ISAÍAS 52 - Biblia Guarani Tumpa Iñee

Tumpa oyorata Sión tembipɨɨ güi

¹ Epüa Sión, eñemomɨ̈rata, Jerusalén, tëta guasu oñeñono tee vae, eyemonde nderemimonde ipöragüe pe, echa ngaraa ye ma ou ndekotɨ itumpa-raanga pota vae reta, ani ikɨa Tumpa jesa róvai vae reta.

² Jerusalén, emotumo ɨvɨ ndeyeugüi, epüa eguapɨ. Eyora ndeayu iñapɨtía, nde Sión, tembipɨɨrä reï vae.

³ YandeYa jei körai: “Reñemeeukaiño jepɨmbae, jökorai pogua yeta jepɨmbae.

⁴ Echa tenonde yave, tëta chembae vae ojo Egipto pe, oiko vaerä joko pe; jaɨkue rupi Asiriaɨgua reta oiporaraukaiño chupe reta jupimbae reve.

⁵ Añave, ¿mbae ra ayapota? Opa güɨraja reta tëta chembae vae, jupimbae reve. Jókuae jerajaa reta oiporarauka avei chupe reta, omoäse avei reta. Cheangao avei reta.

⁶ Ërei kuae jeko pegua, tëta chembae vae, metei ara chekuaa kavita; echa añave che etei chemiari aï vae, aïta joko pe.”

⁷ ¡Ipöra yae ko ɨvɨtɨ reta re oyekuaa ou, ñee ikavigüe yerovia pegua omoërakua vae, mbɨakatu omoërakua vae, mbae ipɨau ikavigüe omoërakua vae, yereroasayepe omoërakua vae, Sión pe jei vae: “NeTumpa oï mburuvicha guasurä”!

⁸ ¡Jare sundaro ɨvate güi omae vae reta isapúkai oyeenduta! Osapúkai retata, opareve osapúkai retata yerovia katu reve; echa jae reta etei oechata yandeYa oyerova ye ma Sión kotɨ vae.

⁹ ¡Petairari mbaemboete, peyerovia päve Jerusalén oyemboaigüe; echa yandeYa ombopɨakatu jëta, oepɨ ye Jerusalén!

¹⁰ YandeYa omboyekuaa imbaepuere, opaete tëtaguasu reta jesa róvai, jare opaete ɨvɨ iyapɨ rupi ave oendu ñaneTumpa iporogüɨroasayepe re vae.

¹¹ ¡Pesɨrɨ, pesɨrɨ, peë jókuae Babilonia güi, agüɨye peyavɨkɨ mbae ikɨa Tumpa jóvai vae, peë joko güi; peyetɨo yandeYa jembiporu jerajaa reta!

¹² Echa ngaraa peë rai rai, jare ngaraa petekuarai; echa yandeYa ojota perenonde, Israel iTumpa ko pemboatɨta.

YandeYa jembiokuai imbaeporara

¹³ Mase, cherembiokuai oyekou yaeta ko, oyembotuichaukata jare jërakua yaeta.

¹⁴ Jare ipɨakañɨta nderé jeta vae reta, opaetei oikomegua nderova, kuimbae reta jova güi, jare nepöra opa okañɨ kuimbae ipɨte güi.

¹⁵ Jökoraita jae omopɨakañɨ, jeta tëtaguasu reta; mburuvicha guasu reta ngaraa etei iñee omoë jóvai, echa oecha retata mbaetɨi kia omombeu chupe vae, jare oikuaa retata mbaetɨi oendu vae.