ISAÍAS 63 - Biblia Guarani Tumpa Iñee

Tumpa oyepɨ jovaicho reta re

¹ —¿Kia pa kuae ou ɨvɨ Edom güi, tëta Bosra güi vae, jemimonde moropɨ̈ta ou vae? ¿Ipöra yae jemimonde vae, jare oguata imbaepuere yae reve vae? —Che ko, mbaejupi vae omoërakua vae, chembaepuere yae rupi oporoepɨ vaerä vae.

² —¿Maera pa ko moropɨ̈ta nderemimonde, uva re opɨ̈ro vae jemimondeecha?

³ —Cheño etei ko apɨ̈ro aiko uva re, mbaetɨ etei kia chemborɨ vae; chearasɨ yae reve apɨ̈ro cherovaicho reta re, chearasɨ yae reve aumbiri reta, jare jugüɨ otɨi cheremimonde re, jare opaetei cheremimonde amongɨa.

⁴ Echa ayepɨ vaerä iara, oime areko chepɨa pe; oväe ma año aepɨ vaerä chembae vae reta.

⁵ Amae, jare aecha mbaetɨ kia chemborɨ vaerä, chepɨakañɨ aecha ramboeve mbaetɨ etei kia chemborɨ vaerä. Cheyɨva pe ko ayereroasayepe, jare chearasɨ rupi cherëia yae.

⁶ Chearasɨ rupi opaetei amboai tëtaguasu reta, opa amboai reta chearasɨ rupi, jare jugüɨ apɨyere chugüi reta ɨvɨ rupi, jei yandeYa.

YandeYa ipɨakavi Israel kotɨ

⁷ Che aipota ayemomaendúa yandeYa iporoparareko re, jare tairari oñemee yandeYa pe vae re, opaete jae oyapo yandekotɨ vae re, ipɨakavi yae ete Israel iñemuña reta kotɨ vae re, iporoparareko rupi oyapo ikotɨ reta vae re, jare tuicha yae ete ipɨakavi jare iporoparareko vae re.

⁸ Echa jae jei: “Añetete chembae vae reta ko, cheraɨ mbaetɨ yapu vae reta.” Jae ko güɨroasayepe reta,

⁹ opaete mbɨatɨtɨ rupi yogüɨreko vae güi. Jae etei ko ou güɨroasayepe reta; jae ko oepɨ reta iporoaɨu rupi jare iporoparareko rupi, jare güeru reta jare omopüa reta jekuae avei pegua.

¹⁰ Ërei jae reta ipɨapochɨ yae yandeYa kotɨ, jare omboarasɨuka reta iespíritu; jáeramo oyemboyovaicho jae reta ndive, jare jae etei oñeraro jae reta ndive.

¹¹ Ërei jókuae Israel iñemuña reta imaendúa arakae vae re, Moisés re jare opaete vae reta re, jare jei reta körai: “¿Ketɨ pa oime oï jókuae Tumpa güɨnoe imbae vae reta ɨguasu güi vae, ivecha reta iyangarekoa Moisés ndive vae? ¿Jókuae oñono Moisés iyɨvɨte pe iespíritu vae,

¹² jókuae iyemboetea oñono Moisés re vae; ɨguasu omboyao jae reta japerä vae, jökorai oyapo jee jërakua yae avei vaerä vae,

¹³ ɨguasu rupi güɨroasa reta ogüɨapimbae reve vae, kavayu mbaetɨ ogüɨapimbae ñuu rupi vae rami?”

¹⁴ YandeYa iespíritu oyangareko jese reta, metei mɨmba ogüeyɨ ɨvɨpe kavi pe rami; jökorai oyangarekose imbae vae reta re, jókuae rupi jee oyemboeteuka yae ete.

Mboroparareko jare yemborɨ oyeporu Tumpa pe vae

¹⁵ Emae ara güi, jókuae ikɨambaea jare iyemboetea yaea pe reikoa güi. ¿Ketɨ pa oime nerägüɨro, ndembaepuere, ndepɨaä jare ndeporoaɨu orekotɨ vae? ¿Opa ma pa rembosɨrɨ oregüi?

¹⁶ ¡Ërei nde ko jae oreru! Yepe tëi Abraham mbaetɨ oreñono iñemuña rami, ani yepe tëi Israel mbaetɨ imaendúa oreré, nde oreYa, jae ko oreru; nderee jae ko, OreReepɨ avei vae.

¹⁷ OreYa Tumpa, ¿maera pa, reyavɨuka oreve nderemimbota, jare orembopɨa täta agüɨye vaerä romboete? Eyerova ye nderembiokuai reta reaɨu jeko pegua, ñemuña reta ndembae ae vae kotɨ.

¹⁸ ¡Mbovɨ año rupiño ndembae vae reta oñeñono tee vae yogüɨreko ɨvɨ iyarä! Orerovaicho reta opa omboai ndero mbaemboetea pegua.

¹⁹ Royu roiko, jókuae tëta nde mbaetɨi reiko juvicharä vae reta rami, jókuae mbaetɨi nderee oñeenɨia pe rami.