ISAÍAS 57 - Biblia Guarani Tumpa Iñee

Tumpa-raanga reta imboetea reta regua

¹ Kuimbae jupi vae omano jare mbaetɨ kia oyemoambeko jese; kuimbae reta jeko kavi vae omano, jare mbaetɨ kia oikuaa, oñerenoe ko ikavimbae güi vae,

² oike reta mbɨakatu pe. Oputuu retata jɨvɨa pe, opaete yogüɨreko reta Tumpa jemimbota rupi vae.

³ Pe, imbaekuaa vae reta, peya katu, menda re oyuvanga vae, jare iyaguasa pota vae reta.

⁴ ¿Kia re pa pepuka puka? ¿Kia pe pa pekü pemoë moë? ¿Kia re pa pemiari kaviä? Pe reta ¿jaeä pa ko ipɨapochɨ vae reta, jare iyapu vae reta?

⁵ Peyogüɨroke ɨvɨra iküaraɨa kavi vae igüɨ rupi, jare peyuka michia reta pemee petumpa-raanga reta pe ɨvɨtɨ päu ipe kavía rupi, ɨ̈vavira igüɨ rupi.

⁶ Israel, ɨvɨtɨ päu ipe kavía pegua ita iïchɨi vae reta oimea pe, ikavi ndeve rembaemboete vaerä, jae ko remboete, chupe reta remee vino mbota oyepɨyere vae, jare temitɨ jäɨgüe. Opaete kuae peyapogüe reta ¿chemboyeroviata yera?

⁷ Ɨvɨtɨ ɨvate yae vae iyapɨte re, reñono nderupa, joko pe vi reyeupi remee mɨmba oyeyukagüe.

⁸ Öke ikupe re reñono netumpa-raanga reta. Neakañɨ chegüi, reyemonandi, javoi reyapakua nderupa ipɨguasu vae pe; reñomomiari kuimbae reta ndive reyapakua vaerä jae reta ndive, jare remae jókuae tumpa-raanga reta re.

⁹ Reo tumpa-raanga kotɨ, reraja reve asaite jare jeta ikäti kavi vae; remondo mombɨrɨ ñee jerajaa reta nderekovia pe, remondo ɨvɨ kotɨ omanogüe reta ñogüɨnoia pe.

¹⁰ Jeta yae reguata vae ndembokangɨ, ërei mbaetɨ rere: “Chekuérai ma aguata.” Reñemoäta ngatu avei, jáeramo mbaetɨ ndekuérai.

¹¹ ¿Kia pa jókuae tumpa-raanga reta reipoɨu chugüi jare remboete vae, jupimbae reiko vaerä cheve? Mbaetɨ kërai ave nemaendúa cheré; nde mbaetɨ chemboete yave, kïriiño apɨta iyɨpɨ güive jare mbaetɨi reipoɨu chegüi.

¹² Ërei amoërakuata ndereko reta, nderembiapo, ndepɨa pe remboete yae vae.

¹³ Resapúkai netumpa-raanga reta pe ndemborɨ vaerä yave, ngaraa ndemborɨ, ngaraa vi ndereroasayepe. Opata ɨvɨtu güɨroveve jókuae netumpa-raanga reta; ërei cheré güɨrovia vae, güɨnoita ɨvɨ imbaerä jare oikota cheɨvɨtɨ oñeñono tee vae pe.

Israel oiporara jare iñepoano

¹⁴ Jayave oyeenduta jei: “Peyapo kavi jare pemboipe tape, pembosɨrɨ tape güi mbae oporomboavai vae reta, chembae vae reta oasa vaerä.”

¹⁵ Echa Tuicha yae ete vae, oikoño mai vae, jae ko jee iYoambae, jae jei: “Che aiko ɨvate jare oñeñono teea pe, ërei aiko vi oiporara jare ipɨatɨtɨ vae reta ndive, amee chupe tekove, jäta ngatu vaerä.

¹⁶ Echa ngaraa amboeko avei chembae vae reta, ngaraa vi chearasɨ avei aiko; echa jökorai yave cherembiapo reta ipɨtuta cheróvai.

¹⁷ Israel iñemuña reta iyoa jeko pegua chearasɨ, aiporarauka chupe jare ayerova chugüi reta; ërei jeiete oyembopɨapochɨ reta, jare oyapo reta ipɨa jemimbota.

¹⁸ Aecha jeko reta, ërei aipoanota jare ayangarekota jese reta. Che ambopɨakatuta ipɨatɨtɨ vae reta;

¹⁹ jare jaeta opaete vae pe: ‘¡Mbɨakatu toime mombɨrɨ ñogüɨnoi vae pe jare mbɨakatu toime köiño ñogüɨnoi vae pe! Che aipoanota tëta chembae vae reta.’

²⁰ Ërei iyoa vae reta ɨguasu pe ama ɨvɨtuai reve vae rami, mbaetɨ ipuere kïrii, jare iɨaparúa rupi omombo tuyuapo jare ikɨagüe.

²¹ Iyoa vae reta peguarä mbaetɨ mbɨakatu.” Jei cheTumpa.