ISAÍAS 48 - Biblia Guarani Tumpa Iñee

Tumpa omboeta Israel pe iyoa re

¹ “Peyeapɨsaka, Jacob iñemuña reta, tee Israel pe peñeenɨi vae reta, Judá iñemuña reta; Tumpa jee re peñererökuavee mbae peyapo vaerä vae; Israel iTumpa pe peyerure vae reta, yepe tëi mbaetɨ añetete reve ani jupi rupi;

² echa pe reta peñeenɨi tëta guasu oñeñono tee vae pe, jare Tumpa re güɨrovia vae reta pe, jae ko jee yandeYa Imbaepuere yae ete vae:

³ Mbaembae oasa vae iyɨpɨ güive voi ma ko amombeu peve, che etei ko aikuaauka. Güɨramoiño amboɨpɨ ayapo jare opa oyembopo.

⁴ Rokuaa ndepɨa täta yae ko, jiero täta rami, jare jiero iyu vae rami vae,

⁵ tenonde güive voi ma amombeu peve, ndei oasa mbove amombeu peve. Agüɨye vaerä pere: ‘Ñanetumpa ko oyapo, tumpa iä yayapo vae ko oyapo kuaekuae.’

⁶ Nde reendu jare reecha opaete kuae mbaembae; ¿mbaetɨta pa rere añetete ko vae? Añave tamombeu ndeve mbae ipɨau vae, jare mbaetɨi reikuaa vae;

⁷ jaeramo etei ko jae kuaekuae, jaeramo etei ko reendu kuae regua. Agüɨye vaerä rere: ‘Aikuaaño mai ko jókuae.’

⁸ Nde mbaetɨi ko reendu kuae regua, jare mbaetɨi reikuaa, echa ndeapɨsa oyeokenda avei oiko. Che rokuaa ko nde mbaetɨ jupi, ndei rea güive voi ma rombojee ‘ipɨarai vae’ pe.

⁹ Ërei ayeaɨu jeko pegua ayembopɨa guasu chearasɨ güi, che, imboetea yae vae jeko pegua mbaetɨ opa romokañɨtei.

¹⁰ Rotɨo, ërei mbaetɨ rotɨo korepoti oyetɨo rami, roparavo ko mbɨatɨtɨ rupi horno jaku yae vae rupi rami.

¹¹ Ayeaɨu jeko pegua ayapo jókuae, agüɨye vaerä oyemongɨa cheree. Mbaetɨta amaeño oñemee cheyemboetea ïru vae pe.”

YandeYa güɨroasayepeta tëta imbae vae

¹² “Peyeapɨsaka Israel, Jacob iñemuña reta, che roenɨi vae ko nde. Che ko Tumpa jaevaeño vae, che ko, oikoño mai vae.

¹³ Che ko ayapo ɨvɨ, jare chepoäka pe ko ajäa ara reta; aenɨi reta jee rupi yave, mókoi reve voi oyekuaa reta.

¹⁴ Peyemboatɨ opaete pe reta jare peyeapɨsaka: ‘¿Kia pa pegüi reta ipuere omombeu voi kuaekuae reta oasata vae? Kërai che, jókuae kuimbae aiparavo vae, oyapota ko Babilonia kotɨ che ayemongeta ayapo vaerä vae, jae ko Caldeaɨgua reta kotɨ.

¹⁵ Che ko jae, che ko aenɨi jare che ko aru, jáeramo, ojoa rupi, ojo kavi yaeta ko.

¹⁶ Peya katu cheré jare peyeapɨsaka: Iyɨpɨ güive, mbaetɨi chemiari vɨari; jókuae mbaembae reta oyemboɨpɨ oyembopo yave, che oime aiko joko pe. Jayave peYa Tumpa jare iEspíritu ko chembou.’

¹⁷ Körai jei yandeYa, ndeReepɨ vae, Tumpa Iyoambae Israel pegua: ‘Che ko jae ndeYa Tumpa, ndemboe kavi yae vae, ndemboe kërai reiko vaerä vae.

¹⁸ ¡Reyeapɨsaka mona cheporookuai re yave! Ɨ omboɨpɨ tuicha vae ramita tëi ko, reiko kavi vae omboɨpɨta tëi ko tuicha, ani ɨguasu iɨaparúa ramita tëi ko.

¹⁹ Peñemuña reta jeta yaeta tëi ko, ɨvɨkuitï jeta yae vae yaipapa rapembae ramita tëi ko, ngaraai ko opa tëi amboai, ngaraai ko ambosɨrɨ tëi cheróvai güi.’

²⁰ Peë Babilonia güi, petekuarai Caldeaɨgua reta ipɨte güi. Pesapúkai pemoërakua kuae, peyerovia reve, pemoërakua ɨvɨ iyapɨ rupi ave. Pere: ‘¡YandeYa oyora jembiokuai Jacob iñemuña reta!’ ”

²¹ Yepe güɨraja tëi ñuu rupi, ërei mbaetɨ oiporara reta iɨuve; oyoka ɨ̈vavira, jare omoë jeta ɨ chupe reta.

²² Ërei iyoa vae reta peguarä mbaetɨ ko mbɨakatu. Jei yandeYa.