ISAÍAS 54 - Biblia Guarani Tumpa Iñee

YandeYa iporoaɨu avei Israel kotɨ

¹ Imembɨmbae vae, eyerovia; nde mbaetɨi nemembɨ vae, etairari, reyerovia güi, echa yandeYa jei: “Kuña oyeeyagüe, jetata imembɨ, kuña ime ndive oï vae güi.”

² Embopɨguasu ndero guakapi pegua, embopɨguasu ndero guakapi pegua oyemboyao yao vae; agüɨye toata, embopuku nerɨmasa ndero imoataa, ietaka reta eyatɨka kavi eñono,

³ echa ndeakatu kotɨ jare ndeasu kotɨ reñemoaita; neñemuña reta opɨ̈rota iyeupe tëtaguasu reta, oñemoëta retata tëta guasu reta ipombaea rupi.

⁴ Agüɨye ekɨɨye, ngaraa reñemomaraiuka; agüɨye nemara, ngaraa ndekura vae. Neakañɨta ndetaɨrusu yave nemara vae güi, jare nememano yave nemara vae güi.

⁵ Echa ndeApoa ko jae neme rami. Jae ko jee yandeYa Imbaepuere yae ete vae; ndeReepɨ vae, jae ko Iyoambae Israel pegua, jae ko jee Tumpa, opaete ɨvɨ pe.

⁶ Echa yandeYa nereenɨi kuña oyemombogüe jare mbɨatɨtɨ rupi oiko vae oñeenɨi rami; tembireko taɨrusu vae oyemombogüe rami, neTumpa nereenɨi jare jei ndeve:

⁷ “Romombo michi pegua, ërei mboroparareko tuichagüe rupi rogüeru yeta.

⁸ Chearasɨ rai jeko pegua, ayerovata ndegüi michi pegua, ërei mboroparareko jekuae avei vae rupi ropararekota.” Che ndeYa, ndeReepɨ vae, jae.

⁹ “Jáeramo, Noé oiko yave ramita, Noé pe añererökuavee cheree ae re, ngaraa ye ma ɨvɨ opa amboai vaerä ɨ pe, jökorai vi añave, añererökuavee cheree ae re, ngaraa ye ma chearasɨ ndekotɨ, ngaraa ye ma añeengata ndeve.

¹⁰ Yepe ɨvɨtɨ guasu reta osɨrɨta jenda güi, ɨvɨtɨ reta opata osururu, ërei cheporoaɨu ngaraa oyepoepɨ ndegüi, cheporogüɨrökuavee mbɨakatu pegua ave ngaraa opa oyemboai.” Jei yandeYa, iporoparareko ndekotɨ vae.

¹¹ “¡Paravete, tëta guasu oiporara jeta mbaesusere vae, mbaetɨ reve kia ombopɨakatu vaerä! Ërei che añonota ita reta ndeguapɨka ita ipöra vae, carbunclo jee vae re, romboguapɨta ita ipöra vae, zafiro jee vae re;

¹² neventana reta ayapota ita ipöra vae pegua katuai, neröke reta ita ipöra vae carbunclo jee vae pegua katuai, opaete nekësea ayapota ita ipöra vae pegua katuai.

¹³ Jare opaete nemembɨ reta che ndeYa etei amboeta; jare oyekou yaeta mbɨakatu re.

¹⁴ Mbaejupi vae nemopɨ̈ratata, mbaetɨta ma kia oiporarauka ndeve vae, ngaraa ma rekɨɨye; echa kɨɨye ngaraa ma oya nderé.

¹⁵ Kia nunga vae oporepeña nderé yave, cheporookuai rupiä ko outa; kia oñemopüa ndekotɨ vae, nde remoamɨrita.

¹⁶ Che ko ayapo jiero pegua mbaravɨkɨ pe oparavɨkɨ vae, jókuae oipeyu tata vae, jókuae oyapo oipotagüe tembiporu iyeupe vae. Che ko ayapo oporomboai vae, oporomboai vaerä.

¹⁷ Ngaraa ipuere ndemboai metei ave tembiporu ñeraro pegua oyeapogüe. Remoamɨrita oipotagüe oñemopüa tëi ñeapo rupi ndekotɨ vae. Jökoraita ko opaete cherembiokuai reta, köraita ko oporomoamɨri reta.” Jei yandeYa.