ISAÍAS 60 - Biblia Guarani Tumpa Iñee

Jerusalén ipɨau vae iyemboetea oimeta vae

¹ Epüa Jerusalén, emboesape, echa oväe ma ndeve tembipe, yandeYa iyemboetea ou nderé.

² Mase, pɨtumimbi oñovata ɨvɨ, jare tëtaguasu reta, ërei nderé omboesapeta yandeYa, nderé oyekuaata iyemboetea.

³ Jare nderembipe kotɨ yogüeruta tëtaguasu reta, mburuvicha guasu reta yogüeruta vi nderembipe kotɨ.

⁴ Jerusalén, emopüa neäka jare emae ndeɨ́vɨri: Opaete vae oyomboatɨ jare yogüeru ndekotɨ. Nemembɨ reta yogüeruta mombɨrɨ güi; jare güeruta iyɨva re nememɨkuña reta.

⁵ Reechata jare reyerovia yaeta, nepɨakañɨ yaeta; echa güeru retata ndeve mbaeyekou reta tëtaguasu reta ɨguasu jembeɨ rupigua güi, güeru retata ndeve ïru tëtaguasu reta imbaeyekou reta.

⁶ Jetagüe camello omboatɨ retata nderé, Madián jare Efa güi yogüerugüe reta; opaete Sabá pegua yogüerugüe reta, güeruta oro jare ikäti kavi vae incienso, omoërakua retata yandeYa iyemboetea.

⁷ Opaete mɨmba Cedar pegua reta oyereruta ndeve; vecha kuimbae Nebaiot pegua reta ñogüɨnoita ndepo pe, remee vaerä ndeYa imbae mɨmba oyeyuka oyeapɨ jese vae re mbota mbɨakatu peguarä jare jae jeiete omopörata itupao ikavi yae vae.

⁸ ¿Kia pa kuae reta amapɨtu rami oveve vae, ani pɨkasu reta jaitɨ kotɨ yogüeru vae rami vae?

⁹ Jae ko barco guasu reta yogüeru Tumpa kotɨ vae, tenonde ou barco reta Tarsis pegua, güeru reve nemembɨ Israel iñemuña reta mombɨrɨ güi, ioro ndive jare ikorepoti ndive, ndeYa Tumpa, Iyoambae Israel pegua jee re, jae ko ndemboeteuka vae.

¹⁰ Ketɨgua reta omopüata nekësea, juvicha guasu reta oyeokuaita ndeve; echa, yepe tëi yandeYa iyarasɨ rupi oiporarauka ndeve, añave ipɨakavi ndekotɨ, güɨnoi mboroparareko nderé.

¹¹ Neröke reta oyepea aveita; ngaraa oyeokenda ara pe ani pɨ̈tu yave ave, oyereru vaerä ndeve tëtaguasu reta imbaeyekou reta, jare mburuvicha guasu reta oike vaerä jupiegua reta ndive.

¹² Tëtaguasu mbaetɨ oyeokuai ndeve vae, okañɨteita; tëtaguasu reta opaeteita oyemboai.

¹³ YandeYa jei Jerusalén pe: “Líbano pegua mbaeyekou oyereruta ndeve: Ɨvɨra reta pino, ciprés jare bojes jee vae, remopöra vaerä pɨpe chero mbaemboetea, rembokavi vaerä che aikoa.

¹⁴ Jare oñemomichi reve yogüeruta ndekotɨ oiporaraukase ndeve vae taɨ reta, jare nemotareɨse vae reta, oyetavatɨkata nderóvai, jare nereenɨi retata ‘YandeYa Jëta guasu’, ‘Sión, Iyoambae Israel pegua jëta’.

¹⁵ Ngaraa ma reyemombo reiko, reñereröɨro ani reiko ndeiño, che rombotuicha yaeta jekuae avei pegua, vɨakatu oñeväeta nderé jekuae avei rupi.

¹⁶ Tëtaguasu reta omeeta ndeve tembíu ikavigüe jare mburuvicha guasu reta güeruta ndeve imbaeyekou reta; jayave peikuaata che peYa ko jae pereroasayepe vae, che, Imbaepuere yae ete vae Jacob pe vae, che ko jae ndeReepɨ vae.

¹⁷ Jiero iyu vae jekovia pe ameeta ndeve oro, jiero jekovia pe, korepoti, ɨvɨra jekovia pe, jiero iyu vae, ita jekovia pe, jiero. Ameeta mbɨakatu ndeve, mbaemboepɨ jekovia pe, jare jupi vae, ndererekoasɨ katu vae reta jekovia pe.

¹⁸ Ndeɨvɨ pe ngaraa ma jërakua tekorai, ngaraa ma vi oime susere ndeɨvɨ pe, jaeño nekësea rembojeeta ‘Yereroasayepe’, jare neröke reta ‘Mbaemboete’.

¹⁹ Ngaraa ma reipota kuaraɨ omboesape vaerä ndeve ara pe, ani yasɨ ave omboesape vaerä ndeve pɨ̈tu yave, echa, che ndeYa jae ko tembipe opambae; che, neTumpa, jae ko ndemboesape vae.

²⁰ Kuaraɨ ngaraa ye ma oike, kuaraɨ aveita ndeve, jare yasɨendɨ katu aveita, echa, che ndeYa, tembipe opambae aikota ndeve; ndeara mbɨatɨtɨ pegua opata.

²¹ Opaete nerëta pegua reta jupi yaeta, jae reta ko ɨvɨ iyarä jekuae avei pegua, ɨvɨra jeñɨigüe, che etei añotɨ vae ko, mbaravɨkɨ che ayapogüe, aechauka vaerä cheyemboetea.

²² Kuae mbovɨ yae vae, oyembojeta yaeta; kuae tëta michi yae vae, tëtaguasu tuicha yae vaerä ko. Che ndeYa, ameeta oyembopo vaerä jarembae, iara pe kavi.”