ISAÍAS 50 - Biblia Guarani Tumpa Iñee

YandeYa omborɨ oyeko jese vae reta

¹ YandeYa jei körai: “¿Ayapouka pa tupapire yomombo pegua pesɨ Israel peguarä, ani pomee pa chepia chupe vae reta pe, chepia re? Peyoa reta jeko pegua ko opa peñemeeuka, pepɨapochɨ jeko pegua ko pesɨ Israel oyemombouka.

² ¿Maera pa ayu yave, mbaetɨ etei kia aväe chupe? ¿Maera pa aporoenɨi tëi yave, mbaetɨ kia ave omoë iñee? Jae reta iyemongeta pe, mbaetɨ potaecha ndipo aepɨ reta, mbaetɨ potaecha ndipo chepuere ayora reta iyeupe. Cheñee peño ko opa amondɨpa ɨguasu jare ɨ̈aka reta opa amotini; jevae ɨ rupigua reta opa omano ɨ oata jeko pegua.

³ Che ko ambopɨtumimbi ara, amboemimonde temimonde mbɨatɨtɨ pegua jüu vae pe rami.”

⁴ YandeYa Tumpa omee cheve chepoki vaerä chemiari, ambopɨakatu vaerä ikangɨ vae reta, ñee ñemoäta ngatu pegua pe. Ndeimbove ñavo jae chemomba, jare ayeapɨsaka jese chepɨakatu reve kavi.

⁵ YandeYa Tumpa omee arakuaa katu cheve, jare mbaetɨ ayembopɨapochɨ, mbaetɨ ayerova ye cheraɨkue kotɨ chugüi.

⁶ Amee chekupe, chenupa reta vaerä vae reta pe, jare amaeño cherendɨvaa mondoro reta. Cherova mbaetɨ arova iñeenguru jare ondɨvɨ cheré vae reta güi.

⁷ Echa, cheYa Tumpa ko chemborɨta, jáeramo, ngaraa ko chemara; jáeramo, amotäta cherova, ita rami, echa aikuaa ko ngaraa añemomaraiuka.

⁸ Köi ko oiko chegüi chereepɨ vae, ¿oime pa kia oipota oyoaka che ndive? Torojo päve oporojäa vae jóvai, ¿oime ra kia mbae re oñeapo vaerä cheré? ¡Tou jare tei cheve!

⁹ CheYa Tumpa ko chemborɨta; ¿kia pa ipuereta chemboeko? Cherovaicho reta opata ko indechi, temimonde indechi rami, opata ko ikupii.

¹⁰ Opaete pe reta peipoɨu yandeYa güi vae, jare peendu jembiokuai iñee vae: Pɨtumimbía rupi peguata yave, ani mbaetɨ jembipe ete kavi mbatee peve yave, peyeko yandeYa re, peyeko peTumpa re.

¹¹ Ërei opaete, pe peyatapɨ vae reta, tata pemoendɨ vae reta, peata perata pe aeño, jókuae peyatapɨ vae pe. YandeYa jei: Che etei ayapota jókuae peve, jare opata pekañɨtei jókuae tembiporara pe.