ISAÍAS 56 - Biblia Guarani Tumpa Iñee

Tumpa iporogüɨrökuavee päve omboete vae reta pe oyemboekovia vae regua

¹ YandeYa jei körai: “Peyapo jupi vae, peyapo sɨmbi vae, echa köiño ma ou cheporoyora; amboyekuaa vaerä chembaepuere, cheporogüɨroasayepe.

² Oyeroviata kuimbae oiko kuae mborookuai reta jeigüe rupi vae, omboete ara mbutuu jare mbaetɨ güɨröɨro vae, oyeandu mbae ikavimbae oyapo vaerä güi vae.”

³ Ketɨgua oñemee yave yandeYa pe, agüɨye tei: “CheYa chembosɨrɨta imbae vae reta güi.” Eunuco ave agüɨye tei: “Che ko ɨvɨra yɨpigüe rami.”

⁴ Echa yandeYa jei: “Eunuco reta omboete yave cheara mbutuu, yogüɨreko yave jaegüe rupi jare cheporogüɨrökuavee päve rupi,

⁵ yepe tëi mbaetɨ taɨ jare tayɨ, ërei che ameeta chupe reta ikavi yae vae, jae ko, jee opɨta vaerä jekuae avei pegua chero pe, chero japɨpe pe; ameeta chupe jee opambae, ngaraa etei oyemboai vae.

⁶ Jare ketɨgua reta taɨ, cheremimbota rupi yogüɨreko, oyeokuai reta vaerä cheve vae, jare oaɨu reta cheree yogüɨreko vaerä cherembiokuairä; jare opaete omboete ara mbutuu vae reta, agüɨye vaerä güɨröɨro, yogüɨreko cheporogüɨrökuavee päve rupi vae reta,

⁷ che araja retata cheɨvɨtɨ oñeñono tee vae pe, jare ambovɨakatu retata chero yerure pegua pe; jare mɨmba oyeyukagüe opa etei oyeapɨ vae, jare ïru mɨmba oyeyukagüe reta re chepɨakatuta amae, omee reta yave mɨmba oyeyuka oyeapɨ jese vae re; echa chero oyembojeeta, o yerure pegua opaete vae reta peguarä.

⁸ Che peYa Tumpa, Israel iñemuña reta opa oñemoai moai ñogüɨnoi vae reta omboatɨ vae, jae körai: Amboatɨ ye ñotai ïru tëta reta rupi oñemoai ñogüɨnoi vae.”

Yemboeta mburuvicha jeko kavimbae reta kotɨ

⁹ Opaete mɨmba kaa rupigua, opaete mbaeporou kaa rupigua, peyu pekaru;

¹⁰ echa sundaro ɨvate güi omae vae reta, jesambae rami ñogüɨnoi, mbaetɨ etei mbae oikuaa ñogüɨnoi. Opaete jae reta yaɨmba iñarosembae rami ko, mbaetɨ ipuere oñaro reta; oke reteiño jare oaɨu yae reta jopeɨ.

¹¹ Yaɨmba jɨ̈vɨatambae rami ko, maangarekoa mbae oikuaambae vae; opaete yogüɨreko ipɨa jemimbota reño, iyeupeguaräño mbae oeka reta.

¹² Jei reta: “Yaja yaeka vino jare mbae oporombosavaɨpo vae, yandembosavaɨpo vaerä. Javoi pɨareve yayapo ye añave rami, ani oasa ete ye ikavi yayapo.”