ISAÍAS 6 - Biblia Guarani Tumpa Iñee

Isaías oecha vae jare iñeenɨi regua

¹ Jókuae año mburuvicha guasu Uzías omano yave, che aecha yandeYa oguapɨ oï metei mburuvicha guasu iguapɨka ɨvate jare ipöra yae vae pe; jare jemimonde jembeɨ omotɨnɨe oñemoai tupao pe.

² Iárambo rupi ñogüɨnoi araɨgua serafín reta; metei ñavo vae güɨnoi ova ipepo; mókoi ipepo pe jova oñomi reta, ïru mókoi pe oñomi ipɨ reta, jare ïru mókoi re oveve reta.

³ Jare osapúkai päve jei oyoupe reta: “Iyoambae, Iyoambae, Iyoambae ko yandeYa Imbaepuere yae ete vae; opaete ɨvɨ tɨnɨe oï iyemboetea pe.”

⁴ Jare jókuae osapúkai vae reta omokana tupao jöke reta oyekutu jese vae isapúkai pe, jare tupao tɨnɨe tätati pe.

⁵ Jayave jae: “¡Atataɨ, maera pa ko amanota! Echa che kuimbae iyuru ikɨa Tumpa jóvai reve, jare tëta iyuru ikɨa Tumpa jóvai vae reta ipɨte pe aiko reve aecha Mburuvicha guasu, yandeYa Imbaepuere yae ete vae.”

⁶ Jare metei araɨgua serafín oveve ou chekotɨ, ipo pe güɨnoi metei tätapɨi jendɨ reve, mɨmba oyeyuka oyeapɨ jese vae güi oekɨ metei tenasa pe vae;

⁷ jare pɨpe cherembe oñátai reve jei: “Mase, kuae tätapɨi oñátai nderembe. Oyeekɨ ndegüi ndereko, jare oyetɨo ndeyoa.”

⁸ Jaɨkue rupi aendu yandeYa iñee, jei körai: “¿Kia ra amondota? ¿Kia ra güɨrajata oreñee?” Jayave che jae: “Ko aï, che chemondo.”

⁹ Jare jae jei cheve: “Ekua jare ere kuae tëta pe: ‘Peendu kavi, ërei ngaraa peikuaa; peecha kavi, ërei ngaraai peikuaa kavi.’

¹⁰ Embopɨatäta kuae tëta; eyapete iyapɨsa reta jare esaöva, agüɨye vaerä oecha reta jare oendu reta, jare ipɨa reta ave agüɨye toikuaa kavi, agüɨye toyepoepɨ reta jeko güi, okuera reta vaerä.”

¹¹ Jare che jae chupe: “¿Kërai yave regua pa cheYa?” Jare jae jei cheve: “Tëta guasu reta opa oyemboai regua, ipombae opɨta regua; o reta ipombae opɨta regua, jare ɨvɨ ipombae opɨta regua,

¹² che ndeYa opa regua omombo mombɨrɨ kuimbae reta, jare kuae ɨvɨ opaetei ipombae opɨta regua.

¹³ Jare opɨta yave mbovɨ yepe kuae tëta pe, jókuae jaenunga vi oyemboaita; ërei ngatu ɨvɨra roble jare encina jee vae reta oyeasɨa yave, jekuaeño opɨta iyɨpɨgüe, jökoraita ko opɨta ñemuña reta oñeñono tee vae jembɨregüe.”