ISAÍAS 49 - Biblia Guarani Tumpa Iñee

YandeYa jembiokuai

¹ Peyeapɨsaka, tëtaguasu ɨguasu jembeɨ rupigua reta, tëtaguasu reta mombɨrɨ rupigua reta: YandeYa chereenɨi ndei aa güive voi ma, chesɨ jɨe peve voi ma chembojee.

² Kɨsepuku jaimbe vae rami oyapo chekü, chemoia ipo igüɨ pe, cheapo uvɨ jakuaroviasɨ vae rami jare cheñono iuvɨrɨru pe.

³ Jare jei cheve: “Israel, nde ko cherembiokuai, nderé ayemboeteukata.”

⁴ Che ko jae tëi: “Aparavɨkɨ mbateeiño ma, ayembokangɨ mbateeiño ma.” Ërei, cheYa ipo pe ko oï cherekove, jae ko omboekoviata cheve cheparavɨkɨ.

⁵ YandeYa, chesɨ jɨe güive voi ma cheparavo jembiokuairä vae, amboyerova ye vaerä Tumpa kotɨ Jacob, Israel iñemuña reta, echa chererovia katu cheYa, cheTumpa ko jae chepɨ̈rata.

⁶ Jae jei körai: “Mbaetɨta royókuai, remopüa ye Jacob iñemuña reta vaeräño, Israel iñemuña jembɨregüe reta; roñono vi ko tembipe rami opaete tëtaguasu reta peguarä, reraja vaerä yereroasayepe amee vae opaete vae reta pe, ɨvɨ jembeɨ rupi ave.”

⁷ YandeYa, oPoroepɨ vae, Tumpa Iyoambae Israel pegua, jei oñemotareɨuka ïru tëtaguasu reta pe vae pe, ipɨarai vae reta jembipɨɨrä oiko vae pe: “Mburuvicha guasu jare mburuvicha reta ndereecha yave, opüata jare ndemboeteta; echa che ndeYa, Tumpa Iyoambae Israel pegua jupi vae ko, che ko roparavo.”

Tumpa oñererökuavee omopüa ye vaerä Sión

⁸ YandeYa jei: “Ou ma oväe aechauka vaerä cheporoaɨu, jáeramo ayeapɨsaka nderé, ou ma oväe yereroasayepe iara, jáeramo romborɨ. Che ko roñovatu, nderupi ayapo vaerä ñererökuavee päve tëta ndive, amopüa ye vaerä kuae tëtaguasu, amee ye vaerä iyagüe reta pe ɨvɨ opa oyemboai oï vae.

⁹ Rere vaerä tembipɨɨ reta ñogüɨnoi vae reta pe: ‘Peë’, jare pɨtumimbía pe ñogüɨnoi vae reta pe ere: ‘Peyeechauka.’ Tape rupi peväeta kapii, jare opaete ɨvɨ ipombaea rupi oimeta perɨmba reta jembiurä.

¹⁰ ‘Mbaetɨta peyɨmbɨaɨ ani peɨuve yepe, araku ani kuaraɨ ave mbaetɨta peaporai, echa che poaɨu jare che ko pogüɨroatata, pogüɨrajata ɨesaɨ katuaía rupi.

¹¹ Ayapota tape ɨvɨtɨ rupi jare tape amboipe kavita.’

¹² Mase, amogüe reta yogüeruta matɨ güi, amogüe reta yogüeruta ɨvɨtuguasu kotɨ güi, amogüe reta yogüeruta kuaraɨ oikea kotɨ güi, amogüe reta yogüeruta ɨvɨ Sinim jee vae kotɨ güi.

¹³ ¡Ara ipo reta, petairari reyerovia güi! ¡Ɨvɨ ipo reta, peyerovia yae! ¡Ɨvɨtɨ reta, perɨapu peyerovia reve! Echa yandeYa ombopɨakatu tëta imbae vae, oiparareko oiporara yogüɨreko vae reta.

¹⁴ Ërei tëta guasu Sión pegua jei: ‘CheYa chereeya, cheYa ñakañɨ chegüi.’

¹⁵ ¿Kuña iñakañɨta ra imembɨ güi, ani ikueraita ra oaɨu? Yepe tëi kuña iñakañɨ imembɨ güi, ërei che ngaraa cheakañɨ ndegüi.

¹⁶ Mase, chepombɨte re etei ko nderee aikuatía areko, nekësea re amae avei ko.

¹⁷ Nemopüa pɨau yeta vae reta, yogüeru yogüɨreko ramboeve, ndemboai jare nererokomegua vae reta opata ñogüɨnoe yogüɨraja ndegüi.

¹⁸ Emopüa neäka jare emae ndeɨ́vɨri rupi, emae, kërai oyemboatɨ opaete kuae yogüeru ndépɨri vae reta. Che peYa, tae cheyé aeño ndeve, kërai opaete jókuae yogüeru vae reta pe reñemopörata, metei kuñatai omenda vae oñemopöra vae rami.

¹⁹ Ndeɨvɨ opa etei oyemboai oï, opa oñererokomegua oï jare ipoä opɨta; ërei añave, ndeɨvɨ ipɨmiita opɨta, jeta yae vae jeko pegua. Kuae ɨvɨ imboaia reta matɨ ma yogüɨrekota.

²⁰ Nemembɨ reta opa tëi ketɨ oyereraja ndegüi vae, oendukata ndeve: ‘Ipɨmii yae opɨta kuae ɨvɨ, pemee oreve ɨvɨ roiko pɨpe vaerä.’

²¹ Jare nde rereta ndepɨa pe: ‘¿Kia ra omee kuae reta chemembɨrä? Echa chemembɨmbae ko apɨta, cheño etei ko aiko yepi; aiko yepi mombɨrɨ ɨvɨ ambuae pe. ¿Kia ra ombokuakuaa kuae reta? Cheño etei ko apɨta, ¿ketɨ güi ra yogüeru kuae reta?’ ”

²² YandeYa jei: “Ayokuaita opaete vae tëtaguasu reta, güeru reta vaerä iyɨva re nemembɨ reta, jare nememɨkuña reta iyatiɨ re.

²³ Mburuvicha guasu reta ñogüɨnoita ndeangareko vaerä, jare tayɨ reta ñogüɨnoita oyangareko vaerä nemichia reta re. Oyetavatɨka retata nderóvai ɨvɨ re ndemboete, jare ndepɨ oipɨte retata. Jare chekuaata che ko jae peYa vae, jare kërai cheré güɨrovia vae reta ngaraa oñemomaraiuka.”

²⁴ ¿Ipuereta ra kia opɨ̈ro sundaro jëia vae güi, jókuae mbae ñeraroa güi güerugüe? Ani ¿ipuereta ra tembipɨɨ reta otekuarai mburuvicha jëia yae vae güi?

²⁵ Ërei yandeYa jei körai: “Ipuere ko, sundaro jëia vae güi oñepɨ̈ro mbae ñeraroa güi güerugüe, ipuere ko, tembipɨɨ otekuarai mburuvicha jëia vae güi. Che tañemoë, oñeapo nderé vae reta kotɨ, che etei aroasayepeta nemembɨ reta.

²⁶ Nderovaicho reta pe jauukata isoo aeño, jare jugüɨ ae pe oyembosavaɨpo reta vino pe rami. Jökorai opaete vae toikuaa, che ndeYa, ndereroasayepe jare ndeReepɨ vae, jae ko Imbaepuere yae ete vae Jacob pe.”