepi mil reare korepoti pegua vae, opɨtata yuu reta jendaräño.

²⁴ Güɨrapa jare uvɨ ndiveño oiketa omaepïaro jokoropi vae, echa opaete jókuae ɨvɨ yuu katuaita opɨta.

²⁵ Ɨvɨtɨ reta oñemaetɨse pɨpe vae pe, ngaraa ma kia ojo oväe, yuu güi okɨɨye jeko pegua. Jaeño ikavita guaka jare vecha reta ikaruarä.