ISAÍAS 64 - Biblia Guarani Tumpa Iñee

¹ Remondoro yave mona ara, javoi regüeyɨ, nderóvai opata ko tɨkui ɨvɨtɨ reta,

² tata jaku rai yae vae mbae omondɨkui vae rami, tata ombopupu ɨ vae rami. Jayave nderovaicho reta ndekuaata, jare tëtaguasu reta orɨrɨita nderóvai.

³ Reyapo yepi mbae tuichagüe, ore mbaetɨi royemongeta vae, regüeyɨ yave ɨvɨtɨ reta opa tɨkui nderóvai.

⁴ Mbaetɨi oyeendu kuae nunga, mbaetɨi oyeecha Tumpa nde rami vae, kërai oyapo avei mbaembae, jese güɨrovia vae reta peguarä vae.

⁵ Nde remboresive jókuae ipɨakatu reve kavi oyapo mbaejupi vae, jare imaendúa nde ndepɨa jemimbota oyapo vaerä vae reta. Nde ndearasɨ oreve, echa oreyoa; ɨma yae rupi ma roiko mbaeyoa rupi, ¿roasayepe vɨteriñota ra?

⁶ Opaete ore reta ko mbae ikɨa vae rami, orerembiapo kavi reta, tarapo ikɨa vae rami ko ndeve; opaete ore roa, ɨvɨra joo oa rami, jare orerembiapo kavimbae reta orereraja, ɨvɨtu güɨraja mbae rami.

⁷ Mbaetɨ metei ave oyerure ndekotɨ vae, mbaetɨ metei ave imaendúa oyeko vaerä nderé; jáeramo orereeya, orereeya orepiru vaerä ñana rami, orembaeyoa reta pe.

⁸ Ërei oreYa, nde ko jae oreRu; ore ko ñaeu, nde ko jae oreapoa; ¡nderembiapo ko opaete ore reta!

⁹ OreYa, agüɨye ndearasɨ yae, agüɨye vi nemaendúa avei oreyoa reta re. ¡Mase, ndembae vae ko opaete ore reta!

¹⁰ Tëta ndembae oñeñono tee vae ipombae oï, Sión ipoä oï, Jerusalén kïrii ngatu opɨta.

¹¹ Orembaemboetea ikavi yae vae, oreñemuñagüe reta pɨpe ndemboete yepi vae, opa oyemboai tata pe. ¡Opaete mbaembae roaɨu yae yepi vae, opa oyemboai!

¹² OreYa Tumpa, opaete kuae mbaembae oasa reve ¿mbaetɨta ra mbae reyapo? ¿Nekïriiñota ra, jekuaeñota ra orembopɨatɨtɨ yae?