ISAÍAS 59 - Biblia Guarani Tumpa Iñee

Israel oiporara iyoa re

¹ YandeYa mbaetɨ ko ipo ombosɨrɨ, mbaetɨ vaerä oporogüɨroasayepe, mbaetɨ ko oyopia iyapɨsa, mbaetɨ vaerä oendu.

² Ërei peyoa reta pemboyao peTumpa güi, peyoa reta oñovauka Tumpa jova pegüi, agüɨye vaerä oyeapɨsaka peré.

³ Echa pe reta peporoyuka vae ko, jare pepo reta tugüɨ yepeai, peapu jare pere ñee ikavimbae.

⁴ Mbaetɨ kia oñeapo jupi rupi, mbaetɨ vi kia oporojäa añetegüe rupi. Güɨrovia katu reta apu re, jare ñee añetembae re; ipurúa reta rami ikavimbae pe, jare omoë reta mbaeyoa.

⁵ Pemboyauka mboi jupiagüe, jare peñope ñanutirapaa; kia jou jókuae mboi jupía vae omano, jare kia oumbiri yave jókuae mboi jupía, mboi raɨ oëta chugüi.

⁶ Jókuae ñanutirapaa mbaetɨ ikavi temimonderä; mbaetɨ kia ipuere oyemonde pɨpe. Opaete perembiapo reta yoyuka yepeai, pemaepɨ̈ro vaeräño peiko.

⁷ Pesɨi katu ikavimbae kotɨ, peo vaerä peyuka jekombae vae jarembae pegua, peyemongeta reta ikavimbae reño, peiko peporomokañɨtei vaeräño.

⁸ Mbaetɨ peikuaa mbɨakatu re, mbaetɨ vi peiko jupi rupi. Pereko reta ikaviä etei; jókuae rupi yogüɨreko vae, mbaetɨ oväe mbɨakatu.

⁹ Isaías jei: Jáeramo osɨrɨ yandegüi jupi vae, mbaetɨ ou yandeve isɨmbi vae; ñaäro tëi tembipe, jaeño oime yandeve pɨtumimbi; ñaäro tëi jembipe katu vae, ërei yaguata pɨtumimbi rupi.

¹⁰ Yapovɨvɨ yaguata jesambae rami, ñanepɨ̈sa yeyuka ara pe, pɨ̈tu yave rami; yaiko pɨtumimbía pe, tëogüe reta rami.

¹¹ Opaete yande reta ñanepüae, oso ipüae rami, ani pɨkasu ipüae rami; ñaäro tëi jupi vae, ërei mbaetɨ oväe; ñaäro tëi yeyora, ërei osɨrɨ yandegüi.

¹² Echa orembaeyoa jeta yae ndekotɨ, oreyoa aeño oñeapo oï oreré; echa ore ndive oï oreyoa reta, roikuaa ikavimbae royapo vae.

¹³ Nde oreYa oreokuai tëi vae mbaetɨ royapo jare oreapu ndekotɨ, jare rosɨrɨ nde oreYa Tumpa güi, royangao jare royembopɨapochɨ, orepɨa güi oë oreapu vaerä. Roporombotavɨ vaerä.

¹⁴ Jupi vae rogüɨröɨro, sɨmbi vae osɨrɨ oregüi, añete vae rombosɨrɨ oreyeugüi oka guasu pe, jare mbaetɨ oime mboromboete.

¹⁵ Añete vae mbaetɨ etei ma, ikavimbae güi oyembosɨrɨ tëi vae, oñeñono tembipɨɨrɨru pe. Nde oreYa pe mbaetɨ ikavi jókuae, reecha yave mbaetɨ etei jupi vae.

¹⁶ Jare yandeYa ipɨakañɨ, oecha yave mbaetɨ kia oyapo kavi kuaekuae; jayave jae etei oyapo imbaepuere rupi, jare oporomoamɨri.

¹⁷ Oyemonde jupi vae pe, jete regua temimonde ñeraro pegua pe rami, jare oyemonde mborogüɨroasayepe pe, äka-ɨru ñeraro pegua pe rami, yepɨse pe oyemonde, temimonde pe rami, jare oñeova arasɨ pe, ñeapevaka pe rami.

¹⁸ YandeYa omboepɨukata metei ñavo pe, jeko ae re, oiporaraukata jovaicho reta pe. Imotareɨa reta pe omboepɨukata jeko oï rupi; tëtaguasu reta ɨguasu jembeɨ rupigua reta pe ave.

¹⁹ Opaete ɨvɨ, kuaraɨ oëa kotɨ güive kuaraɨ oikea kotɨ, omboeteta yandeYa oecha yave iyemboetea. Echa yogüeruta tovaicho reta, ɨ ɨ̈aka rupi tuichagüe ou rami. Ërei yandeYa oñemopüata chupe reta.

²⁰ Outa Oporoepɨ vae Sión pe, jare opaete Jacob iñemuña reta oeya iyoa vae pɨri. Jökorai yandeYa jei.

²¹ YandeYa jei: “Kuae jae cheporogüɨrökuavee päve ayapo pe reta ndive vae, chembaepuere jare cheporomboe ngaraa oata peve jare peñemuña reta pe.” Jei yandeYa jekuae avei pegua.