ISAÍAS 47 - Biblia Guarani Tumpa Iñee

Tumpa iporojäa oa Babilonia re

¹ “Babilonia, nde Caldeaɨgua kuñatai ndei kuimbae ndive oasa vae rami, egüeyɨ jare eguapɨ ɨvɨkúi re; mbaetɨta ma reguapɨ mburuvicha iguapɨa pe. Eguapɨ ɨvɨ re, echa ngaraa ye ma jei reta ndeve: Ipöra yae vae.

² Eipɨɨ mbaesoka jare embaeso, eekɨ nderova iyasoika, emboi ndepɨapaa, emboapúa ɨvate nderemimonde, easa ɨ̈aka reta;

³ toyekuaa nderete inandi, toyekuaa nderete renoti tëi reve. Ayepɨta, ngaraa kia ipuere cheopia.”

⁴ OreReepɨ vae, Tumpa Iyoambae Israel pegua, jae ko jee oreYa Imbaepuere yae ete vae. Jae jei körai:

⁵ “Eguapɨ, nekïrii ngatu Caldeaɨgua, eñeñono pɨtumimbía pe, echa ngaraa ye ma nereenɨi reta: ‘Tëtaguasu reta juvicha kuña’.

⁶ Chearasɨ yae tëta chembae vae kotɨ yave, amee ñemomarai pe, jare amaeño oa ndepo pe. Nde mbaetɨ reiparareko, ndechi reta pe ave täta reiporarauka.

⁷ Ndeyemongeta pe reiko aveita mburuvicha guasurä, mbaetɨ reyemongeta kuae re, mbaetɨ vi reyemongeta jaɨkue rupi këraita ko reiko vae re.

⁸ Jáeramo, eyeapɨsaka añave kuña, apiraiño omomora yae vae, nde reguapɨ kavi avei vae, rere ndepɨa pe: ‘Mbaetɨ yé kia chegüi; ngaraa apɨta imemano vae rami, ngaraa apɨta imembɨ opa omano vae rami.’

⁹ Jókuae mókoi mbae reta ou ndeve metei ara peño: repɨtata imemano vae rami, repɨtata imembɨmbae, yepe tëi jeta reñepoano mbɨrae pe, ani yepe tëi jeta reiporu mbaekuaa.

¹⁰ Ndepɨa güive reyapo reiko ikavimbae, reyemongeta mbaetɨ ko kia ndereecha vae. Ndearakuaa katu yae vae ndembotavɨ, reyemongeta ndepɨa pe, mbaetɨ yé kia ndegüi vae.

¹¹ Ërei outa mbaesusere nderé, ngaraa ndepuere reyeopia mbɨrae reta pe; resusereta, ngaraa ndepuere reyopia; susere outa ndeve neparanoe.

¹² Epɨta jókuae mbɨrae reta ndive, jókuae mbaekuaa reta ndive, ndetaɨrusu güive remomora vae, yaecha ikavi ndeve, yaecha ra ndemborɨ.

¹³ Jeta rereko ndemboarakuaa vae reta, reyembogüéraiti pɨpe. ¡Toyogüeru jókuae yasɨtata reta re oyemboe vae reta, yasɨtata rupi mbae omoërakua raanga vae reta, yasɨ ñavo omoërakua mbaembae outa vae reta, toyogüeru jae reta tandereroasayepe!

¹⁴ Ërei jae reta ko kapiiño, tata oapɨ reta vae ramiñota, ngaraa ipuere reta oyeepɨ tata güi. Echa tata jätapɨi vaeä ko, oguapɨ jare oyepee vaerä jóvai.

¹⁵ Jökoraita ko oasa jókuae imbaekuaa jare ipɨrae vae reta, ndetaɨrusu güive jae reta ndive peyopokuaa oyoe vae. Metei ñavo yogüɨrajata jape jape ae rupi, mbaetɨta kia ndereroasayepe vaerä.”